Read Nguna Togoa Etafe North 1 NAWOTA MAGA 12 Bible Online

1 NAWOTA MAGA 12 - Nguna Togoa Etafe North bible

1 NAWOTA MAGA 12

¹Go Rehoboam e paki Shekem pano: nalakena Israel mamau puti eu rumai paki Shekem naga euga mari a ega vei nawota.

²Go e pakilina, ragi waina Yeroboam natu ni Nebat e dogo e, (nalakena nae e ko doko Ityipt doko, tokora waina e paki asa pano ragi waina e sava m̃elu dua ki narae ni nawota Solomon, go Yeroboam e m̃enaki doko Ityipt,

³Go eu pitip̃aki pano po soso e umai;) go e pakilina naga Yeroboam go nasaisaiana mamau ni Israel eu rumai, po pasa paki Rehoboam, po naga,

⁴Tamam̃a e mari nakau ni nanoa aginami e madaga: nalakena tea wanogoe p̃a mari nawosiana kasua ki tamam̃a, go nakau ni nanoa madaga aneana waina au ova e ega masalesale, go auga wo manigo suasua.

⁵Go e noa ki da, e naga, Kuga vano po doko naaleatia euga tolu, go kuga moro umai punusi au.

⁶Go narei mamau eu pano. Go nawota Rehoboam e pusum̃aki paki namariki maga, waina eu pea lawodu narae ni tamana Solomon, ragi waina e ko mauri doko, e naga, Nasava waina ku midoa ki nia naga e p̃ia naga aga noa ki narei waia asa?

⁷Go eu noa ki nia, eu naga, Ku pe wo pei tea suasua sikai ki narei waia naaleatia waia, go ku pe wo madeada suasua, po pasadara ra, po pasa navasaana wia maga paki da, nara eu pe wo manigo pei tea suasua maga, pa pa ega tu mau du.

⁸Ma e dip̃adoa navasaana maga ki namariki maga wanogoe, waina eu dua e asa, po pusum̃aki paki natureai maga waina eu pei taaka sikai maau, go waina eu lawodu naraena.

⁹Go e noa ki da, e naga, Seve navasaana waina ku midoa ki nia naga tuga vasadara narei waia asa, nara waina eu noa kinau, eu naga, P̃a mari nakau ni nanoa waina tamam̃a e doropusi a doko gami ega masalesale?

¹⁰Go natureai maga wanogoe waina eu pei taaka sikai maau eu noa ki nia, eu naga, P̃a vasa ega tapala nea paki narei waia waina eu noa ki‐go naga, Tamam̃a e mari nakau ni nanoa aginami e madaga, ma nigo p̃a mari a ega masalesale paki gami; p̃a vasa ega tapala nea paki da, p̃a naga, Kini riki aginau e matolu liu namalo ni tamagu.

¹¹Tamagu e doro nakau ni nanoa madaga sikai e doko mu, ma kinau aga wo mari nakau ni nanoa animu ega moro madaga liu: tamagu e parati mu ki natali varati maga, ma kinau aga wo parati mu ki mataloa maga.

¹²Go dapala nogoe Yeroboam go narei mamau eu rumai punusi Rehoboam naaleatia ketolu, dapala waina nawota e pitip̃aki asa, doko do naga, Kuga moro umai punusi au naaleatia ketolu.

¹³Go nawota e pasadara narei tea kasua maga, po dip̃adoa navasaana ki namariki maga waina eu dua e asa;

¹⁴E pasa paki da dapala navasaana ki natureai maga, e naga, Tamagu e mari nakau ni nanoa animu e madaga, ma kinau aga wo mari nakau ni nanoa animu ega moro madaga liu: tamagu e parati mu ki natali varati maga, ma kinau aga wo parati mu ki mataloa maga.

¹⁵Go dapala nogoe nawota e da dogo parati ki narei mau; nalakena e pei navatuna sikai pae Yehovah naga ega vakavuro nanoaana aneana, waina Yehovah e pasa asa pae nam̃elearu ni Ahiyah, tea ni Shiloh, waina e noa ki Yeroboam natu ni Nebat asa.

¹⁶Go ragi waina Israel mamau eu punusi naga nawota e da dogo parati ki da mau, narei eu pasadara nawota, eu naga, Seve matele waina au peani a doko David? Go au da peani tea veani‐pioli‐kiana doko Yesse natuna mau: kuga vaki tap̃aup̃au animu maga pano Israel O: go p̃a tum̃am̃a leo parati ki nasum̃a anigo David. Go Israel eu paki tap̃aup̃au adeada maga pano.

¹⁷Ma nalo ni Israel natuna maga waina eu doko natokoana maga ni Yudah doko, Rehoboam e maramara dap̃au ra.

¹⁸Go nawota Rehoboam e dip̃aki lua Adoram, waina e pei tea leo parati ki dap̃au naatam̃oli wosiwosi maga; go Israel mamau eu nadi a ki vatu maga, go e mate. Go nawota Rehoboam e mari m̃araverave naga ega vaki kariot aneana naga ega sava paki Yerusalem pano.

¹⁹Nalakena tea wanogoe Israel eu mari p̃auluulu paki nasum̃a ki David pa pa paki naaleatia waia.

²⁰Go e pakilina, ragi waina Israel mamau eu dogo naga Yeroboam e moro liliu, naga eu dip̃aki lua po soso e umai punusi taua ni nasaisaiana, po mari a e pei nawota dap̃au Israel mamau: tea waina e dausi nasum̃a ki David e dika, ma naworawora ni Yudah e sikina.

²¹Go ragi waina Rehoboam e umai paki Yerusalem, e piragi saisai ki nasum̃a mamau puti ni Yudah, nara ma naworawora ni Benyamin, naatam̃oli matadoaana manu p̃onotia sikai go tivilia latolu, naatam̃oli marimatua maga, naga euga mari navakalo dip̃a nasum̃a ni Israel, naga euga magi Rehoboam natu ni Solomon dape namarakiana ega liliu.

²²Ma navasaana ki Sup̃e e umai paki Shemaiah, naatam̃oli ki Sup̃e,

²³e naga, P̃a vasa paki Rehoboam natu ni Solomon, nawota ni Yudah, go paki nasum̃a mamau ni Yudah go Benyamin, go paki narei maga waina eu mamau doko,

²⁴p̃a naga, Yehovah e noa dapala nea, e naga, Kuga ta sake pano mau, kite mari navakalo dip̃a taimu Israel natuna maga mau: kuga liliu sara naatam̃oli sikasikai paki nasum̃a adeada; nalakena naleo waia e pei tea aginau. Go eu dogo parati ki navasaana ki Yehovah, po pae napua adeada pano, pataka ni navasaana ki Yehovah.

²⁵Go Yeroboam e davagi Shekem navanua ni tava ni Efraim, po doko asa doko; go e m̃elu dua ki tokora wanogoe po pano po davagi Penuel.

²⁶Go Yeroboam e noa nap̃op̃ona, Ragi waia namarakiana ega wo liliu paki nasum̃a ki David:

²⁷Narei waia eu pe sake paki Yerusalem pano naga eu pe mari naviriana maga nasum̃a ki Yehovah, nap̃op̃o ni narei waia e pe wo moro maradoa liliu paki nawota adeada, paki Rehoboam nawota ni Yudah; go euga wo mari punue au, po moro liliu paki Rehoboam nawota ni Yudah.

²⁸Nalakena tea wanogoe nawota e midoakiusiusi a nap̃op̃ona, go e mari kau natuna dua ni kold, go e noa ki narei, e naga, E kasua paki mu naga kuga sake paki Yerusalem pano: p̃a leo, Israel O, sup̃e anigo maga, waina ero piragi mu m̃elu dua ki navanua ni Ityipt umai.

²⁹Go e lawo ki tea sikai e doko Beth‐el, go kerua e lawo ki nia e doko Dan.

³⁰Go tea wanogoe e po pei namarinaleosaana sikai: nalakena narei eu pano naga euga lotu narae ni tea sikai waina e doko Beth‐el, go narae ni kerua waina e doko Dan.

³¹Go e mari nasum̃a tapu maga doko tokora vakilagi maga, go e dawona ki tea viri maga m̃elu m̃aleoputo ni narei mamau, waina eu da pei naworawora ni Levi seara kakada mau.

³²Go Yeroboam e datuta ki nasaisaiana sikai atelagi kelatolu, nakup̃a kerualima sikai tamate lima ni atelagi, dakiusi nasaisaiana waina eu mari a Yudah, go e sake paki wede ni naviriana po pitua ki naviriana; e mari tea wanogoe Beth‐el, doko do mari naviriana maga paki kau natuna maga waina e dum̃ana mari ra: go e lawo ki tea viri maga tokora vakilagi maga waina e mari ra Beth‐el.

³³Go e sake paki wede ni naviriana waina e mari a e doko Beth‐el, nakup̃a kerualima sikai tamate lima ni atelagi kelatolu, atelagi waina e dum̃ana midoaki p̃otae a nap̃op̃ona: go e magi Israel natuna maga mari natuta ni nasaisaiana sikai, go e sake paki wede ni naviriana, po dap̃ara ki tea ni nap̃o wia asa.