Read Nguna Togoa Etafe North 1 NAWOTA MAGA 13 Bible Online

1 NAWOTA MAGA 13 - Nguna Togoa Etafe North bible

1 NAWOTA MAGA 13

¹Go p̃a leo, naatam̃oli sikai ki Sup̃e e pae Yudah umai paki Beth‐el, navasaana ki Yehovah e pei nalakena: go Yeroboam e lawodu nadigi ni wede ni naviriana naga ega tap̃ara ki tea ni nap̃o wia.

²Go naatam̃oli wanogoe e pioso dip̃a wede ni naviriana pae navasaana ki Yehovah, po naga, Wede ni naviriana O, wede ni naviriana, Yehovah e noa dapala nea, e naga; P̃a leo, piakiki sikai ega wo magi nasum̃a ki David pakilina, nagisana ega vei Yosiah; go nae ega wo pitua ki tea viri maga ni tokora vakilagi maga waina eu do dap̃ara ki tea ni nap̃o wia ako, euga vei naviriana, go navatu maga ki naatam̃oli euga wo pei tea tap̃arakiana ako.

³Go naaleatia sikai maau wanogoe e pitua ki navaivaiana sikai, e naga, Tea waia e pei navaivaiana waina Yehovah e noa e: e naga, P̃a leo, wede ni naviriana ega wo pei tea marip̃oraeana, go natano‐apu maga waina eu doko asa euga wo pei tea takiluaana pano.

⁴Go e pakilina, ragi waina nawota e dogo navasaana ki naatam̃oli ki Sup̃e waina e pioso asa dip̃a wede ni naviriana doko Beth‐el, naga e sai ki nam̃elearuna, po naga, P̃a vuasoki a. Go nam̃elearuna waina e sai ki nia dip̃a e, e lologara, go e mari sa moro dum̃ana dosa liliua ki nia mau.

⁵Go wede ni naviriana e pei tea marip̃oraeana, go natano‐apu maga eu pevera m̃elu dua ki wede ni naviriana, pataka ni navaivaiana waina naatam̃oli ki Sup̃e e po pitua ki nia pae navasaana ki Yehovah.

⁶Go nawota e pasadara po noa ki naatam̃oli ki Sup̃e, e naga, P̃a vavara ni Yehovah Sup̃e anigo, po maginau dapasavasa, naga nam̃elearugu ega moro p̃ia. Go naatam̃oli ki Sup̃e e pavara ni Yehovah, go nam̃elearu ni nawota e pei tea mariana e moro p̃ia, dakiusi waina e doko sala vea.

⁷Go nawota e noa ki naatam̃oli ki Sup̃e, e naga, P̃a umai, toroga vaki esum̃a, po ganikani, go aga wo dua ko namoriana sikai.

⁸Go naatam̃oli ki Sup̃e e noa ki nawota, e naga, Ku pe tua au namagovai ni nasum̃a anigo, ma aga wo da sili sikoti ko mau, go aga wo da gani navinaga kite munu noai tokora waia mau:

⁹Nalakena e pei natip̃akiana sikai paki nau pae navasaana ki Yehovah, e naga, P̃a ta gani navinaga mau kite munu noai, go p̃a ta liliu pano pae napua waina ku pae asa umai mau.

¹⁰Nalakena tea wanogoe e pae napua p̃ota sikai pano, e da liliu pae napua waina e pae asa umai paki Beth‐el mau.

¹¹Go profeta matua sikai e doko Beth‐el doko; go natuna maga eu rumai po noa ki nia nawosiana maga waina naatam̃oli ki Sup̃e e mari a Beth‐el naaleatia wanogoe: go navasaana maga waina e noa ki nawota asa, nara ma eu moro noakisai tamada asa.

¹²Go tamada e noa ki da, e naga, Seve napua e pae asa pano? Nalakena natuna maga eu leo punusi napua waina naatam̃oli ki Sup̃e, waina e pae Yudah umai, e moro pae asa pano.

¹³Go e noa ki natuna maga, e naga, Kuga maginau sawa ki tea sawagoro nam̃adu ni ass. Go eu maneana sawa ki tea sawagoro nam̃adu ni ass: go e sakesaake asa, po pano.

¹⁴Go e sava dausi naatam̃oli ki Sup̃e wanogoe, po pap̃ai a e doko natano melu ni nakau oak sikai: go e noa ki nia, e naga, Nigo ku pei naatam̃oli ki Sup̃e waina ku pae Yudah umai, kite? Go e naga, Kinau a pei nae.

¹⁵Go e noa ki nia, e naga, P̃a umai, toroga vaki esum̃a, po ganikani.

¹⁶Go e naga, A mari sa sikoti ko liliu, kite sili sikoti ko mau: go aga wo da gani navinaga kite munu noai sikoti ko tokora waia mau:

¹⁷Nalakena e pei tea noaana paki nau pae navasaana ki Yehovah, e naga, P̃a ta gani navinaga kite munu noai tokora wanogoe mau, kite liliu pae napua waina ku pae asa umai mau.

¹⁸Go e noa ki nia, e naga, Kinau a moro dakiusi ko, a pei profeta sikai; go agelo sikai e pasa paki nau pae navasaana ki Yehovah, e naga, P̃a viragi a liliu sikoti ko paki nasum̃a anigo, naga ega kanikani po munu noai. Ma e pasa sorosoro paki nia.

¹⁹Nalakena tea wanogoe e sikoti a liliu, po ganikani nasum̃a aneana, po munu noai.

²⁰Go e pakilina ragi waina ero doko natano ganikani, naga navasaana ki Yehovah e umai paki profeta waina e piragi a liliu:

²¹Go e pioso paki naatam̃oli ki Sup̃e waina e pae Yudah umai, e naga, Yehovah e noa dapala nea, e naga, Nalakena ku dogopiri navasaana ki Yehovah, po da pavaigoro natip̃akiana waina Yehovah Sup̃e anigo e dip̃aki‐go asa,

²²Ma ku liliu umai po ganikani po munu noai tokora waina Yehovah e noa ki‐go asa naga, P̃a ta gani navinaga kite munu noai asa mau; nalakena tea wanogoe nap̃atoko mate anigo ega wo da umai paki matigo ki tamam̃a maga mau.

²³Go e pakilina, ragi waina e ganikani po munu go e nopu, naga e magi profeta waina e piragi a liliu, sawa ki tea sawagoro nam̃adu ni ass.

²⁴Go ragi waina e pano laion sikai e sua e napua, po kati punue a: go nap̃atoko mate aneana e pei tea nadikiana napua, go ass e lawodu nap̃irikiana; go laion ma e lawodu nap̃irikia ni nap̃atoko mate wanogoe.

²⁵Go p̃a leo, naatam̃oli maga eu liu sa pano, po punusi nap̃atoko mate e one napua, go laion waina e lawodu nap̃irikia ni nap̃atoko mate: go eu rumai po noasai a natokoana waina profeta matua wanogoe e doko asa doko.

²⁶Go ragi waina profeta waina e piragi a liliu m̃elu dua ki napua e dogo e, e naga, E pei naatam̃oli ki Sup̃e nogo, waina e dogopiri navasaana ki Yehovah: nalakena tea wanogoe Yehovah e pitua ki nia paki laion waina e kati p̃orae a, po mari punue a, pataka ni navasaana ki Yehovah waina e noa ki nia asa.

²⁷Go e noa ki natuna maga, e naga, Kuga maginau sawa ki tea sawagoro nam̃adu ni ass. Go eu maneana sawa ki nia.

²⁸Go e pano po pap̃ai nap̃atoko mate aneana e one napua, go ass ma laion ero lawodu nap̃irikia ni nap̃atoko mate wanogoe: laion e da gani nap̃atoko mate mau, kite kati p̃orae ass mau.

²⁹Go profeta wanogoe e dape dakati nap̃atoko mate ni naatam̃oli ki Sup̃e, po sawa ki nia nam̃adu ni ass, po dape a liliu: go e paki natokoana ki profeta matua wanogoe, naga ega tagisi a go naga ega ova ki nia.

³⁰Go e lesi nap̃atoko mate wanogoe e one matigo aneana; go e dagisi a, po naga, Awi, taigu!

³¹Go e pakilina, edaku ki ragi waina e ova ki nia, naga e pasa paki natuna maga, po naga, Ragi waina aga mate, kuga ova kinau matigo waina naatam̃oli ki Sup̃e wanogoe e pei tea ovakiana asa; navatugu maga euga one pisari navatuna maga.

³²Nalakena navasaana waina e pioso asa pae navasaana ki Yehovah dip̃a wede ni naviriana ki Yehovah dip̃a wede ni naviriana doko Beth‐el, go dip̃a nasum̃a mamau puti ni tokora vakilagi maga waina eu doko natokoana maga ni Samaria, ega wo lolomana.

³³Edaku ki tea wanogoe Yeroboam e da liliu m̃elu dua ki napua sa aneana maga mau, ma e moro mari tea viri maga m̃elu m̃aleoputo ni narei mamau eu pei tea viri maga ni tokora vakilagi maga: tea waina e pe tum̃ana masauna, tea wanogoe e pakavuro nam̃elearuna go e po pei tea mariana e pei tea viri doko tokora vakilagi maga.

³⁴Go tea wanogoe e po pei namarinaleosaana paki nasum̃a ki Yeroboam, dapala waina e pei tea taeluaana po pei tea mari‐puoli‐kiana pa dua ki narae ni maramana.