Read Nguna Togoa Etafe North 1 NAWOTA MAGA 14 Bible Online

1 NAWOTA MAGA 14 - Nguna Togoa Etafe North bible

1 NAWOTA MAGA 14

¹Go Abiyah natu ni Yeroboam e sasana.

²Go Yeroboam e noa ki anagoroi, e naga, P̃a tuleana, a pavara ni ko, po dum̃am̃a mari ko p̃a vilip̃o, naga p̃a ta pei tea ataeana naga ku pei Yeroboam anagoroi mau: go p̃a vaki Shiloh pano; p̃a leo, profeta Ahiyah e doko tokora wanogoe doko, nae waina e noa kinau naga aga vei nawota dap̃au narei waia.

³Go p̃a tape bred rualima sikai, go keke kiki maga, go lasa ni honi sikai, go p̃a va punusi a: nae ega wo noa ki‐go tea waina ega wo pakilina ki piakiki waia.

⁴Go Yeroboam anagoroi e mari dapala nogoe; e duleana po paki Shiloh pano, paki nasum̃a ki Ahiyah. Go Ahiyah e mari sa leosai mau; nalakena namatana ero p̃irogorogo nalakena namatuana.

⁵Go Yehovah e noa ki Ahiyah, e naga, P̃a leo, Yeroboam anagoroi e umai naga ega vusuusu paki‐go nalo ni natuna; nalakena e sasana: p̃a noa ki nia ega tapala waia go ega tapala waia: nalakena ega wo pakilina, ragi waina ega wo sili umai, naga ega wo pilip̃o po pei nagoroi p̃ota sikai.

⁶Go e dapala nogoe, ragi waina Ahiyah e dogo nam̃ele natuana ero do surata dukituki ragi waina e umai paki m̃aladigi ki namata, naga e pasa po naga, P̃a umai nigo Yeroboam anagoroi; ekasana ku dum̃am̃a mari ko ku pilip̃o? Nalakena kinau a pei tea tip̃akiana naga aga noa ki‐go narogorogoana madaga sikai.

⁷P̃a vano, p̃a noa ki Yeroboam naga Yehovah Sup̃e ki Israel e noa dapala nea, e naga, Nalakena a sike ko pakilagi m̃elu m̃aleoputo ni narei, po mari ko ku pei tea maraki dap̃au narei aginau Israel,

⁸Po pualua namarakiana m̃elu dua ki nasum̃a ki David, po dua ko asa: go ku da mari dakiusi waina tea suasua aginau David e mari a mau, nae waina e pavaigoro natip̃akiana aginau maga, go waina e dausi au ki nap̃op̃ona mamau, doko do mari tea waina e leana namatagu;

⁹Ma ku mari tea waina e sa liu tea maga mamau puti waina eu doko pea ki‐go, go ku pano po dum̃am̃a manigo mari sup̃e p̃ota maga, go nasup̃e takiana maga, doko do mari au a maeto, go ku nadi kinau paki natakum̃a:

¹⁰Nalakena tea wanogoe, p̃a leo, aga wo piragi nasaana umai paki nasum̃a ki Yeroboam, go aga wo daelua piakiki naanoai maga m̃elu dua ki nasum̃a ki Yeroboam, tea mamau puti waina eu doko Israel, naviti go tea tum̃ana doko; aga wo sasara lua puti tea ni nasum̃a ki Yeroboam, dapala waina naatam̃oli e do sasara lua puti nasogosogo pa pa e da moro doko mau.

¹¹Naatam̃oli ni nasum̃a ki Yeroboam e pe mate natokoana, koria maga euga wo gani a; go e pe mate namalasi, manu maga ni namalopa euga wo gani a: nalakena Yehovah e noa e.

¹²Nalakena tea wanogoe p̃a tuleana, p̃a vaki nasum̃a anigo pano: go ragi waina nam̃ele natum̃a eroga sili paki natokoana, ragi wanogoe piakiki wanogoe ega wo mate.

¹³Go Israel mamau puti euga wo dagisi a, po ova ki nia; nalakena tea ni nasum̃a ki Yeroboam euga wo da umai paki matigo mau, ma nae ega sikina: nalakena tea ni nasum̃a ki Yeroboam eu sa puti, ma nae e sikina pei tea vap̃aiana asa naga e p̃ia paki Yehovah Sup̃e ki Israel.

¹⁴Go Yehovah ega wo dum̃ana maneana sike nawota sikai dap̃au Israel, waina ega wo daelua nasum̃a ki Yeroboam naaleatia wanogoe: ma ekasava?

¹⁵Nalakena Yehovah ega wo atugi Israel, dapala napati nau sikai waina e pei tea tuletuleakiana noai; go ega wo paku lua Israel m̃elu dua ki navanua wia waia, waina e dua tamada maga asa, po daperavera ki da paki taleva kerua ni Noaisara; nalakena eu dum̃ada madeada mari Asherah maga, doko do mari Yehovah e maeto.

¹⁶Go ega wo doropusi Israel nalakena namarinaleosaana maga ki Yeroboam waina e mari naleo sa asa, go waina e moro mari Israel eu mari naleo sa asa.

¹⁷Go Yeroboam anagoroi e duleana, po paki Tirsah pano: go ragi waina e umai paki namata ni nasum̃a, ragi wanogoe piakiki wanogoe e mate.

¹⁸Go eu ova ki nia, go Israel mamau eu dagisi a; dapala navasaana ki Yehovah waina e pasa asa pae nam̃elearu ni tea suasua aneana profeta Ahiyah.

¹⁹Go nawosiana mamau puti ki Yeroboam, takana waina e mari navakalo, go takana waina e maramara, p̃a leo, eu pei tea midiriana tusi ni nawosiana ni naaleatia maga ki nawota maga ni Israel.

²⁰Go naaleatia maga waina Yeroboam e maramara asa eu pei natau rualima dua tamate dua: go e maturu sikoti tamana maga, go natuna Nadab e moro maramara du oli a.

²¹Go Rehoboam natu ni Solomon e maramara Yudah. Rehoboam e pei tea ni natau rualima pati tamate sikai ragi waina e pae asa maramara, go e maramara Yerusalem, natokoana waina Yehovah e matadoa e m̃elu naworawora maga mamau puti ni Israel naga nagisana ega toko asa, natau rualima sikai tamate larua: go p̃ilana nagisana Naamah, ni Ammon.

²²Go narei ni Yudah eu mari tea waina e sa namata ni Yehovah; go eu mari a e dotowo kasua nalakena namarinaleosaana adeada maga waina eu mari naleo sa asa, p̃arua liu tea waina tamada maga eu pea mari a.

²³Nalakena eu moro dum̃ada madeada davagi tokora vakilagi maga, go tea lawodu maga, go Asherah maga, nam̃asua ni sara tava vakilagi, go melu ni sara nakau malakesa.

²⁴Go tea masausara maga eu doko navanua doko: nara ma eu mari tea mamaragokiana maga dakiusi nalauna maga waina Yehovah e kopasi lua ra m̃elu dua ki narae ni Israel natuna maga pano.

²⁵Go e pakilina natau kelima ki nawota Rehoboam, naga Shishak nawota ni Ityipt e sake umai dip̃a Yerusalem:

²⁶Go e dape pavakoto naleo wia tauakiana maga ni nasum̃a ki Yehovah, go naleo wia tauakiana maga ni nasum̃a ki nawota; e dape pavakoto puti ra: go e moro dape pavakoto kokororum̃a maga mamau puti ni kold waina Solomon e mari ra.

²⁷Go nawota Rehoboam e mari oli kokororum̃a maga ni brass, po pitua ki da paki nam̃elearu ni nap̃au ni tea viviatu maga waina eu pei tea vavaigoro namata ni nasum̃a ki nawota.

²⁸Go e dapala nogoe, ragi waina nawota e pano paki nasum̃a ki Yehovah, tea viviatu maga eu dapetape ra pano, po moro dapetape ra liliu paki ekopu ni em̃ago ni nasum̃a ki tea viviatu maga.

²⁹Go nawosiana maga ki Rehoboam, go tea mamau puti waina e mari ra, eu da pei tea midiriana tusi ni nawosiana ni naaleatia maga ki nawota maga ni Yudah, kite?

³⁰Go navakalo e doko namawota ni Rehoboam go ni Yeroboam pitip̃atip̃a.

³¹Go Rehoboam e maturu sikoti tamana maga, go e pei tea ovakiana sikoti tamana maga natokoana ki David: go p̃ilana nagisana Naamah, ni Ammon. Go natuna Abiyam e maramara du oli a.