Read Nguna Togoa Etafe North 1 NAWOTA MAGA 16 Bible Online

1 NAWOTA MAGA 16 - Nguna Togoa Etafe North bible

1 NAWOTA MAGA 16

¹Go navasaana ki Yehovah e umai paki Yehu natu ni Hanani, dip̃a Baasha,

²e naga, Nalakena a sike ko m̃elu dua ki nam̃otam̃ota, po mari ko ku pei tea maraki dap̃au narei aginau Israel; go ku surata napua ki Yeroboam, po mari narei aginau Israel eu mari naleo sa, po mari au a maeto ki namarinaleosaana adeada maga;

³P̃a leo, aga wo mari puoli ki Baasha, go nasum̃a aneana mamau puti; go aga wo mari nasum̃a anigo ega wo dakiusi nasum̃a ki Yeroboam natu ni Nebat.

⁴Naatam̃oli maga ki Baasha waina eu mate natokoana, koria maga euga wo gani ra; go tea maga waina eu mate namalasi, manu maga ni namalopa euga wo gani ra.

⁵Go nawosiana maga ki Baasha, go tea waina e mari a, go nakasuaana aneana, eu da pei tea midiriana tusi ni nawosiana ni naaleatia maga ki nawota maga ni Israel, kite?

⁶Go Baasha e maturu sikoti tamana maga, po pei tea ovakiana Tirsah; go natuna Elah e maramara du oli a.

⁷Go pae nam̃elearu ni profeta Yehu, natu ni Hanani, navasaana ki Yehovah e umai dip̃a Baasha, go dip̃a nasum̃a aneana, nalakena namariana sa waina e mari a namata ni Yehovah, doko do mari a e maeto ki nawosiana ni nam̃elearuna maga, waina e mari dapala nasum̃a ki Yeroboam; go nalakena e mari puoli ki nia.

⁸Natau kerualima dua tamate latesa ki Asa nawota ni Yudah, Elah natu ni Baasha e pae asa maramara Tirsah dap̃au Israel, go e maramara natau dua.

⁹Go tea suasua aneana Simri, tea maraki namagovai ni kariot aneana maga, e mari nasekeana dip̃a e: go e doko Tirsah doko, e do munu po do matamaloku asa nasum̃a ki Arsa, waina e pei tea tap̃au dap̃au tea ni nasum̃a aneana Tirsah.

¹⁰Go Simri e paki ekopu po atugi a, po p̃oka punue a, e pei natau kerualima dua tamate larua ki Asa nawota ni Yudah, go e maramara du oli a.

¹¹Go e pakilina ragi waina e pae asa maramara, ragi waina e pae asa dasake malo tasake aneana, naga e atugi nasum̃a mamau puti ki Baasha: e da maneana doropusi te naanoai aneana sikai maau e doko mau, tea ni namatarau aneana, kite ni tana ri maga.

¹²Dapala nogoe Simri e mari puoli ki nasum̃a mamau puti ki Baasha, pataka ni navasaana ki Yehovah, waina e pasa asa dip̃a Baasha pae nawoka ni profeta Yehu,

¹³Nalakena namarinaleosaana maga mamau puti ki Baasha, go namarinaleosaana maga ki natuna Elah, waina eu mari naleo sa asa, go waina eu mari Israel eu mari naleo sa, doko do mari p̃auluulu paki Yehovah Sup̃e ki Israel, po mari a e maeto ki idolo adeada maga.

¹⁴Go nawosiana maga ki Elah, go tea mamau puti waina e mari ra, eu da pei tea midiriana tusi ni nawosiana ni naaleatia maga ki nawota maga ni Israel, kite?

¹⁵Natau kerualima dua tamate larua ki Asa nawota ni Yudah, Simri e maramara Tirsah naaleatia larua. Go narei maga eu m̃enaki goro Cibbethon, waina e pei agi Filistine maga.

¹⁶Go narei maga waina eu m̃enaki doko eu dogo, eu naga, Simri e mari nasekeana dip̃a nawota po atugi a: nalakena tea wanogoe Israel mamau waina eu m̃enaki doko eu mari Omri, tea maraki taua ni navakalo, e pei nawota dap̃au Israel naaleatia wanogoe.

¹⁷Go Omri e pae Cibbethon sake pano, nara ma Israel eu mamau, go eu kelugoro Tirsah.

¹⁸Go e pakilina, ragi waina Simri e punusi naga natokoana e pei tea vuatiana, naga e paki ekopu ni nasum̃a ni p̃aaka ki nawota, po dap̃ara ki nasum̃a ki nawota, po dum̃ana dokonigoro e ki nakapu, po mate asa,

¹⁹Nalakena namarinaleosaana aneana maga waina e mari naleo sa asa, doko do mari tea waina e sa namata ni Yehovah, doko do surata napua ki Yeroboam, go nalakena namarinaleosaana aneana waina e mari a, naga e mari Israel eu mari naleo sa.

²⁰Go nawosiana maga ki Simri, go nasekeana aneana waina e mari a, eu da pei tea midiriana tusi ni nawosiana ni naaleatia maga ki nawota maga ni Israel, kite?

²¹Ragi wanogoe narei ni Israel eu pei tea tap̃otaeana eu dua asa: namagovai ni narei eu dausi Tibni natu ni Cinath, naga euga mari a ega vei nawota; go namagovai eu dausi Omri.

²²Ma narei waina eu dausi Omri, eu marimatua ki narei maga waina eu dausi Tibni natu ni Cinath: go Tibni e mate, go Omri e maramara.

²³Omri e pae asa maramara dap̃au Israel natau kerualima dolu tamate sikai ki Asa nawota ni Yudah, go e maramara natau rualima sikai tamate dua: e maramara Tirsah natau latesa.

²⁴Go e pakotovi tava ni Samaria ki Shemer, ki silver talenta dua; go e davagi natokoana sikai tava wanogoe, po salagisa ni natokoana waina e davagi a ki Samaria, pae nagisa ni Shemer waina e pea pei talakea ni tava wanogoe.

²⁵Go Omri e mari tea waina e sa namata ni Yehovah, e mari tea waina e sa do liu tea maga mamau puti waina eu doko pea ki nia.

²⁶Nalakena e surata napua mamau puti ki Yeroboam natu ni Nebat, go nalakena namarinaleosaana aneana maga waina e mari Israel eu mari naleo sa, doko do mari Yehovah Sup̃e ki Israel e maeto ki idolo adeada maga.

²⁷Go nawosiana maga ki Omri waina e mari ra, go nakasuaana aneana waina e dum̃ana pisei ki nia, eu da pei tea midiriana tusi ni nawosiana ni naaleatia maga ki nawota maga ni Israel, kite?

²⁸Go Omri e maturu sikoti tamana maga, po pei tea ovakiana Samaria: go natuna Ahab e maramara du oli a.

²⁹Go natau kerualima dolu tamate latolu ki Asa nawota ni Yudah, Ahab natu ni Omri e pae asa maramara dap̃au Israel: go Ahab natu ni Omri e maramara Samaria dap̃au Israel natau rualima dua tamate dua.

³⁰Go Ahab natu ni Omri e mari tea waina e sa namata ni Yehovah, p̃arua do liu tea maga mamau puti waina eu doko pea ki nia.

³¹Go e pakilina, dapala e pe vei tea kiki naga ega surata namarinaleosaana maga ki Yeroboam natu ni Nebat, ma e dawiri Yesebel natu ni Ethbaal nawota ni Sidon, po pano po magi Baal suasua, po lotu ki nia.

³²Go e magi Baal sike lawo ki wede ni naviriana sikai nasum̃a ki Baal, waina e pea davagi a Samaria.

³³Go Ahab e mari Asherah; go Ahab e mari Yehovah Sup̃e ki Israel e maeto ki nia p̃arua liu nawota maga mamau puti ni Israel waina eu doko pea ki nia.

³⁴Naaleatia aneana maga, Hiel tea ni Beth‐el e davagi Yeriko: e nadi ki laketano kakana pilake natape‐puolikiana ki natuna takalapa Abiram, po sike lawo ki namata‐pua kakana maga pilake natape‐puolikiana ki natuna takariki Sekub; pataka ni navasaana ki Yehovah, waina e pasa asa pae nam̃elearu ni Yoshua natu ni Nun.