Read Nguna Togoa Etafe North 1 NAWOTA MAGA 17 Bible Online

1 NAWOTA MAGA 17 - Nguna Togoa Etafe North bible

1 NAWOTA MAGA 17

¹Go Eliyah naatam̃oli sikai ni Tishbe ni Cilead e noa ki Ahab, e naga, Yehovah Sup̃e ki Israel e mauri waina kinau a lawodu naraena, go e pe ta pae navasaana aginau, nasovaki go usa ero pe wo da umai natau maga waia mau.

²Go navasaana ki Yehovah e umai paki nia, e naga,

³P̃a m̃elu dua ki tokora waia pano, go p̃a maradoa paki taleva ni elo sake, po dum̃am̃a dasuru ki‐go nadigi noaisara Kerith waina e doko taleva ni elo sake ni Yordan.

⁴Go ega wo doko naga p̃a wo munu ki noaisara wanogoe; go a dip̃aki sua reven maga naga euga vagani ko tokora wanogoe.

⁵Go e pano po mari pataka ni navasaana ki Yehovah: nalakena e pano po doko nadigi noaisara Kerith, waina e doko taleva ni elo sake ki Yordan.

⁶Go reven maga eu do maneana ova bred go nap̃okasi umai malip̃ogi, go bred go nap̃okasi ragi melu; go e do munu ki noaisara.

⁷Go e pakilina edaku ki ragi kiki, naga noaisara e dap̃a garagara, nalakena usa e dika navanua.

⁸Go navasaana ki Yehovah e umai paki nia,

⁹e naga, P̃a tuleana, p̃a vaki Sarefath pano, waina e pei agi tea ni Sidon, po doko tokora wanogoe doko: p̃a leo, a dip̃aki sua nagoroi malepu sikai tokora wanogoe naga ega vakale ko.

¹⁰Go e duleana po paki Sarefath pano; go ragi waina e umai paki namata‐pua ni natokoana, p̃a leo, nagoroi malepu sikai e doko tokora wanogoe doko, e do p̃owotae nakau kokolo: go e pioso paki nia, po naga, A pavara ni ko, p̃a maginau dape noai kiki umai doko lasa sikai naga aga munu.

¹¹Go ragi waina e doko pano naga ega tape a umai, e moro soso e, po naga, A pavara ni ko, p̃a maginau dape matele kiki sikai ni bred umai doko nam̃elearum̃a.

¹²Go e naga, Yehovah Sup̃e anigo e mauri, go a dika ki bred, ma flaur e sikina doko lasa kakana pataka ni nam̃elearu sikai maau, go naroro kiki lasa ni naroro: go p̃a leo, a do p̃owotae nakau kokolo naga aga sili po maginami ma natugu mari m̃ata ki navinaga, naga aroga kanikani po mate.

¹³Go Eliyah e noa ki nia, e naga, P̃a ta mataku mau; p̃a vano, po mari ega tapala waina ku noa e: ma p̃a vea maginau mari keke kiki sikai asa, po maginau dape a umai, go edaku ki nia p̃a manimu ma natum̃a mari animu.

¹⁴Nalakena Yehovah Sup̃e ki Israel e noa dapala nea, e naga, Lasa ni flaur ega wo da p̃alo mau, go lasa ni naroro ega wo da dap̃a mau, pa pa paki naaleatia waina Yehovah ega wo dip̃aki lua usa ega p̃owo navanua.

¹⁵Go e pano po mari pataka ni tea waina Eliyah e noa e: go nara ma tea ni nasum̃a aneana eu mamau puti ganikani naaleatia laapa.

¹⁶Go lasa ni flaur e da p̃alo mau, go lasa ni naroro e da dap̃a mau, pataka ni navasaana ki Yehovah waina e pasa asa pae nawoka ni Eliyah.

¹⁷Go e pakilina edaku ki tea wanogoe, naga natu ni nagoroi wanogoe talakea ni nasum̃a e sasana; go nasasanaana aneana e p̃arua sa, dapala waina namerona e da moro doko asa mau.

¹⁸Go e noa ki Eliyah, e naga, P̃a kasa kinau, nigo naatam̃oli ki Sup̃e O? Ku po umai punusi au naga p̃a mari namarinaleosaana aginau ega vei tea midoakiana, go naga p̃a mari punue natugu, kite?

¹⁹Go e noa ki nia, e naga, P̃a tua au natum̃a. Go e dape lua e m̃elu dua ki narum̃ana, po dape a sake paki em̃ago waina e dum̃ana m̃enaki asa, go e lesi a e one nawewele aneana.

²⁰Go e pioso paki Yehovah, po naga, Yehovah Sup̃e aginau O, ku mari narogokitesaana e pakilina ki nagoroi malepu waia waina a m̃enaki nasum̃a aneana, po atugi natuna, kite?

²¹Go e paka tolu dum̃ana pitosi a elagi ki piakiki wanogoe po pioso paki Yehovah, po naga, Yehovah Sup̃e aginau O, a pavara ni ko asa, p̃a suasua naga namauriana ki piakiki waia ega moro liliu umai paki nia.

²²Go Yehovah e daki dorogo paki nadaleo ni Eliyah; go namauriana ki piakiki wanogoe e moro umai paki nia go e moro mauri.

²³Go Eliyah e dape piakiki wanogoe, po piragi lua e m̃elu dua ki em̃ago siwo paki nasum̃a, po dua p̃ilana asa: Go Eliyah e naga, P̃a vunusi a, natum̃a e mauri.

²⁴Go nagoroi wanogoe e noa ki Eliyah, e naga, Ragi waia a atae naga ku pei naatam̃oli sikai ki Sup̃e, go naga navasaana ki Yehovah waina e doko nawokam̃a, e pei nalomauana.