Read Nguna Togoa Etafe North 1 NAWOTA MAGA 18 Bible Online

1 NAWOTA MAGA 18 - Nguna Togoa Etafe North bible

1 NAWOTA MAGA 18

¹Go e pakilina edaku ki naaleatia laapa, naga navasaana ki Yehovah e umai paki Eliyah natau ketolu, e naga, P̃a vano, p̃a tum̃am̃a pisei ki Ahab ako; go aga wo dip̃aki lua usa ega p̃owo navanua.

²Go Eliyah e pano naga ega tum̃ana pisei ki Ahab asa. Go navitoloana warua sa sikai e darup̃a soki Samaria.

³Go Ahab e soso Obadiah, waina e pei tea tap̃au dap̃au nasum̃a aneana. (Go Obadiah e matau ki p̃arua ki Yehovah:

⁴Nalakena e doko, ragi waina Yesebel e daelua profeta maga ki Yehovah, naga Obadiah e puati p̃onotia sikai, po dasuru ki da eu pei taua rualima lima valea sikasikai, po pagani ra ki navinaga go ki noai.)

⁵Go Ahab e noa ki Obadiah, e naga, P̃a vano duaduru navanua, paki namata noai maga mamau puti, go paki nap̃ap̃a noaisara maga mamau puti: mase tu pe vap̃ai nam̃enau po mauti horse maga go mule maga eu pe mauri, naga tuga ta dape puoli ki puti ra mau.

⁶Go eu dap̃otae navanua namawota kakada naga euga surata duaduru asa: Ahab e sikina pae napua sikai pano, go Obadiah e sikina pae napua p̃ota sikai pano.

⁷Go ragi waina Obadiah e doko napua, p̃a leo, Eliyah e sua e: go e leoatae a, po dowo dap̃olosiwo, po naga, E pei nigo lomau, nawota aginau Eliyah, kite?

⁸Go e pasadara e, po naga, E pei kinau: p̃a vano, p̃a noa ki nawota anigo naga, P̃a leo, Eliyah e doko nea.

⁹Go e naga, A mari naleo sa nasava, naga p̃a vitua ki tea suasua anigo paki nam̃elearu ni Ahab, naga ega mari punue au?

¹⁰Yehovah Sup̃e anigo e mauri, go te nalauna kite te namarakiana e dika waina nawota aginau e da dip̃aki lua pano paki asa naga ega laaga ako: go ragi waina eu naga, E da doko nea mau; e mari namarakiana wanogoe kite nalauna wanogoe e pivisa ki navivisaana sikai naga e da pap̃ai ko mau.

¹¹Go ragi waia nigo ku naga, P̃a vano, p̃a noa ki nawota anigo naga, P̃a leo, Eliyah e doko nea.

¹²Go ega wo pakilina m̃araverave ragi waina aga wo m̃elu dua ki‐go pano, naga Naata ni Yehovah ega wo dape lua ko pano paki tokora waina aga ta atae a mau; go dapala nogoe ragi waina aga umai po noa ki Ahab asa, go e pe ta pap̃ai ko mau, e pe wo mari punue au: ma kinau tea suasua anigo a matau ki Yehovah pae ragi ni navei‐natureai‐ana aginau.

¹³E da pei tea noaana paki nawota aginau takana waina a mari a ragi waina Yesebel e mari punue profeta maga ki Yehovah, naga a dasuru ki profeta ki Yehovah naatam̃oli p̃onotia sikai kakada valea sikai, eu pei taua rualima lima go rualima lima, po pagani ra ki navinaga go ki noai, kite?

¹⁴Go ragi waia nigo ku naga, P̃a vano, p̃a noa ki nawota anigo naga, P̃a leo, Eliyah e doko nea: go ega wo mari punue au.

¹⁵Go Eliyah e naga, Yehovah ki taua maga e mauri, waina a lawodu naraena, go aga wo dum̃agu pisei ki nia au naaleatia waia.

¹⁶Go Obadiah e pano naga ega sua Ahab, go e noa ki nia asa: go Ahab e pano naga ega sua Eliyah.

¹⁷Go e pakilina ragi waina Ahab e punusi Eliyah, naga Ahab e noa ki nia, e naga, E pei nigo, nigo waina ku do mari duletulea ki Israel, kite?

¹⁸Go e pasadara, po naga, Kinau a da do mari duletulea ki Israel mau; ma e pei nigo go tea ni nasum̃a ki tamam̃a, nalakena ku doropusi natip̃akiana maga ki Yehovah, go ku dausi Baal maga.

¹⁹Nalakena tea wanogoe p̃a tip̃aki lua po piragi saisai ki Israel mamau puti umai punusi au tava Karmel, go profeta maga ki Baal p̃onotia pati rualima takuna lima, go profeta maga ki Asherah p̃onotia pati, waina eu ganikani wede ni nakaniana ki Yesebel.

²⁰Go Ahab e dip̃aki lua pano paki Israel natuna maga mamau puti, po piragi saisai ki profeta maga umai paki tava Karmel.

²¹Go Eliyah e paki m̃aladigi ki narei mamau puti, po naga, Nimu kuga wo do diwotiwo namidodoana namawota dua pa pa paki seve ragi? Yehovah e pe vei Sup̃e, kuga rausi a: ma e pe vei Baal, go kuga rausi a. Go narei maga eu da pasadara e te navasaana sikai mau.

²²Go Eliyah e noa ki narei maga, e naga, Kinau a masikinau doko waina a pei profeta ki Yehovah; ma profeta maga ki Baal eu pei naatam̃oli p̃onotia pati rualima takuna lima.

²³Nalakena tea wanogoe euga tua gida kau anoai ega rua; go euga matadoa sikai ega vei adeada, go euga taekotokotovi a, po doropusi a elagi ni nakau kokolo, po da dokoni nakapu asa mau: go kinau aga wo mari m̃ata ki kau anoai kerua, po doropusi a elagi ni nakau kokolo, po da dokoni nakapu asa mau.

²⁴Go nimu kuga soso nagisa ni sup̃e animu, go kinau aga wo soso nagisa ni Yehovah: go sup̃e waina ega wo pasadara pae nakapu vavaga, nae ega vei Sup̃e. Go narei mamau puti eu pasadara, po naga, E pei navasaana wia.

²⁵Go Eliyah e noa ki profeta maga ki Baal, e naga, Nimu kuga tum̃amu matadoa kau anoai sikai ega vei animu, po pea mari m̃ata ki nia; nalakena nimu ku laapa; go kuga soso nagisa ni sup̃e animu, ma kuga ta dokoni nakapu asa mau.

²⁶Go eu dape kau anoai waina e pei tea adeada, go eu mari m̃ata ki nia, po soso nagisa ni Baal pae malip̃ogi pa pa paki aleati, doko do naga, Baal O, p̃a vasadara gami. Ma nadaleo e dika, tea sikai e da pasadara mau. Go eu dam̃atam̃alua daliviri wede ni naviriana waina eu mari a.

²⁷Go e pakilina aleati matua naga Eliyah e mari saudoa ki da, e naga, Kuga vioso kasua: nalakena nae e pei sup̃e sikai; alagoro e do dam̃aniginigi, kite e paki te vatuna, kite e paki nasurataana sikai, kite alagoro e do maturu, go e one asa one naga ega vei tea vulevuleana.

²⁸Go eu pioso kasua, po dum̃ada dovae ra dapala natomariana adeada ki masimasi, go ki wola, pa pa nada e sara dave ara.

²⁹Go e doko, ragi waina e pei aleati matua, naga eu do peanoasai pa pa paki ragi ni navituaana ni naviriana ni ragi melu; ma nadaleo e dika, go tea sikai e da pasadara mau, kite midoa ki nia mau.

³⁰Go Eliyah e noa ki narei mamau, e naga, Kuga umai paki m̃aladigi kinau; go narei eu mamau puti paki m̃aladigi ki nia. Go e davagi piri wede ni naviriana ki Yehovah waina e pei tea rakaiana.

³¹Go Eliyah e dape vatu rualima sikai tamate dua, pataka ni naveveana ni naworawora maga ki Yakob natuna maga, waina navasaana ki Yehovah e umai paki nia, e naga, Israel ega vei nagisam̃a.

³²Go e davagi wede ni naviriana sikai ki vatu maga wanogoe doko nagisa ni Yehovah; go e kili nasalep̃ap̃a sikai dalivirigoro nalake ni wede ni naviriana, e pataka naga ega tape totowo ni napati ni korn ega rua.

³³Go e daua ki nakau kokolo, po daekotokotovi kau anoai, po doropusi a elagi ni nakau kokolo. Go e naga, Kuga vakavuro lasa ni noai ega vati po daki nia paki navituaana tap̃arakiana, go paki nakau kokolo.

³⁴Go e naga, Kuga mari a sala kerua; go eu mari a sala kerua. Go e naga, Kuga moro mari a sala ketolu. Go eu moro mari a sala ketolu.

³⁵Go noai e sara dalivirigoro wede ni naviriana; go e mari nasalep̃ap̃a e pura ki noai.

³⁶Go e pakilina ragi ni navituaana ni naviriana ni ragi melu, naga profeta Eliyah e paki m̃aladigi, po naga, Yehovah O, Sup̃e ki Abraham, ki Isaak, go ki Israel, ega vei tea ataeana naaleatia waia naga nigo ku pei Sup̃e doko Israel, go naga kinau a pei tea suasua anigo, go naga a po mari tea mamau puti waia pae navasaana anigo.

³⁷P̃a vasadara au, Yehovah O, p̃a vasadara au, naga narei waia euga atae naga nigo Yehovah, ku pei Sup̃e, go naga ku doa nap̃op̃oda e moro liliu.

³⁸Go nakapu ki Yehovah e dowo pae elagi umai, po gani navituaana tap̃arakiana, go nakau kokolo, go vatu maga, go nam̃otam̃ota, po menae noai waina e doko nasalep̃ap̃a.

³⁹Go ragi waina narei mamau eu punusi a, eu dowo dap̃olosiwo: go eu naga, Yehovah, nae e pei Sup̃e; Yehovah, nae e pei Sup̃e.

⁴⁰Go Eliyah e noa ki da, e naga, Kuga vuati profeta maga ki Baal; te sikai kakada ega ta sava pano mau. Go eu puati soki ra: go Eliyah e piragi ra siwo paki noaisara Kishon, po mari punuvunue ra tokora wanogoe.

⁴¹Go Eliyah e noa ki Ahab, e naga, P̃a sake pano, p̃a kanikani po munu; nalakena a dogo nasaruruana ni usa warua.

⁴²Go Ahab e sake pano naga ega kanikani po munu. Go Eliyah e sake paki nam̃asua ni tava Karmel pano; go e soki paki natano, e kusu po doro naraena paki namawota ni nap̃atuana dua.

⁴³Go e noa ki tea suasua aneana, e naga, P̃a sake pano ragi waia, p̃a leo paki natasi. Go e sake pano, po lolo, po naga, A da punusi te navatuna mau. Go e naga, P̃a moro pano ega vaka larua.

⁴⁴Go e pakilina sala kelarua naga e noa, P̃a leo, napopouru sikai e do sake m̃elu dua ki natasi, e kiki dakiusi nam̃elearu ni naatam̃oli. Go e naga, P̃a sake pano, p̃a noa ki Ahab, p̃a naga, P̃a mari m̃ata ki kariot anigo, go p̃a siwo pano naga usa ega ta dugoro ko mau.

⁴⁵Go e pakilina edaku ki ragi kiki naga nakoroatelagi e maligoligo p̃arua ki napopouru maga go nalagi, go usa e p̃owo p̃arua. Go Ahab e pagi kariot po paki Yesreel pano.

⁴⁶Go nam̃elearu ni Yehovah e doko Eliyah doko; go e dasoki namalona po sava pea ki Ahab pano paki malo duaduru ni Yesreel.