Read Nguna Togoa Etafe North 1 NAWOTA MAGA 19 Bible Online

1 NAWOTA MAGA 19 - Nguna Togoa Etafe North bible

1 NAWOTA MAGA 19

¹Go Ahab e noa ki Yesebel ki tea mamau puti waina Eliyah e mari ra, go takana waina e mari punuvunue profeta maga mamau puti ki lova.

²Go Yesebel e dip̃aki lua tea tautauana sikai pa punusi Eliyah, e naga, Sup̃e maga euga mari dapala nogoe paki nau, go euga moro mari a, a pe ta mari namauriana anigo e pe ta dapala namauriana adeada sikai kakada matamai ragi dapala nea.

³Go e mataku, go e duleana po pano raki namauriana aneana, go e umai paki Beer‐sheba waina e pei agi Yudah, po doropusi tea suasua aneana e doko tokora wanogoe doko.

⁴Ma nae e dum̃ana paki masop̃alo pano, nasurataana ni naaleatia sikai, go e umai po dasake melu ni nakau yuniper sikai: go e dum̃ana pavara naga ega mate; go e naga, E pei te lapa; ragi waia p̃a tape lua namauriana aginau Yehovah O; nalakena kinau ma a da p̃ia liu tamagu maga mau.

⁵Go e one po maturu melu ni nakau yuniper; go p̃a leo, agelo sikai e kisidogo e, po noa ki nia, e naga, P̃a toko leana, go p̃a kanikani.

⁶Go e leo, go p̃a leo, keke veniana sikai e doko nap̃irikia ni nap̃auna, go lasa ni noai sikai. Go e ganikani po munu, po moro one natano.

⁷Go agelo ki Yehovah e moro umai sala kerua, po moro kisidogo e, po naga, P̃a toko leana po ganikani; nalakena nasurataana e kasua ki‐go.

⁸Go e doko leana, po ganikani po munu, go e pano nakasuaana ni navinaga wanogoe naaleatia rualima pati go nap̃ogiana rualima pati paki Horeb tava ki Sup̃e.

⁹Go e umai paki asa paki valea sikai, po m̃enaki asa; go p̃a leo, navasaana ki Yehovah e umai paki nia, go e noa ki nia, e naga, Nigo ku do mari nasava nea, Eliyah?

¹⁰Go e naga, Kinau a magi Yehovah Sup̃e ki taua maga dotowo kasua p̃arua; nalakena Israel natuna maga eu doropusi navasasokiana anigo, po dakai wede ni naviriana anigo maga, go eu mari punuvunue profeta anigo maga ki lova: go kinau, kinau a masikigu doko; go eu laaga namauriana aginau naga euga tape lua e.

¹¹Go e naga, P̃a tave pano po lawodu tava narae ni Yehovah. Go p̃a leo, Yehovah e liu pano, go nalagi warua sikai go kasua e sui p̃orae tava maga, po mari p̃oroworosi vatu maga narae ni Yehovah; ma Yehovah e da doko nalagi mau: go edaku ki nalagi wanogoe, naruru sikai; ma Yehovah e da doko naruru mau:

¹²Go edaku ki naruru wanogoe, nakapu vavaga sikai; ma Yehovah e da doko nakapu vavaga mau: go edaku ki nakapu vavaga wanogoe, nadaleo matemate kiki sikai e pakilina.

¹³Go e doko, ragi waina Eliyah e dogo e, naga e kulutigoro naraena ki sugoro kovagoro aneana, po dave pano po lawodu malo duaduru ni valea. Go p̃a leo, nadaleo sikai e umai paki nia, po naga, Nigo ku do mari nasava nea, Eliyah?

¹⁴Go e naga, Kinau a magi Yehovah Sup̃e ki taua maga dotowo kasua p̃arua; nalakena Israel natuna maga eu doropusi navasasokiana anigo, po dakai wede ni naviriana anigo maga, go eu mari punuvunue profeta anigo maga ki lova; go kinau, kinau a masikigu doko; go eu laaga namauriana aginau naga euga tape lua e.

¹⁵Go Yehovah e noa ki nia, e naga, P̃a vano, p̃a liliu pae napua anigo pano paki masop̃alo ni Damaseko: go ragi waina p̃a vakilina asa, p̃a vuvurai ki Hasael naga ega vei nawota dap̃au Siria:

¹⁶Go p̃a vuvurai ki Yehu natu ni Nimshi naga ega vei nawota dap̃au Israel: go p̃a vuvurai ki Elisha natu ni Shafat ni Abel‐meholah, naga ega vei profeta du oli ko.

¹⁷Go ega wo pakilina naga tea waina e pe sava m̃elu dua ki lova ki Hasael, Yehu e pe wo mari punue a: go tea waina e pe sava m̃elu dua ki lova ki Yehu, Elisha e pe wo mari punue a.

¹⁸Ma aga wo maginau mauti naatam̃oli manu larua Israel, tea maga mamau puti waina eu da ditip̃atua paki Baal mau, go waina nagoleda eu da dum̃idum̃ili a mau.

¹⁹Go e m̃elu dua ki tokora wanogoe pano, po pap̃ai Elisha natu ni Shafat e do sisi natano ki oks rualima dua tamate pati, go e doko nap̃irikia ni tea rua kakada waina ero pei tea edaku ki da: go Eliyah e paki m̃aladigi ki nia, po nadi ki sugoro kovagoro aneana asa.

²⁰Go e doropusi oks maga po dausi Eliyah, go e naga, P̃a suasua, a pavara ni ko asa, naga aga ko pano dum̃ili tamagu go p̃ilagu, go edaku ki tea wanogoe aga wo dausi ko. Go e noa ki nia, e naga, P̃a vano: nalakena nigo ku atae nasava waina a mari a paki‐go.

²¹Go e m̃elu dua ki nia pano, po puati oks maga po mari punue ra, go e dape nakau ni nanoa maga po peni nap̃okasida asa, po dua narei asa, go nara eu ganikani. Go e duleana, po dausi Eliyah pano, po maneana suasua.