Read Nguna Togoa Etafe North 1 NAWOTA MAGA 2 Bible Online

1 NAWOTA MAGA 2 - Nguna Togoa Etafe North bible

1 NAWOTA MAGA 2

¹Go naaleatia maga ki David eu pei m̃aladigi naga ega mate; go e pasa parati ki natuna Solomon, e naga,

²Aga wo pae napua ni maramana mamau: nalakena tea wanogoe p̃a kasua, po dum̃am̃a pisei ki‐go naga ku pei naanoai;

³Go p̃a vavaigoro navasaparatikiana ki Yehovah Sup̃e anigo, po surata napua aneana maga, po pavaigoro natawonakiana aneana maga, go natip̃akiana aneana maga, go navasap̃otaeana aneana maga, go nanoasokisokiana aneana maga, ega tapala waina e pei tea midiriana doko nawotaeana ki Moses, naga p̃a risu p̃ia doko sara naleo waina p̃a mari ra, go sara tokora waina p̃a vaki asa:

⁴Naga Yehovah ega lawosoki navasaana aneana waina e pasa asa nalo kakagu, doko do naga, Natum̃a maga eu pe vavaigoro napua adeada, po surata naraegu doko nalomauana ki nap̃op̃oda mamau go ki naatada mamau, p̃a wo da dika (nae e noa e) te naatam̃oli sikai waina ega toko malo tasake ni Israel mau.

⁵Go ku moro atae tea waina Yoab natu ni Seruiah e mari a paki nau, go tea waina e mari a paki tea maraki dua ni taua maga ni Israel, paki Abner natu ni Ner, go paki Amasa natu ni Yether, waina e atugi ra, po daki nada ni navakalo doko ragi ni natam̃ateana, po moro mari nada ni navakalo e doko tasoki aneana waina e doko namalona, go doko nam̃elevasiana maga waina ero doko nam̃elena maga.

⁶Nalakana tea wanogoe p̃a mari ega vae namanumatuaana anigo, ma p̃a ta doropusi nap̃auna kapuara ega siwo paki Sheol natam̃ateana mau.

⁷Ma p̃a mari nawosiana lomau paki Barsillai naatam̃oli ni Cilead natuna maga, go p̃a suasua naga euga to ganikani wede ni nakaniana anigo: nalakena nara eu pea mari nawosiana lomau paki nau ragi waina kinau a sava dua ki taim̃a Absalom.

⁸Go p̃a leo, Shimei natu ni Cera ni naworawora ni Benyamin tea ni Bahurim, waina e pasa sa kinau ki navasasakiana warua sikai naaleatia waina a paki Mahanaim pano, nae e doko sikoti ko doko: ma ragi waina e siwo umai naga ega sua au Yordan, a pivisa paki nia pae nagisa ni Yehovah, a naga, Aga wo da mari punue ko ki lova mau.

⁹Nalakena tea wanogoe p̃a ta noa naga sogi e puoli ki nia mau, nalakena nigo ku pei naatam̃oli manumatua sikai; go p̃a wo atae tea waina e one ako one naga p̃a mari a paki nia, go p̃a mari nap̃auna kapuara ega siwo paki Sheol ega vilake nada.

¹⁰Go David e maturu sikoti tamana maga, po pei tea ovakiana natokoana ki David.

¹¹Go naaleatia maga ki David waina e maramara asa dap̃au Israel eu pei natau rualima pati: natau larua e maramara Hebron, go natau rualima dolu tamate dolu e maramara Yerusalem.

¹²Go Solomon e dasake malo tasake ki tamana David; go namarakiana aneana e pei tea lawosokiana e kasua p̃arua.

¹³Go Adoniyah natu ni Hakkith e umai punusi Bath‐sheba, Solomon p̃ilana. Go e naga, Ku umai natam̃ateana kite? Go e naga, Natam̃ateana.

¹⁴Go e moro naga, A peani navatuna sikai naga aga noa ki‐go asa. Go e naga, P̃a noa e.

¹⁵Go e naga, Ku atae naga namarakiana e pei tea aginau, go naga Israel mamau puti eu lawo ki naraeda paki nau eu midoa ki nia naga aga maramara: ma namarakiana e pei tea roaana po pei tea ki taigu: nalakena Yehovah e dua e asa naga ega vei tea aneana.

¹⁶Go ragi waia aga tatago ki natatagoana sikai paki‐go, p̃a ta karai asa mau. Go e noa ki nia, e naga, P̃a noa e.

¹⁷Go e naga, P̃a vasa paki nawota Solomon, a pavara ni ko asa, (nalakena ega wo da noa ee paki‐go mau), naga ega tua au Abishak nagoroi ni Shunem ega vei nagoroi aginau.

¹⁸Go Bath‐sheba e naga, E p̃ia; aga wo manigo pasa paki nawota.

¹⁹Nalakena tea wanogoe Bath‐sheba e pano punusi nawota Solomon, naga ega magi Adoniyah pasa paki nia. Go nawota e duleana naga ega sua e, go e kolo suai natano paki nia, po moro dasake malo tasake aneana, po noa naga tasake sikai ega magi nawota p̃ilana pei tea lawokiana; go e dasake doko taleva ni matuana.

²⁰Go e naga, Aga tatago ki natatagoana kiki sikai paki‐go; p̃a ta karai maginau mari a mau. Go nawota e noa ki nia, e naga, P̃ilagu, p̃a tatago asa: nalakena aga wo da mauti ko asa mau.

²¹Go e naga, P̃a suasua naga Abishak nagoroi ni Shunem ega vei tea vituakiana paki taim̃a Adoniyah naga ega vei anagoroi.

²²Go nawota Solomon e pasadara p̃ilana, po naga, Go ekasana ku do magi Adoniyah datago Abishak nagoroi ni Shunem? P̃a moro maneana datago namarakiana. Nalakena nae e pei taigu takalapa; go Abiathar tea viri, nara ma Yoab natu ni Seruiah ero pei aneana.

²³Go nawota Solomon e pivisa pae nagisa ni Yehovah, e naga, Sup̃e ega mari dapala nogoe paki nau, go ega moro mari a, Adoniyah e pe ta pasa navasaana wanogoe dum̃ana dip̃a namauriana aneana.

²⁴Nalakena tea wanogoe Yehovah e mauri, waina e lawosoki au, po lawo kinau a doko malo tasake ki tamagu David, go waina e maginau mari nasum̃a sikai dakiusi waina e noa e, Adoniyah ega wo pei tea maripunueana naaleatia waia.

²⁵Go nawota Solomon e dip̃aki lua Benaiah natu ni Yehoiada; go e dowo asa, go e mate.

²⁶Go nawota e noa ki Abiathar tea viri, e naga, P̃a vaki Anathoth pano paki vanua anigo maga; nalakena ku pataka ni namateana; ma aga wo da doropusi ko paki namateana sala waia mau, nalakena ku dapetape areka ki Yehovah Sup̃e kivea ki narae ni tamagu David, go nalakena ku sua sara namarisakiana maga waina tamagu e pea pei tea marisakiana asa.

²⁷Go dapala nogoe Solomon e kopasi lua Abiathar naga ega ta moro pei tea viri ki Yehovah mau; naga ega vakavuro navasaana ki Yehovah waina e pasa asa nalo ni nasum̃a ni Eli doko Shiloh.

²⁸Go narogorogoana kakana e umai paki Yoab: nalakena Yoab e maradoa paki Adoniyah, ma e da maradoa paki Absalom mau. Go Yoab e sava paki ekopu ni Tap̃aup̃au ki Yehovah, po puasoki napati maga ni wede ni naviriana.

²⁹Go eu noa ki nawota Solomon asa, eu naga, Yoab e po sava paki ekopu ni Tap̃aup̃au ki Yehovah; go p̃a leo, e du pisari wede ni naviriana. Go Solomon e dip̃aki lua Benaiah natu ni Yehoiada, e naga, P̃a vano, p̃a rowo asa.

³⁰Go Benaiah e paki ekopu ni Tap̃aup̃au ki Yehovah, po noa ki nia, e naga, Nawota e noa dapala nea, e naga, P̃a tave umai. Go e naga, Ee; ma aga wo mate nea. Go Benaiah e moro dape navasaana liliu paki nawota, e naga, Yoab e noa dapala nea, go e pasadara au dapala nea.

³¹Go nawota e noa ki nia, e naga, P̃a mari ega tapala waina e noa e, p̃a rowo asa, po ova ki nia; naga p̃a mari nada waina Yoab e daki nia nalakena e dika, ega m̃elu dua kinau pano, go ega m̃elu dua ki nasum̃a ki tamagu.

³²Go Yehovah ega mari nadana ega moro liliu paki nap̃auna, nalakena e dowo paki naatam̃oli dua waina ero leana po p̃ia liu sa, po atugi ra ki lova, go tamagu David e da atae a mau, ero pei Abner natu ni Ner, tea maraki taua ni Israel, go Amasa natu ni Yether, tea maraki taua ni Yudah.

³³Go dapala nogoe nadada ega wo liliu paki nap̃au ni Yoab, go paki nap̃au ni naworana maga pa pa ega tu du po du mau du: ma paki David, go paki naworana maga, go paki nasum̃a aneana, go paki malo tasake aneana, natam̃ateana ki Yehovah ega wo paki asa pa pa ega tu du po du mau du.

³⁴Go Benaiah natu ni Yehoiada e sake pano, po dowo asa, po mari punue a; go e pei tea ovakiana aneana nasum̃a masop̃alo.

³⁵Go nawota e lawo ki Benaiah natu ni Yehoiada e dap̃au taua ni navakalo du oli Yoab: go Sadok tea viri, nawota e lawo ki nia e du oli Abiathar.

³⁶Go nawota e pitip̃aki po soso Shimei umai, po noa ki nia, e naga, P̃a tum̃am̃a manigo davagi nasum̃a sikai Yerusalem, po doko asa doko, go p̃a ta m̃elu dua ki nia pano paki te tokora p̃ota mau.

³⁷Nalakena ega wo doko naga naaleatia waina ku pe tave pano po duagoto paki taleva ni noaisara Kidron, p̃a atae naga p̃a wo mate: go nadam̃a ega wo doko nap̃aum̃a.

³⁸Go Shimei e noa ki nawota, e naga, Navasaana wanogoe e p̃ia: dapala waina nawota aginau nawota e po noa e, dapala nogoe tea suasua anigo ega wo mari a. Go Shimei e doko Yerusalem doko naaleatia laapa.

³⁹Go e pakilina ragi waina natau dolu eu nopu, naga tea suasua dua ki Shimei ero sava pano po punusi Akish natu ni Maakah nawota ni Cath. Go eu noa ki Shimei asa, eu naga, P̃a leo, tea suasua anigo maga ero doko Cath.

⁴⁰Go Shimei e duleana, po sawa ki tea sawagoro nam̃adu ni ass aneana, po paki Cath pano punusi Akish, naga ega laaga tea suasua aneana maga: go Shimei e pano po piragi tea suasua aneana maga m̃elu dua ki Cath umai.

⁴¹Go eu noa ki Solomon naga Shimei e m̃elu dua ki Yerusalem po paki Cath pano, po moro liliu umai.

⁴²Go nawota e pitip̃aki po soso Shimei umai, po noa ki nia, e naga, Kinau a da mari ko naga ku pivisa pae nagisa ni Yehovah, go a da pasa parati ki‐go, doko do naga, P̃a atae naga naaleatia waina ku pe tave pano po surata paki te tokora, p̃a wo mate, kite? Go nigo ku noa kinau, ku naga, Navasaana waina a dogo e, e p̃ia.

⁴³Go ekasana ku da pavaigoro navivisaana anigo paki Yehovah, go natip̃akiana waina a pasa parati ki‐go asa?

⁴⁴Go nawota e moro noa ki Shimei, e naga, Nigo ku atae sara nasigisigileoana waina nap̃op̃om̃a e atae a, waina ku mari a paki tamagu David: nalakena tea wanogoe Yehovah ega wo mari nasigisigileoana anigo ega liliu paki nap̃aum̃a.

⁴⁵Ma nawota Solomon ega wo pei tea vasap̃iakiana, go malo tasake ki David ega wo pei tea lawosokiana doko narae ni Yehovah pa pa ega tu du po du mau du.

⁴⁶Go nawota e dip̃aki Benaiah natu ni Yehoiada; go e dave pano, po dowo asa, go e mate. Go namarakiana e pei tea lawosokiana doko nam̃elearu ni Solomon.