Read Nguna Togoa Etafe North 1 NAWOTA MAGA 20 Bible Online

1 NAWOTA MAGA 20 - Nguna Togoa Etafe North bible

1 NAWOTA MAGA 20

¹Go Ben‐hadad nawota ni Siria e piragi saisai ki taua mamau ni naatam̃oli navakalo aneana: go nawota rualima dolu tamate dua eu sikoti a, go horse maga go kariot maga: go e sake pano po kelugoro Samaria, po mari navakalo dip̃a e.

²Go e dip̃aki lua tea tautauana maga paki natokoana pa punusi Ahab nawota ni Israel, po noa ki nia, e naga, Ben‐hadad e noa dapala nea, e naga,

³Silver anigo go kold anigo ero pei tea aginau; go nagoroi anigo maga go natum̃a maga, tea raewia maga nara ma eu pei tea aginau.

⁴Go nawota ni Israel e pasadara, po naga, Ega tapala navasaana anigo, nawota aginau, nawota O; kinau a pei tea anigo, go tea mamau puti waina a peani a.

⁵Go tea tautauana maga eu moro umai, po naga, Ben‐hadad e noa dapala nea, e naga, A dip̃aki lua po noa ki‐go, a naga, P̃a tua au silver anigo, go kold anigo, go nagoroi anigo maga, go natum̃a maga;

⁶Ma matamai ragi dapala nea, aga wo dip̃aki lua tea suasua aginau maga pa punusi ko, go euga wo leo pavaraka nasum̃a anigo, go nasum̃a maga ki tea suasua anigo maga; go ega wo doko, naga tea waina e pei tea masauniana namatada maga, euga wo nadi ki nam̃elearuda asa, po dape lua e pano.

⁷Go nawota ni Israel e soso saisai ki tea matua maga mamau puti ni navanua, po naga, Kuga midoaki soki a, a pavara ni mu asa, po punusi takana waina naatam̃oli waia e do laaga namarisakiana: nalakena e dip̃aki lua umai punusi au naga aga tua e nagoroi aginau maga, go natugu maga, go silver aginau, go kold aginau; go a da dugoro e asa mau.

⁸Go tea matua maga go narei eu mamau puti noa ki nia, eu naga, P̃a ta dogo parati ki nia mau, go p̃a ta suasua asa mau.

⁹Nalakena tea wanogoe e noa ki tea tautauana maga ki Ben‐hadad, e naga, Kuga noa ki nawota, nawota aginau, kuga naga, Tea maga mamau puti waina ku pea dip̃aki lua umai datagovi tea suasua anigo asa, aga wo mari a: ma tea waia aga ta mari a mau. Go tea tautauana maga eu liliu, po maneana dape navasaana pano.

¹⁰Go Ben‐hadad e dip̃aki lua pa punusi a, po naga, Sup̃e maga euga mari dapala nogoe, go euga moro mari a, nam̃otam̃ota ni Samaria e pe vataka naga ega vakavuro nam̃elearu maga ni narei mamau puti waina eu do dausi au.

¹¹Go nawota ni Israel e pasadara, po naga, Kuga noa ki nia, kuga naga, Naatam̃oli waina e do dum̃ana dasoki a ki nalikau aneana maga, ega ta dum̃ana pakavakae mau dapala naatam̃oli waina e do sawo lua e.

¹²Go e pakilina, ragi waina Ben‐hadad e dogo navitaua wanogoe, ragi waina e doko munu nara ma nawota maga ekopu ni tap̃aup̃au maga, naga e noa ki tea suasua aneana maga, e naga, Kuga tum̃amu lawo ki mu. Go eu dum̃ada lawo ki da dip̃a natokoana.

¹³Go p̃a leo, profeta sikai e umai punusi Ahab nawota ni Israel, po naga, Yehovah e noa dapala nea, e naga, Ku punusi taua warua waia, kite? P̃a leo, aga wo pitua ki da paki nam̃elearum̃a naaleatia waia; go p̃a wo atae naga kinau a pei Yehovah.

¹⁴Go Ahab e naga, Sei ega wo mari a? Go e naga, Yehovah e noa dapala nea, e naga, Natureai maga ki tea maraki maga ni navanua maga. Go e naga, Sei ega wo pea ki navakalo? Go e pasadara, po naga, Nigo.

¹⁵Go e peve natureai maga ki tea maraki maga ni navanua maga, go eu pei naatam̃oli p̃onotia dua rualima takuna dolu tamate dua: go edaku ki da e peve narei ni Israel natuna maga mamau puti, eu pei naatam̃oli manu larua.

¹⁶Go eu dave pano aleati matua. Ma Ben‐hadad e doko munu po matamaloku asa ekopu ni tap̃aup̃au maga, nara ma nawota maga, nawota rualima dolu tamate dua waina eu silae a doko.

¹⁷Go natureai maga ki tea maraki maga ni navanua maga eu pea dave pano; go Ben‐hadad e dip̃aki lua pano, go eu noa ki nia, eu naga, Naatam̃oli maga eu dave m̃elu Samaria umai.

¹⁸Go e naga, Eu pe tave umai raki natam̃ateana, kuga vuati ra euga mauri; kite eu pe tave umai raki navakalo, kuga vuati ra euga mauri.

¹⁹Go tea maga wanogoe eu dave m̃elu dua ki natokoana pano, natureai maga ki tea maraki maga ni navanua maga, go taua ni naatam̃oli navakalo waina eu dausi ra.

²⁰Go eu atugi naatam̃oli sikasikai sarasara ra: go tea ni Siria eu sava pano, go tea ni Israel eu sava dausi ra: go Ben‐hadad nawota ni Siria e sava pano e sakesaake horse, nara ma tea sakesaake horse maga eu mamau.

²¹Go nawota ni Israel e dave pano, po atugi horse maga go kariot maga, po mari punuvunue tea ni Siria ki naatugiana warua sikai.

²²Go profeta waina e umai punusi nawota ni Israel, go e noa ki nia, e naga, P̃a vano, p̃a tum̃am̃a mari ko p̃a kasua, po midoakiusiusi m̃ata ki tea waina p̃a wo mari a: nalakena ragi ni naliliuana ni natau, nawota ni Siria ega wo sake umai dip̃a ko.

²³Go tea suasua maga ki nawota ni Siria eu noa ki nia, eu naga, Sup̃e adeada e pei sup̃e ni tava maga; nalakena tea wanogoe eu kasua liu gida: ma tuga marimari dip̃a ra malo matemate, go lomau tuga wo kasua liu ra.

²⁴Go p̃a mari tea waia; p̃a viragi lua nawota maga, sara naata sikasikai, m̃elu dua ki naliada, go p̃a lawo ki tea maraki maga euga tu oli ra:

²⁵Go p̃a manigo peve parati ki taua naatam̃oli navakalo sikai, pataka ni taua naatam̃oli navakalo waina ku pea peani a ma eu dowo, horse ega oli horse, go kariot ega oli kariot: go tuga wo marimari dip̃a ra malo matemate, go lomau tuga wo kasua liu ra. Go e dogo parati ki nadaleoda, po mari dapala nogoe.

²⁶Go e pakilina doko ragi ni naliliuana ni natau, naga Ben‐hadad e piragi saisai ki tea ni Siria maga, po sake paki Afek pano, naga ega mari navakalo dip̃a Israel.

²⁷Go Israel natuna maga eu pei tea viragi‐saisai‐kiana, go eu dua ra navinaga, go eu dave pano dip̃a ra: go Israel natuna maga eu sike tap̃aup̃au adeada kivea ki da, eu dakiusi navata kiki dua ni naninani maga; ma tea ni Siria maga eu pakavuro navanua.

²⁸Go naatam̃oli sikai ki Sup̃e e paki m̃aladigi, po pasa paki nawota ni Israel, po naga, Yehovah e noa dapala nea, e naga, Nalakena tea ni Siria maga eu noa naga Yehovah e pei sup̃e sikai ni tava maga, ma e da pei sup̃e sikai ni nap̃aloa maga mau; nalakena tea wanogoe aga wo pitua ki taua warua waia paki nam̃elearum̃a, go kuga wo atae naga kinau a pei Yehovah.

²⁹Go eu sike tap̃aup̃au adeada maga, eu dum̃ada leana dip̃a ra, doko naaleatia larua. Go e doko naga naaleatia kelarua eu mari navakalo; go Israel natuna maga eu atugi tea ni Siria naatam̃oli manu p̃onotia sikai waina eu surata, naaleatia sikai maau.

³⁰Ma namagovai waina eu ko doko eu mamau sava paki Afek pano, po sili natokoana; go p̃aaka kakana e sokigoro naatam̃oli tivilia dua go manu takuna larua. Go Ben‐hadad e sava pano paki natokoana, po sili paki em̃ago tukituki sikai ni nasum̃a sikai.

³¹Go tea suasua aneana maga eu noa ki nia, eu naga, P̃a leo, au dogo naga nawota maga ni nasum̃a ni Israel eu pei nawota maritadodomi maga: au pavara ni ko, p̃a suasua ki gami naga auga tum̃agami dasoki namalogami ki nakulukulu ni sak, go namea maga euga toko nap̃au gami, go auga tave pano punusi nawota ni Israel: mase e pe wo mauti ko p̃a mauri.

³²Go dapala nogoe eu dasoki namaloda ki nakulukulu ni sak, go namea maga eu doko nap̃auda, go eu rumai punusi nawota ni Israel, po naga, Tea suasua anigo Ben‐hadad e naga, P̃a suasua, a pavara ni ko asa, naga aga mauri. Go e naga, Nae e ko mauri doko, kite?

³³Nae e pei taigu. Go naatam̃oli maga wanogoe eu leosoki a, po m̃araverave dogo naga e pe vei nap̃op̃ona; go eu naga, Io, taim̃a, Ben‐hadad. Go e naga, Kuga vano, po piragi a umai. Go Ben‐hadad e umai punusi a; go e mari a e pagi sake kariot.

³⁴Go Ben‐hadad e noa ki nia, e naga, Natokoana maga waina tamagu e pualua ra m̃elu dua ki tamam̃a, aga wo liliua ki da; ma p̃a tum̃am̃a mari napua maga Damaseko dapala waina tamagu e mari ra Samaria. Go Ahab e naga, Go aga wo dua ko navasasokiana waia po dip̃aki lua ko pano. Go e mari navasasokiana sikai paki nia po dip̃aki lua e pano.

³⁵Go naatam̃oli sikai, profeta natuna maga sikai kakada, e noa ki tea ni m̃aladigi ki nia pae navasaana ki Yehovah, e naga, P̃a atugi au, a pavara ni ko asa. Ma naatam̃oli wanogoe e da suasua naga ega atugi a mau.

³⁶Go e noa ki nia, e naga, Nalakena ku da dogo parati ki nadaleo ni Yehovah mau, p̃a leo, ragi waina p̃a wo m̃elu dua kinau pano, laion sikai ega wo kati punue ko. Go ragi waina e m̃elu dua ki nia pano, laion sikai e sua e po kati punue a.

³⁷Go e pap̃ai naatam̃oli p̃ota sikai, po naga, P̃a atugi au, a pavara ni ko asa. Go naatam̃oli wanogoe e atugi a, doko do p̃okawokati a e pei wotu.

³⁸Go profeta wanogoe e pano po doko raki nawota napua, doko do pivigoro naraena ki nakulukulu vivivi sikai po p̃ilip̃o.

³⁹Go ragi waina nawota e do liu pano, e pioso paki nawota: go e naga, Tea suasua anigo e dave pano paki m̃aleoputo ni navakalo; go p̃a leo, naatam̃oli sikai e liliu, po piragi naatam̃oli sikai umai punusi au, po naga, P̃a vavaigoro naatam̃oli waia: e pe vuoli te nalakena sikai, namauriana anigo e pe wo suruoli namauriana aneana, kite p̃a wo pakotovi a ki talenta sikai ni silver.

⁴⁰Go ragi waina tea suasua anigo e do mari gonakona tokora waia go tokora wanana, e puoli. Go nawota ni Israel e noa ki nia, e naga, Navasap̃otae‐ko‐ana ega tapala nogoe; ku dum̃am̃a noa p̃otae a.

⁴¹Go e mari m̃araverave po peresi lua nakulukulu vivivi m̃elu dua ki namatana; go nawota ni Israel e leoatae a naga e pei profeta maga sikai kakada.

⁴²Go e noa ki nia, e naga, Yehovah e noa dapala nea, e naga, Nalakena ku da pavaigoro naatam̃oli waina a dip̃akotovi a paki namari‐puolikiana, go ku suasua naga ega vuoli m̃elu dua ki nam̃elearum̃a, nalakena tea wanogoe namauriana anigo ega wo suruoli namauriana aneana, go narei anigo oli narei aneana.

⁴³Go nawota ni Israel e paki nasum̃a aneana pano, naraena e datanako go e dogokitesa p̃arua, go e paki Samaria pano.