Read Nguna Togoa Etafe North 1 NAWOTA MAGA 21 Bible Online

1 NAWOTA MAGA 21 - Nguna Togoa Etafe North bible

1 NAWOTA MAGA 21

¹Go e pakilina edaku ki tea maga wanogoe, naga Naboth tea ni Yesreel e peani roara ni vaine sikai waina e doko Yesreel, e doko m̃aladigi ki nasum̃a ni navei‐nawotaana ki Ahab nawota ni Samaria.

²Go Ahab e pasa paki Naboth, po naga, P̃a tua au roara ni vaine anigo naga aga veani a ega vei roara sikai ni tea lawoana, nalakena e pei m̃aladigi ki nasum̃a aginau; go aga wo dua ko roara ni vaine sikai waina ega wia liu sa: kite ku pe midoa ki nia naga e p̃ia, a pe wo dua ko totowo ni m̃ane waina ega vatakana.

³Go Naboth e noa ki Ahab, e naga, Ega toko uvea kinau naga aga tua ko tea veani‐pioli‐kiana ki tamagu maga.

⁴Go Ahab e paki ekopu ni nasum̃a aneana, naraena e datanako go e dogokitesa p̃arua nalakena navasaana waina Naboth tea ni Yesreel e noa ki nia asa: waina e naga, Aga wo da dua ko tea veani‐pioli‐kiana ki tamagu maga mau. Go e one nawewele aneana, po doa naraena, go e karai ganikani.

⁵Ma anagoroi Yesebel e umai punusi a, po noa ki nia, e naga, Ekasana naatam̃a e dogokitesa, dapala waina ku karai ganikani?

⁶Go e noa ki nia, e naga, Nalakena a pasa paki Naboth tea ni Yesreel po noa ki nia, a naga, P̃a tua au roara ni vaine anigo raki m̃ane; kite ku pe midoa ki nia naga e p̃ia, a pe wo dua ko roara ni vaine p̃ota sikai ega oli a: go e pasadara, po naga, Aga wo da dua ko roara ni vaine aginau mau.

⁷Go anagoroi Yesebel e noa ki nia, e naga, Nigo ku da maramara dap̃au namarakiana ni Israel, kite? P̃a tuleana po ganikani, go nap̃op̃om̃a ega marasike: kinau aga wo dua ko roara ni vaine ki Naboth tea ni Yesreel.

⁸Go e midiri tusi maga pae nagisa ni Ahab, po pulusoki ra ki tea vulusoki aneana, po dip̃aki lua tusi maga wanogoe pano paki tea matua maga go paki navarapule maga waina eu doko natokoana aneana doko, waina nara ma Naboth eu mamau doko.

⁹Go e midiri doko tusi maga wanogoe, e naga, Kuga rogorogo ki navaliana sikai, po sike Naboth ega vakilagi m̃aleoputo ni narei:

¹⁰Go kuga lawo ki naatam̃oli dua, tea p̃arop̃aro maga, eroga toko naraena, naga eroga noasokisoki dip̃a e, doko do naga, Nigo ku pasa sa ki Sup̃e go nawota. Go kuga tapetape a pano, po nadi a ki vatu, naga ega mate.

¹¹Go naatam̃oli maga ni natokoana aneana, tea matua maga go navarapule maga waina eu doko natokoana aneana doko, eu mari pataka ni tea waina Yesebel e dip̃aki da asa, dapala waina e pei tea midiriana tusi maga waina e dip̃aki lua ra pano paki da.

¹²Eu dogorogo ki navaliana sikai, po sike Naboth e pakilagi m̃aleoputo ni narei.

¹³Go naatam̃oli dua, tea p̃arop̃aro maga, ero umai po dasake doko kivea ki nia: go naatam̃oli dua wanogoe ero noasokisoki dip̃a e, dip̃a Naboth nogo, narae ni narei, ero naga, Naboth e pasa sa ki Sup̃e go nawota. Go eu dapetape a pano paki etaku ni natokoana, po nadi a ki vatu, go e mate.

¹⁴Go eu dip̃aki lua po noa ki Yesebel, eu naga, Naboth e pei tea nadiana ki vatu, go e mate.

¹⁵Go e pakilina, ragi waina Yesebel e dogo naga Naboth e pei tea nadiana ki vatu, go e mate, naga Yesebel e noa ki Ahab, e naga, P̃a tuleana, p̃a tape po peani roara ni vaine ki Naboth tea ni Yesreel, waina e da suasua dua ko asa raki m̃ane: nalakena Naboth e da moro mauri mau, ma e mate sua.

¹⁶Go e pakilina ragi waina Ahab e dogo naga Naboth e mate sua, naga Ahab e duleana po siwo paki roara ni vaine ki Naboth tea ni Yesreel pano, naga ega tape a po peani a.

¹⁷Go navasaana ki Yehovah e umai paki Eliyah tea ni Tishbe, e naga,

¹⁸P̃a tuleana, p̃a siwo pano naga p̃a sua Ahab nawota ni Israel waina e doko Samaria doko: p̃a leo, e doko roara ni vaine ki Naboth, tokora waina e siwo paki asa pano naga ega tape a po peani a.

¹⁹Go p̃a noa ki nia, p̃a naga, Yehovah e noa dapala nea, e naga, Nigo ku mari punue, go ku moro dape peani, kite? Go p̃a noa ki nia, p̃a naga, Yehovah e noa dapala nea, e naga, Tokora waina koria maga eu menamenae nada ni Naboth asa, tokora wanogoe koria maga euga moro menamenae nadam̃a asa.

²⁰Go Ahab e noa ki Eliyah, e naga, Ku po pap̃ai au, nigo tea kokona kinau O, kite? Go e pasadara, po naga, A po pap̃ai ko: nalakena ku dum̃am̃a sori ko naga p̃a mari tea waina e sa namata ni Yehovah.

²¹P̃a leo, aga wo mari nasaana ega vakilina ki‐go, go aga wo sasara lua puti ko, go aga wo daelua sara naanoai m̃elu dua ki Ahab, tea waina e pei naviti, go tea waina e dum̃ana doko, usuraki Israel mamau.

²²Go aga wo mari nasum̃a anigo ega tapala nasum̃a ki Yeroboam natu ni Nebat, go ega tapala nasum̃a ki Baasha natu ni Ahiyah, nalakena namari‐p̃auluuluana waina ku mari p̃auluulu asa po mari au a maeto, go nalakena ku mari Israel eu mari naleo sa.

²³Go Yehovah e moro pasa nalo ni Yesebel, e naga, Koria maga euga wo gani Yesebel navanua ni Yesreel.

²⁴Tea ki Ahab waina e mate natokoana, koria maga euga wo gani a; go tea waina e mate namalasi, manu maga ni namalopa euga wo gani a.

²⁵(Ma tea sikai waina e dakiusi Ahab e dika, waina e dum̃ana sori a naga ega mari tea waina e sa namata ni Yehovah, waina anagoroi Yesebel e maridie a asa.

²⁶Go e mari namariana mamaragokiana maga, doko do dausi nasup̃e maga, pataka ni tea mamau puti waina naworawora ni Amor eu pea mari a, nara waina Yehovah e nadi ki lua ra pa dua ki narae ni Israel natuna maga pano.)

²⁷Go e pakilina, ragi waina Ahab e dogo navasaana maga wanogoe, naga e puap̃orae sugoro aneana maga, po suni nakulukulu ni sak, po pali, po one natano one e pilake nakulukulu ni sak, po dum̃ana doro e pakitano.

²⁸Go navasaana ki Yehovah e umai paki Eliyah tea ni Tishbe, e naga,

²⁹Ku punusi takana waina Ahab e dum̃ana doro e pakitano naraegu, kite? Nalakena e dum̃ana doro e pakitano naraegu, aga wo da piragi nasaana umai naaleatia aneana maga mau: ma naaleatia maga ki natuna, aga wo piragi nasaana umai paki nasum̃a aneana.