Read Nguna Togoa Etafe North 1 NAWOTA MAGA 22 Bible Online

1 NAWOTA MAGA 22 - Nguna Togoa Etafe North bible

1 NAWOTA MAGA 22

¹Go eu maromaro natau dolu masale ki navakalo namawota ni Siria go ni Israel.

²Go e pakilina natau ketolu, naga Yehoshafat nawota ni Yudah e siwo umai punusi nawota ni Israel.

³Go nawota ni Israel e noa ki tea suasua aneana maga, e naga, Nimu ku da atae naga Ramoth‐cilead e pei tea anigida, kite? Go tu punuta doko, po da pualua e m̃elu dua ki nam̃elearu ni nawota ni Siria mau!

⁴Go e noa ki Yehoshafat, e naga, Nigida toroga rua paki Ramoth‐cilead po mari navakalo, kite? Go Yehoshafat e noa ki nawota ni Israel, e naga, Toroga rua asa, go narei aginau ma narei anigo, go horse aginau maga ma horse anigo maga.

⁵Go Yehoshafat e noa ki nawota ni Israel, e naga, Ma tea vea, a pavara ni ko asa, p̃a vusuusu ki navasaana ki Yehovah.

⁶Go nawota ni Israel e piragi saisai ki profeta maga, eu alagoro pei naatam̃oli p̃onotia pati, po noa ki da, e naga, Aga vano po mari navakalo dip̃a Ramoth‐cilead, kite aga toko? Go eu naga, P̃a sake pano; nalakena Yehovah ega wo pitua ki nia paki nam̃elearu ni nawota.

⁷Ma Yehoshafat e naga, Profeta sikai ki Yehovah e da doko nea mau, naga tuga vusuusu paki nia, kite?

⁸Go nawota ni Israel e noa ki Yehoshafat, e naga, Naatam̃oli sikai e doko, Mikaiah natu ni Imlah, waina tu mariatae pusuusu paki nia ki Yehovah: ma kinau a pilosi a; nalakena nae e da mari naveanoasaiana wia nalo kakagu te ragi mau, ma e mari tea waina e sa. Go Yehoshafat e naga, Nawota ega ta pasa dapala nogoe mau.

⁹Go nawota ni Israel e soso tasiga sikai umai punusi a, po naga, P̃a mari m̃araverave po piragi Mikaiah natu ni Imlah umai punusi au.

¹⁰Go nawota ni Israel go Yehoshafat nawota ni Yudah ero dasake doko malo tasake ni navei‐nawotaana adeada, sikai e doko aneana, go sikai e doko aneana, ero suni sugoro maga ni navei‐nawotaana adeada, ero doko lina sikai malo duaduru ni namata‐pua ni Samaria; go profeta maga eu mamau puti peanoasai naraeda.

¹¹Go Sedekiah natu ni Kenaanah e dum̃ana maneana mari napati maga ni airon, po naga, Yehovah e noa dapala nea, e naga, Pae tea maga waia p̃a wo dip̃a tea ni Siria pa pa euga vei tea maripuoli‐kiana sua.

¹²Go profeta maga eu mamau puti peanoasai, eu naga, P̃a sake paki Ramoth‐cilead pano, po marimatua: nalakena Yehovah ega wo pitua ki nia paki nam̃elearu ni nawota.

¹³Go tea tautauana waina e pano naga ega soso Mikaiah umai punusi a, e noa ki nia, e naga, P̃a leo, navasaana ki profeta maga e noasai tea waina e p̃ia paki nawota, ki nawoka sikai maau: navasaana anigo ega tapala navasaana adeada sikai kakada, go p̃a noa tea waina e p̃ia.

¹⁴Ma Mikaiah e naga, Yehovah e mauri, tea waina Yehovah ega noa kinau asa, tea wanogoe aga wo noa e.

¹⁵Go ragi waina e umai punusi nawota, nawota e noa ki nia, e naga, Mikaiah, auga vano po mari navakalo dip̃a Ramoth‐cilead, kite auga toko? Go e noa ki nia, e naga, Kuga sake pano po marimatua; go Yehovah ega wo pitua ki nia paki nam̃elearu ni nawota.

¹⁶Go nawota e noa ki nia, e naga, Paka visa aga wo pasa parati ki‐go naga p̃a vivisa pae nagisa ni Yehovah naga p̃a ta noa kinau te navatuna waina e da pei nalomauana mau?

¹⁷Go e naga, A punusi Israel mamau puti eu pei daperavera tava maga, dakiusi shiip waina tea leo parati ki da e dika: go Yehovah e naga, Tea maga wanogoe eu dika ki tea maraki; euga liliu sara naata sikasikai paki nasum̃a adeada maga pano doko natam̃ateana.

¹⁸Go nawota ni Israel e noa ki Yehoshafat, e naga, Kinau a da noa ki‐go naga ega wo da peanoasai tea waina e p̃ia nalo kakagu mau, ma tea waina e sa, kite?

¹⁹Go Mikaiah e naga, Nalakena tea wanogoe p̃a rogo navasaana ki Yehovah: A punusi Yehovah e dasake doko malo tasake aneana, go taua mamau ni nakoroatelagi eu lawodu nap̃irikiana, taleva ni matua go taleva ni mawiri.

²⁰Go Yehovah e naga, Sei ega wo pasa surusurue Ahab, naga ega sake pano po mate Ramoth‐cilead? Go tea sikai e noa dapala waia; go tea p̃ota sikai e noa dapala wanana.

²¹Go naatana sikai e dave umai, po lawodu narae ni Yehovah, po naga, Kinau aga wo pasa surusurue a.

²²Go Yehovah e noa ki nia, e naga, P̃a wo mari a ega tapale sava? Go e naga, Aga wo dave pano, go aga wo pei naatana sorosoro sikai nawoka ni profeta aneana maga mamau puti. Go e naga, P̃a vasa surusurue a, go p̃a wo marimatua: p̃a vano, po mari ega tapala nogoe.

²³Nalakena tea wanogoe, p̃a leo, Yehovah e doropusi naatana sorosoro sikai e doko nawoka ni profeta anigo maga mamau puti waia; go Yehovah e pasa ki tea waina e sa nalo kakam̃a.

²⁴Go Sedekiah natu ni Kenaanah e paki m̃aladigi, po dapagi nap̃oro ni Mikaiah, po naga, Naata ni Yehovah e m̃elu au pano dapale sava, naga ega vasa paki‐go?

²⁵Go Mikaiah e naga, P̃a leo, p̃a wo punusi a naaleatia waina p̃a wo sili paki em̃ago tukituki sikai naga p̃a tokoloku asa.

²⁶Go nawota ni Israel e naga, Kuga vuati Mikaiah po piragi a pano punusi Amon tea maramara ni natokoana, go Yoash natu ni nawota;

²⁷Po naga, Nawota e noa dapala nea, e naga, Kuga toropusi naatam̃oli waia ega toko ekopu ni nasum̃a ni navavaiana, po pagani a ki navinaga ni narogokitesaana go ki noai ni narogokitesaana, pa pa aga wo umai natam̃ateana.

²⁸Go Mikaiah e naga, Ku pe liliu umai natam̃ateana, go Yehovah e pe ta pasa pae nawokagu mau. Go e naga, Kuga rogo, narei maga, nimu narei mamau puti.

²⁹Go nawota ni Israel go Yehoshafat nawota ni Yudah ero sake paki Ramoth‐cilead pano.

³⁰Go nawota ni Israel e noa ki Yehoshafat, e naga, Aga wo dum̃agu mari au aga vilip̃o, po paki navakalo pano; ma nigo p̃a suni sugoro anigo maga. Go nawota ni Israel e dum̃ana mari a e pilip̃o, po paki navakalo pano.

³¹Go nawota ni Siria e dip̃aki tea maraki aneana rualima dolu tamate dua waina eu maraki dap̃au kariot aneana maga, e naga, Kuga ta marimari dip̃a tea vakitano kite tea vakilagi mau, ma dip̃a nawota ni Israel ega sikina.

³²Go e pakilina, ragi waina tea maraki maga ni kariot maga eu punusi Yehoshafat, naga eu noa, Lomau e pei nawota ni Israel; go eu dalivirigoro e naga euga mari a: go Yehoshafat e kuapioso.

³³Go e pakilina, ragi waina tea maraki maga ni kariot maga eu leoatae a naga e da pei nawota ni Israel mau, go eu liliu po da moro kopasi a mau.

³⁴Ma naatam̃oli sikai e dipe dago, po dipe p̃ai nawota ni Israel namawota ni naweluki ni sugoro ni vatu aneana: nalakena tea wanogoe e noa ki tea wowolau ni kariot aneana, e naga, P̃a roa nam̃elearum̃a, po dape lua au m̃elu dua ki taua ni navakalo pano; nalakena a dogokitesa p̃arua.

³⁵Go navakalo wanogoe e disu po p̃arua naaleatia wanogoe: go nawota e doko leana doko kariot aneana narae ni tea ni Siria pa pa paki ragi melu, go e mate: go nadana e sara dave m̃elu wotu aneana paki m̃aleoputo ni kariot.

³⁶Go naviosoana sikai e pano usuraki taua navakalo ragi ni elo musu, e naga, Sara naatam̃oli euga vaki natokoana adeada pano, go sara naatam̃oli euga vaki navanua adeada pano.

³⁷Go nawota e mate, po pei tea tapetapeana umai paki Samaria; go eu ova ki nawota Samaria.

³⁸Go eu sarue kariot luku noai ni Samaria; go koria maga eu menamenae nadana; (go tokora wanogoe tea masausara maga eu loloso asa;) pataka ni navasaana ki Yehovah waina e pasa asa.

³⁹Go nawosiana mamau puti ki Ahab, go tea mamau puti waina e mari a, go nasum̃a ni napati ni elefant waina e davagi a, go natokoana maga mamau puti waina e davagi ra, eu da pei tea midiriana tusi ni nawosiana ni naaleatia maga ki nawota maga ni Israel, kite?

⁴⁰Go Ahab e maturu sikoti tamana maga; go natuna Ahasiah e moro maramara du oli a.

⁴¹Go Yehoshafat natu ni Asa e pae asa maramara dap̃au Yudah natau kevati ki Ahab nawota ni Israel.

⁴²Yehoshafat e pei tea ni natau rualima dolu tamate lima ragi waina e pae asa maramara; go e maramara Yerusalem natau rualima dua tamate lima. Go p̃ilana nagisana Asubah, Shilhi natuna nagoroi.

⁴³Go e surata napua maga mamau puti ki tamana Asa; e da dawasi m̃elu dua ki nia mau, ma e mari tea waina e leana namata ni Yehovah: ma tokora vakilagi maga eu da pei tea tapeluaana pano mau; narei eu ko do mari naviriana maga po do dap̃ara ki tea ni nap̃o wia tokora vakilagi maga.

⁴⁴Go Yehoshafat e mari natam̃ateana sikoti nawota ni Israel.

⁴⁵Go nawosiana maga ki Yehoshafat, go nakasuaana aneana waina e pisei ki nia, go takana waina e mari navakalo, eu da pei tea midiriana tusi ni naaleatia maga ki nawota maga ni Yudah, kite?

⁴⁶Go namagovai ni tea masausara maga waina eu ko doko naaleatia maga ki tamana Asa, e mari puoli ki da m̃elu dua ki navanua.

⁴⁷Go nawota sikai e dika Edom: tea maramara sikai e oli nawota.

⁴⁸Yehoshafat e mari rarua maga ni Tarshish naga euga vaki Ofir pano raki kold: ma eu da pano mau; nalakena rarua maga wanogoe eu mawora Esion‐keber.

⁴⁹Go Ahasiah natu ni Ahab e noa ki Yehoshafat, e naga, Tea suasua aginau maga go tea suasua anigo maga euga mamau pae rarua maga pano. Ma Yehoshafat e da suasua asa mau.

⁵⁰Go Yehoshafat e maturu sikoti tamana maga, po pei tea ovakiana sikoti tamana maga natokoana ki tamana David: go natuna Yehoram e moro maramara du oli a.

⁵¹Ahasiah natu ni Ahab e pae asa maramara Samaria dap̃au Israel natau kerualima sikai tamate larua ki Yehoshafat nawota ni Yudah, go e maramara dap̃au Israel natau dua.

⁵²Go e mari tea waina e sa namata ni Yehovah, po surata napua ki tamana go napua ki p̃ilana, go napua ki Yeroboam natu ni Nebat, waina e mari Israel eu mari naleo sa.

⁵³Go e magi Baal suasua, po lotu ki nia, pataka ni tea mamau puti waina tamana e pea mari a, po mari Yehovah Sup̃e ki Israel e maeto.