Read Nguna Togoa Etafe North 1 NAWOTA MAGA 3 Bible Online

1 NAWOTA MAGA 3 - Nguna Togoa Etafe North bible

1 NAWOTA MAGA 3

¹Go Solomon e mari navasasokiana sikai sikoti Faraoh nawota ni Ityipt, po dawiri Faraoh natuna nagoroi, po piragi a paki natokoana ki David pano, pa pa ega tavagi sua nasum̃a aneana, go nasum̃a ki Yehovah, go p̃aaka ni Yerusalem daliviri.

²Go narei eu mari naviriana maga tokora vakilagi maga, nalakena te nasum̃a sikai e ko da pei tea tavagiana agi nagisa ni Yehovah mau pa pa paki naaleatia maga wanogoe.

³Go Solomon e dodomi Yehovah, doko do surata pae natawonakiana maga ki tamana David: ma e mari naviriana maga po dap̃ara ki tea ni nap̃o wia tokora vakilagi maga.

⁴Go nawota e paki Cibeon pano naga ega mari naviriana tokora wanogoe; nalakena tokora wanogoe e pei tokora vakilagi liu: Solomon e pitua ki naviriana tap̃arakiana manu sikai wede ni naviriana wanogoe.

⁵Go Yehovah e pakilina ki Solomon Cibeon pae nap̃erea sikai p̃ogi: go Sup̃e e naga, Pa tatago tea waina aga tua ko asa.

⁶Go Solomon e naga, Ku mari nadodomiana warua paki tea suasua anigo tamagu David, nalakena e surata naraem̃a doko naveilomauana, go namarinaleoleanaana, go naleanaana ni nap̃op̃ona paki‐go; go ku maneana pavaigoro nadodomiana warua sikai, ku dua e natuna naanoai sikai naga ega tasake malo tasake aneana, dapala waina e doko naaleatia waia.

⁷Go Yehovah Sup̃e aginau O, ku mari tea suasua anigo e pei nawota du oli tamagu David: ma kinau a pei piakiki sikai; a da atae takana waina aga tave pano kite sili umai mau.

⁸Go tea suasua anigo e doko m̃aleoputo ni narei anigo waina ku matadoa ra, narei warua sikai, waina eu mari sap̃o pei tea taki‐parati‐kiana kite tea veve‐atae‐ana nalakena nalaapaana.

⁹Nalakena tea wanogoe p̃a tua tea suasua anigo p̃op̃o midoakiatae sikai, naga aga vasa p̃otae narei anigo, go naga aga midoaki p̃otae tea waina e p̃ia go tea waina e sa; nalakena sei e mariatae pasa p̃otae narei warua anigo waia?

¹⁰Go navasaana wanogoe e p̃ia namata ni Yehovah, waina Solomon e datago naleo wanogoe.

¹¹Go Sup̃e e noa ki nia, e naga, Nalakena ku datago naleo wanogoe, go ku da dum̃am̃a manigo datago namauriana varau mau; go ku da dum̃am̃a manigo datago nasogolapaana mau, kite namauriana ki tea kokona ki‐go maga mau; ma ku dum̃am̃a manigo datago namidoakiataeana, naga p̃a midoaki p̃otae navasap̃otaeana;

¹²Pa leo, aga wo mari ega tapala navasaana anigo: p̃a leo, aga wo dua ko p̃op̃o manumatua go midoaki atae sikai; dapala waina naata sikai waina e dakiusi ko e da doko pea ki‐go mau, go naata sikai waina e dakiusi ko ega wo da duleana edaku ki‐go mau.

¹³Go aga wo moro dua ko tea waina ku da datago asa mau, nasogolapaana go nadodomadaganiana, dapala waina nawota maga te sikai kakada ega wo da dakiusi ko mau, naaleatia anigo maga mamau puti.

¹⁴Go ku pe surata napua aginau maga, po pavaigoro natawonakiana aginau maga, go natip̃akiana aginau maga, dakiusi waina tamam̃a David e pea surata asa, a pe wo mari naaleatia anigo maga eu pe wo laapa.

¹⁵Go Solomon e darapa, go p̃a leo, e pei nap̃erea sikai. Go e umai paki Yerusalem, po lawodu narae ni areka ni navasasokiana ki Yehovah, go e pitua ki naviriana tap̃arakiana maga, go naviriana maga ni natam̃ateana, go e magi tea suasua aneana maga mari nakaniana sikai.

¹⁶Go nagoroi masausara dua ero umai punusi nawota, po lawodu naraena.

¹⁷Go nagoroi dua wanogoe sikai kakada e naga, Nawota aginau O, kinami ma nagoroi waia aro dua doko nasum̃a sikai maau doko; go kinami aro dua puti pisola doko nasum̃a.

¹⁸Go e pakilina naaleatia ketolu edaku ki waina kinau a pisola sua, naga nagoroi waia nae ma e moro pisola; go aro dua doko; go te naata p̃ota sikai e da doko sikoti gami doko nasum̃a mau, ma kinami aro dua maau doko nasum̃a.

¹⁹Go nagoroi waia natuna e mate p̃ogi; nalakena e one punue a.

²⁰Go e duleana p̃ogi matua, po dape lua piakiki aginau waina e doko nap̃irikiagu, ragi waina kinau tea suasua nagoroi anigo a maturu, po lesi a e one narum̃ana, go e lesi piakiki mate aneana e one narum̃agu.

²¹Go ragi waina a duleana malip̃ogi naga aga vakasusu ki piakiki aginau, p̃a leo, e po mate: go ragi waina a leousiusi a malip̃ogi, p̃a leo, e da pei natugu waina a dape a mau.

²²Go nagoroi kerua e naga, Ee; ma tea waina e mauri e pei natugu, go tea waina e mate e pei natum̃a. Go nagoroi vea e naga, Ee; ma tea waina e mate e pei natum̃a, go tea waina e mauri e pei natugu. Go ero dua pasa dapala nogoe narae ni nawota.

²³Go nawota e naga, Sikai e naga, Tea waina e mauri e pei natugu, ma tea waina e mate e pei natum̃a; go kerua e naga, Ee, ma tea waina e mate e pei natum̃a, go tea waina e mauri e pei natugu.

²⁴Go nawota e naga, Kuga maginau dape lova sikai umai. Go eu dape lova sikai umai paki narae ni nawota.

²⁵Go nawota e naga, Kuga tae p̃orae piakiki mauri ega rua asa, po dua sikai taleva sikai, go kerua taleva kerua.

²⁶Go nagoroi waina e pei p̃ila ni piakiki mauri e pasa paki nawota, nalakena e dodomi p̃arua ki natuna, go e naga, Nawota aginau O, p̃a tua e piakiki mauri, go ega ta pei tea maripunueana mau. Ma kerua e naga, Ega wo da pei tea aginau kite tea anigo mau; kuga tae p̃orae a.

²⁷Go nawota e pasadara po naga, Kuga tua nagoroi vea piakiki mauri, go kuga ta mari punue a mau: nalakena nae e pei p̃ilana.

²⁸Go Israel mamau eu dogo navasap̃otaeana waina nawota e pasa p̃otae asa; go eu matau ki nawota: nalakena eu punusi naga namanumatuaana ki Sup̃e e doko asa doko, naga ega mari navasap̃otaeana.