Read Nguna Togoa Etafe North 1 NAWOTA MAGA 6 Bible Online

1 NAWOTA MAGA 6 - Nguna Togoa Etafe North bible

1 NAWOTA MAGA 6

¹Go e pakilina natau p̃onotia kevati rualima takuna latolu, edaku ki waina Israel natuna maga eu m̃elu dua ki navanua ni Ityipt umai, doko natau kevati ni namaramaraana ki Solomon waina e maramara dap̃au Israel, doko atelagi ni Siv waina e pei atelagi kerua, naga e pae asa davagi nasum̃a ki Yehovah.

²Go nasum̃a waina nawota Solomon e magi Yehovah davagi a, navarauana kakana e pei kubit rualima latesa, go naweleweleana kakana e pei kubit rualima dua, go navakilagiana kakana e pei kubit rualima dolu.

³Go natara‐taup̃a waina e doko nadigi ni tokora tapu ni nasum̃a, navarauana kakana e pei kubit rualima dua, e pataka sikai ma naweleweleana ni nasum̃a; go naweleweleana kakana e pei kubit rualima sikai kivea ki nasum̃a.

⁴Go e mari namata leo maga ni nasum̃a eu duruturua.

⁵Go e davagi tagona maga eu dip̃a soki namalo maga ni nasum̃a daliviri, eu dalivirigoro puti nasum̃a go tokora tapu: go e mari em̃ago kirikiri maga daliviri namalo maga ni nasum̃a.

⁶Tagona ni etano mau naweleweleana kakana e pei kubit elima, tea ni m̃aleoputo naweleweleana kakana e pei kubit elatesa, go ketolu naweleweleana kakana e pei kubit elarua: e mari tagona visarasara maga daliviri namalo ni nasum̃a naga natokai maga euga ta pei tea turisokiana paki namalo maga ni nasum̃a mau.

⁷Go ragi waina nasum̃a e do pei tea tavagiana, eu davagi a ki vatu waina eu dae leana ki sua e pae tokora maga waina vatu e doko asa: go nadaleo ni hammer kite karau kite te navatuna ni airon waina e pei tea ni nawosiana, e da pei tea rogoana doko nasum̃a mau, ragi waina e do pei tea tavagiana.

⁸Namata sili ni tagona ni etano e doko taleva ni matua ni nasum̃a: go eu sake pae napua vavadu sake paki em̃ago maga ni tagona ni m̃aleoputo, go eu dave pae tea ni m̃aleoputo maga po sake paki tagona ketolu.

⁹Go dapala nogoe e davagi nasum̃a po mari sua e; go e dap̃augoro nasum̃a ki natokai maga go ki napapa maga ni sidar.

¹⁰Go e davagi tagona maga eu dip̃a soki namalo ni nasum̃a mamau, navakilagiana kakana maga eu sikasikai pei kubit elima: go eu dasake doko napapa sidar dip̃a namalo ni nasum̃a.

¹¹Go navasaana ki Yehovah e umai paki Solomon,

¹²e naga, Nalo ni nasum̃a waia waina ku do davagi a, ku pe surata natawonakiana aginau maga, po mari navasap̃otaeana aginau maga, po pavaigoro natip̃akiana aginau maga mamau puti, po surata ara; a pe wo lawosoki navasaana aginau paki‐go, waina a noa ki tamam̃a David asa.

¹³Go aga wo doko m̃aleoputo ni Israel natuna maga doko, go aga wo da doropusi narei aginau Israel mau.

¹⁴Go Solomon e davagi nasum̃a wanogoe po mari sua e.

¹⁵Go e sikegoro ekopu ni namalo maga ni nasum̃a ki napapa maga ni sidar; pae etano ni nasum̃a paki elagi ni namalo maga ni nasum̃a, e kovagoro ra ekopu ki napapa: go e kovagoro etano ni nasum̃a ki napapa maga ni paine.

¹⁶Go doko kiedaku e davagi ekopu ni nasum̃a kubit rualima dua ki napapa maga ni sidar pae etano paki elagi ni namalo maga ni nasum̃a: e davagi tea wanogoe ekopu, ega vei tokora tapu sikai, tokora tapu liu.

¹⁷Go nasum̃a tapu, waina e doko kivea ki tokora tapu wanogoe, navarauana kakana e pei kubit rualima pati.

¹⁸Go sidar maga waina eu doko ekopu ni nasum̃a, eu pei tea taeana eu pei midimidiria maga, eu pei kolopulopu maga go napum̃a vukep̃ora maga: tea mamau puti eu pei sidar; te vatu sikai e da pei tea vunusiana asa mau.

¹⁹Go e mari m̃ata ki tokora tapu sikai doko m̃aleoputo ni ekopu ni nasum̃a, naga euga toropusi areka ni navasasokiana ki Yehovah ega toko asa.

²⁰Go tokora tapu wanogoe ekopu kakana navarauana kakana e pei kubit rualima dua, go naweleweleana kakana e pei kubit rualima dua, go navakilagiana kakana e pei kubit rualima dua; go e pulutigoro e ki kold tautau: go e dap̃augoro wede ni naviriana ki sidar.

²¹Go Solomon e pulutigoro ekopu ni nasum̃a ki kold tautau: go e puagoro tokora tapu ki namori maga ni kold tautau, po pulutigoro e ki kold.

²²Go e pulutigoro nasum̃a mamau ki kold, pa pa nasum̃a mamau e nopu; go wede ni naviriana mamau waina e pei tea ni tokora tapu, e moro pulutigoro e ki kold.

²³Go e mari kerub dua ki nakau oliva ekopu ni tokora tapu, navakilagiana kakada ero sikasikai pei kubit rualima sikai.

²⁴Go kerub sikai nalivaruna sikai e pei kubit elima, go nalivaruna kerua e pei kubit elima: pae namatap̃ago ni nalivaruna sikai paki namatap̃ago ni nalivaruna kerua e pei kubit rualima sikai.

²⁵Go kerub kerua e pei kubit rualima sikai: kerub dua wanogoe ero pei totowo sikai maau go ero pataka sikai.

²⁶Navakilagiana ni kerub sikai e pei kubit rualima sikai, go kerub kerua e moro dakiusi a.

²⁷Go e lawo ki kerub maga ero doko em̃ago tapu ni nasum̃a: go kerub dua wanogoe nalivaruda eu pei tea vitosiana, dapala waina kerub sikai nalivaruna sikai e dip̃a dogo namalo ni nasum̃a taleva sikai, go kerub kerua nalivaruna sikai e dip̃a dogo namalo ni nasum̃a taleva kerua; go nalivaruda maga ero dum̃ada dip̃a dogo ra m̃aleoputo ni nasum̃a.

²⁸Go e pulutigoro kerub maga ki kold.

²⁹Go e dae midimidiria usuraki namalo maga ni nasum̃a daliviri, ki nunu ni kerub maga go ni nakau paama maga, go ni napum̃a vukep̃ora maga, em̃ago tapu go em̃ago mamau.

³⁰Go e pulutigoro etano ni ekopu ni nasum̃a ki kold, em̃ago tapu go em̃ago mamau.

³¹Go e mari namata maga ki nakau oliva eu pei namata sili maga paki tokora tapu: nakau walagoto ni namata go nakautu maga eu pei matele kelima ni namalo ni nasum̃a.

³²E mari namata dua ki nakau oliva; go e tae midimidiria nunu ni kerub maga ara go nakau paama maga go napum̃a vukep̃ora maga, po pulutigoro ra ki kold; go e pulutigoro kerub maga go nakau paama maga ki kold.

³³Go e moro mari nakautu maga ki nakau oliva agi namata sili ni nasum̃a tapu, e pei matele kevati ni namalo ni nasum̃a;

³⁴Go namata dua ki nakau paine; go namata sikai edua asa e pei tea lugi‐p̃osae‐ana, go namata kerua e moro dua asa po moro pei tea lugi‐p̃osae‐ana.

³⁵Go e dae midiri nunu ni kerub maga ara, go nakau paama maga go napum̃a vukep̃ora maga: go e pulutigoro ra ki kold pataka ni midiria maga.

³⁶Go e mari roara waina e doko m̃aleoputo e pei ovara dolu ki vatu taem̃atakiana maga, go ovara sikai ki natokai ni sidar maga.

³⁷E pei natau kevati waina laketano ni nasum̃a ki Yehovah e pei tea toropusiana, doko atelagi ni Siv.

³⁸Go natau kerualima sikai tamate sikai, doko atelagi ni Bul waina e pei atelagi kelatolu, nasum̃a e pei tea mari‐sua‐ana usuraki sara matele kakana maga, dapala naleo‐dawonakiana kakana. Go e p̃osiwosi ki nia natau larua.