Read Nguna Togoa Etafe North 1 NAWOTA MAGA 8 Bible Online

1 NAWOTA MAGA 8 - Nguna Togoa Etafe North bible

1 NAWOTA MAGA 8

¹Go Solomon e piragi saisai ki tea matua maga ni Israel, go nap̃au maga mamau puti ni naworawora maga, tea maraki maga ni nasum̃a maga ni tamada maga ni Israel natuna maga, eu rumai punusi nawota Solomon Yerusalem, naga euga tape umai areka ni navasasokiana ki Yehovah m̃elu dua ki Sion, natokoana ki David.

²Go naatam̃oli maga ni Israel eu dum̃ada saisai ki da umai punusi nawota Solomon doko nasaisaiana tatutakiana atelagi Ethanim, waina e pei atelagi kelarua.

³Go tea matua maga ni Israel eu mamau puti umai, go tea viri maga eu pauvausi areka.

⁴Go eu pauvausi areka ki Yehovah, go tap̃aup̃au ni nasaisaiana, go lasa tapu maga mamau puti waina eu doko ekopu ni Tap̃aup̃au; go tea maga wanogoe tea viri maga go naworawora ni Levi eu dape ra sake umai.

⁵Go nawota Solomon go nasaisaiana mamau ni Israel waina eu saisai umai punusi a, eu mamau doko narae ni areka, doko do mari naviriana ni shiip maga go ni oks maga, waina eu mari sap̃o pei tea noaana kite veve‐atae‐ana nalakena nalaapaana.

⁶Go tea viri maga eu pauvausi areka ni navasasokiana ki Yehovah paki naliana, paki ekopu ni tokora tapu ni nasum̃a, paki tokora tapu liu, etano ni kerub maga nalivaruda maga.

⁷Nalakena kerub maga ero pitosi nalivaruda maga dap̃au tokora waina areka e doko asa, go kerub maga ero kovagoro areka go nakau vavau kakana maga elagi.

⁸Go nakau vavau maga wanogoe ero parau liu dapala waina namatap̃ago ni nakau vavau maga ero pei tea vunusiana tokora tapu liu narae ni tokora tapu; ma ero da pei tea vunusiana katama mau: go ero doko tokora wanogoe doko pa pa paki naaleatia waia.

⁹Te navatuna e da doko ekopu ni areka mau, ma vatu welewelea dua ero sikida waina Moses e doro ra asa Horeb, ragi waina Yehovah e mari navasasokiana sikai paki Israel natuna maga, ragi waina eu m̃elu dua ki navanua ni Ityipt umai.

¹⁰Go e pakilina, ragi waina tea viri maga eu dave pae tokora tapu liu umai, naga napopouru e pakavuro nasum̃a ki Yehovah.

¹¹Go tea viri maga eu mari sa lawodu mau naga euga mari nawosiana ni nasuasuaana nalakena napopouru wanogoe: nalakena nasamasamaana ni Yehovah e pakavuro nasum̃a ki Yehovah.

¹²Go Solomon e pasa, po naga, Yehovah e noa sua naga ega wo doko namaligo wono doko.

¹³Ma kinau a po manigo davagi nasum̃atokoana sikai, tokora sikai waina p̃a toko asa doko pa pa ega tu du po du mau du.

¹⁴Go nawota e dum̃ana doa e, po pasa p̃ia ki nasaisaiana mamau ni Israel: go nasaisaiana mamau ni Israel eu lawodu.

¹⁵Go e naga, Yehovah, Sup̃e ki Israel, ega vei tea vasap̃iakiana, waina e pasa pae nawokana paki tamagu David, po pakavuro e ki nam̃elearuna,

¹⁶doko do naga, Pae naaleatia waina a piragi lua narei aginau Israel m̃elu dua ki Ityipt umai pa pa, a da matadoa te natokoana sikai m̃elu naworawora maga mamau puti ni Israel mau, naga ega tavagi nasum̃a sikai asa, naga nagisagu ega toko asa; ma a matadoa David naga ega maraki dap̃au narei aginau Israel.

¹⁷Go e doko nap̃op̃o ni tamagu David naga ega tavagi nasum̃a sikai agi nagisa ni Yehovah, Sup̃e ki Israel.

¹⁸Ma Yehovah e noa ki tamagu David, e naga, Tea waina e doko nap̃op̃om̃a naga p̃a tavagi nasum̃a sikai agi nagisagu, e p̃ia naga e doko nap̃op̃om̃a:

¹⁹Ma nigo p̃a wo da davagi nasum̃a wanogoe mau; ma natum̃a waina ega wo dave m̃elu nawarem̃a umai, nae ega wo davagi nasum̃a wanogoe agi nagisagu.

²⁰Go Yehovah e pakavuro navasaana aneana waina e noa e; nalakena kinau a lawodu oli tamagu David, po dasake malo tasake ni navei‐nawota‐ana ni Israel, dapala waina Yehovah e noa e, go a po davagi nasum̃a wanogoe agi nagisa ni Yehovah, Sup̃e ki Israel.

²¹Go tokora wanogoe a po mari tokora sikai agi areka asa, waina navasasokiana ki Yehovah e doko asa, waina e mari a paki tamagida maga ragi waina e piragi lua ra m̃elu dua ki navanua ni Ityipt umai.

²²Go Solomon e lawodu kivea ki wede ni naviriana ki Yehovah narae ni nasaisaiana mamau ni Israel, po darasike nam̃elearuna maga paki nakoroatelagi:

²³Go e naga, Yehovah, Sup̃e ki Israel O, te Sup̃e sikai dakiusi ko e dika nakoroatelagi ni elagi, go maramana ni etano; ku do pavaigoro navasasokiana go nadodomiana paki tea suasua anigo maga waina eu do surata naraem̃a ki nap̃op̃oda mamau:

²⁴Ku pavaigoro parati ki nasaiana anigo paki tea suasua anigo tamagu David: ku pasa ki nawokam̃a, go ku pakavuro e ki nam̃elearum̃a, dapala waina e doko naaleatia waia.

²⁵Nalakena tea wanogoe, Yehovah, Sup̃e ki Israel O, p̃a vavaigoro nasaiana anigo waina ku mari a paki tea suasua anigo tamagu David, doko do naga, Naatam̃oli anigo sikai ega wo da dika naraegu mau waina ega tasake malo tasake ni navei‐nawota‐ana ni Israel, natum̃a maga eu pe vavaigoro napua adeada, naga euga to surata naraegu dapala waina nigo ku surata asa naraegu.

²⁶Go nalakena tea wanogoe, Sup̃e ki Israel O, a pavara ni ko asa, navasaana anigo waina ku pasa asa paki tea suasua anigo tamagu David, ega vei tea lawosokiana.

²⁷Ma Sup̃e ega wo doko maramana doko lomau kite? P̃a leo, nakoroatelagi go nakoroatelagi ni nakoroatelagi maga eu da patakam̃a mau; go nasum̃a waia waina kinau a po davagi a, e po kiki sa!

²⁸Ma p̃a midoaki natapasavasaana ki tea suasua anigo, go navavaraniana aneana, Yehovah Sup̃e aginau O, naga p̃a taki dorogo paki naviosoana go paki natapasavasaana ki tea suasua anigo waina e do dapasavasa asa naraem̃a naaleatia waia:

²⁹Naga namatam̃a eroga to leo paki nasum̃a waia p̃ogi go aleati, paki tokora waina ku naga, Nagisagu ega wo doko asa: naga p̃a taki dorogo paki natapasavasaana maga waina tea suasua anigo ega wo dapasavasa asa tokora waia.

³⁰Go p̃a taki dorogo paki navavaraniana ki tea suasua anigo, go ki narei anigo Israel, ragi waina nara euga wo dapasavasa asa tokora waia: p̃a rogo e nakoroatelagi, tokora tokoana anigo; go ragi waina p̃a rogo e, p̃a madeada midoakikorokoro ra.

³¹Te naata e pe mari naleo sa dip̃a tea ni m̃aladigi ki nia, go navivisaana sikai e pe vei tea toropusiana asa naga ega mari a naga ega vivisa, go e pe umai po pivisa narae ni wede ni naviriana anigo doko nasum̃a waia:

³²P̃a rogo e nakoroatelagi, po mari, po pasa p̃otae tea suasua anigo maga, doko do dip̃akotovi tea sigisigileo naga namariana aneana ega liliu paki nap̃auna; go doko do mari leana ki tea waina e leana, po dua e ega vae namarinaleoleanaana aneana.

³³Narei anigo Israel eu pe vei tea atugiana eu pe rowo narae ni tea kokona, nalakena eu pe mari naleo sa dip̃a ko; eu pe moro maradoa paki‐go, po noasai nagisam̃a, po dapasavasa po mari navavaraniana paki‐go nasum̃a waia:

³⁴P̃a rogo e nakoroatelagi, po magi narei anigo Israel midoakikorokoro namarinaleosaana adeada, po moro piragi liliua ki da umai paki navanua waina ku dua tamada maga asa.

³⁵Nakoroatelagi e pe vei tea kokoroana, go usa e pe tika, nalakena eu pe mari naleo sa dip̃a ko; eu pe tapasavasa paki tokora waia, po noasai nagisam̃a, po maradoa m̃elu dua ki namarinaleosaana adeada, ragi waina ku pe varati ra:

³⁶P̃a rogo e nakoroatelagi, po magi tea suasua anigo maga go magi narei anigo Israel midoakikorokoro namarinaleosaana adeada, ragi waina p̃a vasa pisei ki da napua wia waina euga surata asa; po pitua ki usa paki navanua anigo, waina ku dua narei anigo asa naga ega vei naveanipiolikiana sikai.

³⁷Navitoloana e pe toko navanua, kite nasasanaana sa, kite namakukuana kite navusivusigaana, kite midiri kite uraasi; tea kokona ki da e pe kelugoro ra te natokoana ni navanua adeada; te namarisakiana e pe toko, kite te nasasanaana e pe toko;

³⁸Te natapasavasaana go te navavaraniana waina te naata e pe mari a, kite narei anigo Israel eu pe mamau puti mari a, waina sara naata euga sikasikai atae narogokitesaana ni nap̃op̃oda, po sai ki nam̃elearuda maga paki nasum̃a waia:

³⁹P̃a rogo e nakoroatelagi, tokora waina ku doko asa, po madeada midoakikorokoro, po mari, po lagati dua sara naatam̃oli ega vae namariana adeada maga, waina nigo ku atae nap̃op̃oda; (nalakena nigo, go nigo sikim̃a, ku atae nap̃op̃o ni naatam̃oli natuna maga mamau puti;)

⁴⁰Naga euga matau ki‐go, sara naaleatia maga waina eu mauri doko navanua waina ku dua tamagami maga asa.

⁴¹Go nalo ni nam̃enaki waina e da pei tea ni nalauna anigo Israel mau, ragi waina e pe m̃elu dua ki navanua ni uvea sikai umai nalakena nagisam̃a;

⁴²(Nalakena euga wo dogo narogorogoana ni nagisam̃a warua, go ni nam̃elearu kasua anigo, go ni naru saikiana anigo;) ragi waina e pe umai po dapasavasa paki nasum̃a waia;

⁴³P̃a rogo e nakoroatelagi, tokora waina ku doko asa, po mari ega vataka ni tea mamau puti waina nam̃enaki wanogoe e pe tatagovi ko asa; naga nalauna maga mamau puti ni maramana euga atae nagisam̃a, naga euga matau ki‐go, dapala waina narei anigo Israel eu matau ki‐go, go naga euga atae naga nasum̃a waia waina a po davagi a, e pei tea salagisana ki nagisam̃a.

⁴⁴Narei anigo eu pe tave paki navakalo pano dip̃a tea kokona ki da, pae te napua waina ku pe tip̃aki lua ra eu pe vae asa pano, go eu pe tapasavasa ki Yehovah paki natokoana waia waina ku matadoa e, go paki nasum̃a waina a po davagi a naga nagisam̃a ega toko asa doko:

⁴⁵P̃a rogo natapasavasaana adeada go navavaraniana adeada nakoroatelagi, po mari navululuana adeada.

⁴⁶Eu pe mari naleo sa dip̃a ko, (nalakena te naata e da dika namarinaleosaana mau,) go ku pe maeto ki da, po pitua ki da paki tea kokona ki da, dapala waina eu pe viragi lua pavakoto ara pano paki navanua ki tea kokona ki da, e pe toko uvea kite e pe toko m̃aladigi;

⁴⁷Ma eu pe tum̃ada midoakiusiusi ra doko navanua waina eu pe vei tea viragi‐lua‐pavakotoana paki asa pano, po moro maradoa, po mari navavaraniana paki‐go navanua ki tea maga waina eu piragi lua pavakoto ara, doko do naga, Au mari naleo sa, po mari dagele, au mari nasigisigileoana;

⁴⁸Eu pe liliu paki‐go ki nap̃op̃oda mamau go ki naatada mamau doko navanua ki tea kokona ki da maga, waina eu piragi lua pavakoto ara, po dapasavasa ki‐go paki navanua adeada waina ku dua tamada maga asa, natokoana waina ku matadoa e, go nasum̃a waina a davagi a naga nagisam̃a ega toko asa doko:

⁴⁹P̃a rogo natapasavasaana adeada go navavaraniana adeada nakoroatelagi tokora waina ku doko asa, po mari navululuana adeada;

⁵⁰Po magi narei anigo midoakikorokoro namarinaleosaana adeada maga waina eu mari naleo sa asa dip̃a ko, go sara natapiriana adeada maga waina eu mari a e sa paki‐go; po maritadodomi ra narae ni tea maga waina eu piragi lua pavakoto ara, naga nara ma euga moro maritadodomi ra:

⁵¹Nalakena eu pei narei anigo, go tea veanipiolikiana anigo, waina ku piragi lua ra m̃elu dua ki Ityipt umai, pa dua ki m̃aleoputo ni upu ni nakapu vavaga ni airon:

⁵²Naga namatam̃a eroga to leo paki navavaraniana ki tea suasua anigo, go paki navavaraniana ki narei anigo Israel, naga p̃a taki dorogo paki da ragi waina euga vioso paki‐go.

⁵³Nalakena ku mari masale ki da m̃elu dua ki nalauna maga mamau puti ni maramana, naga euga vei tea veanipiolikiana anigo, dapala waina ku pasa asa pae nam̃elearu ni tea suasua anigo Moses, ragi waina ku piragi lua tamagami maga m̃elu dua ki Ityipt umai, Yehovah Sup̃e O.

⁵⁴Go e pakilina, ragi waina Solomon e dapasavasa sua ki natapasavasaana go ki navavaraniana mamau wanogoe paki Yehovah, naga e duleana m̃elu dua ki narae ni wede ni naviriana ki Yehovah, tokora waina e ditip̃atua asa, nam̃elearuna maga ero pei tea saikiana paki nakoroatelagi.

⁵⁵Go e lawodu, po pasa p̃ia ki nasaisaiana mamau ni Israel ki nadaleo kasua sikai,

⁵⁶e naga, Yehovah ega vei tea vasap̃iakiana, waina e pitua ki namaromaroana paki narei aneana Israel, pataka ni nasaiana aneana mamau puti: te navasaana sikai e da dowo mau nalo ni nasaiana wia aneana, waina e noa e pae nam̃elearu ni tea suasua aneana Moses.

⁵⁷Yehovah Sup̃e anigida ega sikoti gida doko, ega tapala waina e pea sikoti tamagida maga doko: ega ta doropusi gida mau, kite puoli ki gida mau:

⁵⁸Naga ega kerea ki nap̃op̃ogida paki nia, naga tuga surata pae napua aneana maga mamau puti, po pavaigoro natip̃akiana aneana maga, go natawonakiana aneana maga, go navasap̃otaeana aneana maga, waina e dip̃aki tamagida maga asa.

⁵⁹Go navasaana aginau maga waia, waina a pavara asa narae ni Yehovah, euga toko m̃aladigi ki Yehovah Sup̃e anigida aleati go p̃ogi, naga ega mari navululuana ki tea suasua aneana, go navululuana ki narei aneana Israel, ega vataka ni sara naaleatia ega sikasikai:

⁶⁰Naga nalauna maga mamau puti ni maramana euga atae naga Yehovah, nae e pei Sup̃e; tea p̃ota e dika.

⁶¹Nalakena tea wanogoe nap̃op̃omu euga wia usuraki paki Yehovah Sup̃e anigida, naga kuga surata natawonakiana aneana maga, go naga kuga vavaigoro natip̃akiana aneana maga, dapala waina e doko naaleatia waia.

⁶²Go nawota ma Israel mamau eu pitua ki naviriana narae ni Yehovah.

⁶³Go Solomon e pitua ki naviriana ni navituaana maga ni natam̃ateana, waina e pitua ki nia narae ni Yehovah, oks tivilia dua go manu dua, go shiip manu p̃onotia sikai go manu rualima dua. Go dapala nogoe nawota ma Israel natuna maga mamau puti eu dapugoro nasum̃a ki Yehovah.

⁶⁴Naaleatia sikai maau wanogoe nawota e dapugoro roara m̃aleoputo kakana waina e doko narae ni nasum̃a ki Yehovah; nalakena tokora wanogoe e pitua ki navituaana tap̃arakiana asa, go navituaana ni flaur, go nap̃eletia ni navituaana maga ni natam̃ateana: nalakena wede ni naviriana ni brass waina e doko narae ni Yehovah, e da pataka naga ega mari navituaana tap̃arakiana asa, go navituaana ni flaur, go nap̃eletia ni navituaana maga ni natam̃ateana.

⁶⁵Dapala nogoe Solomon e mari nasaisaiana ragi wanogoe, nara ma Israel mamau, e pei nasaisaiana warua sikai, eu pae tokora waina eu sili asa paki Hamath pa pa paki noaisara ni Ityipt, eu mari a narae ni Yehovah Sup̃e anigida, naaleatia larua go naaleatia larua, e pei naaleatia rualima sikai tamate pati.

⁶⁶Naaleatia kelatolu e dip̃aki lua narei maga eu pano, go eu pasa p̃ia ki nawota, po paki tap̃aup̃au adeada maga pano eu samasama po laelaea nap̃op̃oda nalakena nadodomiana mamau waina Yehovah e mari a paki tea suasua aneana David, go paki narei aneana Israel.