Read Nguna Togoa Etafe North 2 NAWOTA MAGA 1 Bible Online

2 NAWOTA MAGA 1 - Nguna Togoa Etafe North bible

2 NAWOTA MAGA 1

¹Go edaku ki namateana ki Ahab, Moab e mari p̃auluulu dip̃a Israel.

²Go Ahasiah e dowo duaduru namata sikai ni em̃ago ni elagi aneana waina e doko Samaria, go e sasana: go e dip̃aki lua tea tautauana maga, po noa ki da, e naga, Kuga vano po pusuusu paki Baal‐sebub, sup̃e ni Ekron, mase a pe wo moro p̃ia m̃elu dua ki nasasanaana waia, kite?

³Ma agelo ki Yehovah e noa ki Eliyah naatam̃oli ni Tishbe, e naga, P̃a tuleana, p̃a sake pano naga p̃a sua tea tautauana maga ki nawota ni Samaria, po noa ki da naga, Sup̃e e dika Israel, e pei nalakena naga ku do pano naga kuga vusuusu paki Baal‐sebub, sup̃e ni Ekron, kite?

⁴Nalakena tea wanogoe Yehovah e noa dapala nea, e naga, P̃a wo da m̃elu dua ki nawewele waina ku sake asa mau, ma p̃a wo mate lomau.

⁵Go Eliyah e pano. Go tea tautauana maga eu liliu umai punusi nawota, go e noa ki da, e naga, Ekasana ku moro liliu umai?

⁶Go eu noa ki nia, eu naga, Naatam̃oli sikai e sake umai sua gami, po noa ki gami, e naga, Kuga vano, kuga moro liliu pano punusi nawota waina e dip̃aki lua mu umai, po noa ki nia naga, Yehovah e noa dapala nea, e naga, Sup̃e e dika Israel e pei nalakena ku dip̃aki lua naga kuga vusuusu paki Baal‐sebub, sup̃e ni Ekron, kite? Nalakena tea wanogoe p̃a wo da m̃elu dua ki nawewele waina ku sake asa mau, ma p̃a wo mate lomau.

⁷Go e noa ki da, e naga, Naatam̃oli dapale sava waina e sake umai sua mu, po noa ki mu navasaana maga wanogoe?

⁸Go eu pasadara e, po naga, E suni sugoro kovagoro sikai ni nam̃au, go namalona e pei tea tasokiana ki tasoki sikai ni nawili. Go e naga, E pei Eliyah, naatam̃oli ni Tishbe.

⁹Go nawota e dip̃aki lua tea maraki sikai ni rualima lima, nara ma rualima lima aneana eu mamau pano punusi a. Go e sake pano punusi a: go p̃a leo, e doko natano nam̃asua ni tava. Go e pasa paki nia, po naga, Naatam̃oli ki Sup̃e O, nawota e naga, P̃a siwo umai.

¹⁰Go Eliyah e pasadara, po noa ki tea maraki ni rualima lima, e naga, A pe vei naatam̃oli sikai ki Sup̃e, nakapu vavaga ega vae nakoroatelagi siwo umai po gani ko ma rualima lima anigo. Go ragi wanogoe nakapu vavaga e pae nakoroatelagi siwo umai, po gani punue a ma rualima lima aneana.

¹¹Go nawota e moro dip̃aki lua tea maraki p̃ota sikai ni rualima lima, nara ma rualima lima aneana eu mamau pano punusi a. Go e sake pano po noa ki nia, e naga, Naatam̃oli ki Sup̃e O, nawota e noa dapala nea, e naga, P̃a siwo umai m̃araverave.

¹²Go Eliyah e pasadara, po noa ki da, e naga, A pe vei naatam̃oli sikai ki Sup̃e, nakapu vavaga ega vae nakoroatelagi siwo umai, po gani ko ma rualima lima anigo. Go nakapu vavaga ki Sup̃e e pae nakoroatelagi siwo umai, po gani punue a ma rualima lima aneana.

¹³Go nawota e moro dip̃aki lua tea maraki p̃ota sikai ni rualima lima, nara ma rualima lima aneana pano sala ketolu. Go tea maraki ketolu ni rualima lima e sake pano, po ditip̃atua narae ni Eliyah, po pavara ni a, e naga, Naatam̃oli ki Sup̃e O, a pavara ni ko, namauriana aginau go namauriana ki tea suasua anigo rualima lima waia, euga vei tea madaga namatam̃a.

¹⁴P̃a leo, nakapu vavaga e pae nakoroatelagi siwo umai po gani dinomi tea maraki dua ni rualima lima waina ero pea umai, nara ma rualima lima adeada maga: ma namauriana aginau ega vei tea madaga namatama.

¹⁵Go agelo ki Yehovah e noa ki Eliyah, e naga, P̃a sikoti a siwo pano: p̃a ta matau ki nia mau. Go e duleana, po sikoti a siwo pano punusi nawota.

¹⁶Go e noa ki nia, e naga, Yehovah e noa dapala nea, e naga, Nalakena ku dip̃aki lua tea tautauana maga pano naga euga vusuusu paki Baal‐sebub, sup̃e ni Ekron, e pei nalakena Sup̃e e dika Israel naga p̃a vusuusu ki navasaana aneana, kite? Nalakena tea wanogoe p̃a wo da m̃elu dua ki nawewele waina ku sake asa mau, ma p̃a wo mate lomau.

¹⁷Go e mate pataka ni navasaana ki Yehovah waina Eliyah e pasa asa. Go Yehoram e pae asa maramara du oli a natau kerua ki Yehoram, natu ni Yehoshafat, nawota ni Yudah; nalakena e dika natuna.

¹⁸Go nawosiana maga ki Ahasiah waina e mari ra, eu da pei tea midiriana tusi ni nawosiana ni naaleatia maga ki nawota maga ni Israel, kite?