Read Nguna Togoa Etafe North 2 NAWOTA MAGA 11 Bible Online

2 NAWOTA MAGA 11 - Nguna Togoa Etafe North bible

2 NAWOTA MAGA 11

¹Go ragi waina Athaliah, Ahasiah p̃ilana, e punusi naga natuna e mate, e duleana po mari puoli ki puti ki naworawora ni navei‐nawotaana.

²Ma Yehosheba, nawota Yoram natuna nagoroi, Ahasiah gorena, e puati Yoash, Ahasiah natuna naanoai, po dape panako e pano m̃elu dua ki nawota natuna naanoai maga waina eu pei tea maripunueana, nae ma nagoroi vakale aneana, po dasuru ki da em̃ago waina vala maga go nawewele maga eu pei tea tauakiana asa; go eu dasuru ki nia paki Athaliah, dapala waina e da pei tea maripunueana mau.

³Go e pei tea tasurukiana, nara ma nagoroi wanogoe, nasum̃a ki Yehovah natau latesa: go Athaliah e maramara dap̃au navanua.

⁴Go natau kelarua Yehoiada e dip̃aki lua pano po paraki tea maraki maga ni p̃onotia maga, ni Karite maga, go ni tea vavaigoro maga po piragi ra umai punusi a ekopu ni nasum̃a ki Yehovah; go e mari navasasokiana sikai paki da, po mari ra eu pivisa paki nia ekopu ni nasum̃a ki Yehovah, po pisei ki da nawota natuna naanoai.

⁵Go e dip̃aki da, e naga, Tea waia e pei naleo waina kuga mari a: nimu namagovai ketolu kakamu waina ku do sili umai sabbath, kuga wo pei tea vavaigoro maga ni nasum̃a ki nawota;

⁶Go namagovai ketolu ega wo doko namata‐pua Sur; go namagovai ketolu ega wo doko namata‐pua nataku ni tea vavaigoro maga: dapala nogoe kuga wo pavaigoro nasum̃a, po pei p̃aaka sikai.

⁷Go taua dua kakamu, tea mamau puti waina ku do dave pano sabbath, kuga wo pavaigoro nasum̃a ki Yehovah dalivirigoro nawota.

⁸Go kuga dalivirigoro nawota, sara naatam̃oli sikasikai euga vilake nalikau adeada maga nam̃elearuda; go naata sikai e pe umai paki m̃aleoputo ni ovara maga, naata wanogoe e pe wo pei tea maripunueana: go kuga sikoti nawota ragi waina ega to dave pano go ragi waina ega to sili umai.

⁹Go tea maraki maga ni p̃onotia maga eu mari pataka ni tea mamau puti waina Yehoiada tea viri e dip̃aki da asa: go eu piragi naatam̃oli adeada maga sara naata sikasikai, tea maga waina euga to sili umai sabbath, go tea maga waina euga to dave pano sabbath, po umai punusi Yehoiada tea viri.

¹⁰Go tea viri e dua tea maraki maga ni p̃onotia maga, naio maga go kokororum̃a maga waina eu pea pei agi nawota David, go waina eu doko nasum̃a ki Yehovah.

¹¹Go tea vavaigoro maga eu lawodu, sara naatam̃oli sikasikai pilake nalikau adeada maga doko nam̃elearuda, pae taleva ni matua ni nasum̃a pano pa pa paki taleva ni mawiri ni nasum̃a, dalivirigoro wede ni naviriana go nasum̃a tapu.

¹²Go e piragi nawota natuna dave umai, po sawa ki vauvau nap̃auna, po dua e lela maga; go eu mari a e pei nawota, po puvurai ki nia; go eu dapap̃osawosa, po naga, Sup̃e ega mauti nawota.

¹³Go ragi waina Athaliah e dogo namarip̃araiana ni tea vavaigoro maga, go ni narei, e umai paki ekopu ni nasum̃a ki Yehovah punusi narei;

¹⁴Go e leo, go p̃a leo, nawota e lawodu nap̃irikia ni tip̃a, dapala natomariana aneana, go tea maraki maga go tea sui paiga maga eu du m̃aladigi ki nawota; go narei mamau ni navanua eu laelaea, po sui paiga maga. Go Athaliah e pua p̃orae sugoro aneana maga, po pioso, po naga, Nasekeana, nasekeana.

¹⁵Go Yehoiada tea viri e dip̃aki tea maraki maga ni p̃onotia maga waina eu dap̃au taua navakalo, po noa ki da, e naga, Kuga viragi a dave m̃elu dua ki namawota ni ovara maga; go te naata e pe rausi a, e pe wo pei tea maripunueana ki lova: nalakena tea viri e naga, Ega ta pei tea maripunueana ekopu ni nasum̃a ki Yehovah mau.

¹⁶Go eu nadi ki nam̃elearuda maga asa; go e pae tokora waina horse maga eu sili pae asa paki nasum̃a ki nawota, po pano: go e pei tea maripunueana tokora wanogoe.

¹⁷Go Yehoiada e mari navasasokiana sikai namawota ni Yehovah go ni nawota go ni narei, naga euga wo pei narei ki Yehovah; go namawota ni nawota go ni narei.

¹⁸Go narei mamau ni navanua eu paki nasum̃a ki Baal pano, po dakai a; eu marip̃oroworosi wede ni naviriana aneana maga, go nasup̃e aneana maga, po mari punue Mattan tea viri ki Baal, narae ni wede ni naviriana maga. Go tea viri e pasa dawona ki tasiga maga dap̃au nasum̃a ki Yehovah.

¹⁹Go e piragi tea maraki maga ni p̃onotia maga, go Karite maga, go tea vavaigoro maga, go narei mamau ni navanua; go eu piragi nawota siwo m̃elu dua ki nasum̃a ki Yehovah umai, po pae napua ni namata‐pua ki tea vavaigoro maga paki nasum̃a ki nawota. Go e dasake doko malo tasake ki nawota maga.

²⁰Go narei mamau ni navanua eu laelaea, go natokoana e mata dorogo: go eu mari punue Athaliah ki lova nasum̃a ki nawota.

²¹Yehoash e pei tea ni natau larua ragi waina e pae asa maramara.