Read Nguna Togoa Etafe North 2 NAWOTA MAGA 12 Bible Online

2 NAWOTA MAGA 12 - Nguna Togoa Etafe North bible

2 NAWOTA MAGA 12

¹Yehoash e atulake maramara natau kelarua ki Yehu; go e maramara Yerusalem natau rualima pati; go p̃ilana nagisana Sibiah ni Beer‐sheba.

²Go Yehoash e mari tea waina e leana namata ni Yehovah naaleatia maga mamau puti ni namauriana aneana waina Yehoiada tea viri e do pasa pisei ki nia asa.

³Ma tokora vakilagi maga eu da pei tea tapeluaana pano mau: narei eu do mari naviriana maga po do dap̃ara ki tea ni nap̃o wia tokora vakilagi maga.

⁴Go Yehoash e noa ki tea viri maga, e naga, M̃ane mamau puti ni naleo tapu maga, waina e do pei tea viragiana umai paki ekopu ni nasum̃a ki Yehovah, m̃ane waina e do pei tea noap̃otaeana naga sara naata sikasikai euga wo pitua ki nia, go m̃ane mamau puti waina naatam̃oli sikai e pe midoa ki nia nap̃op̃ona naga ega viragi a umai paki ekopu ni nasum̃a ki Yehovah,

⁵Tea viri maga euga tape a, sara naata sikasikai ki tea ni m̃aladigi ki nia: go euga moro davagi piri malo mawora maga ni nasum̃a, sara tokora waina te malo mawora e pe vei tea vap̃aiana asa.

⁶Ma e doko, natau kerualima dua tamate dolu ki nawota Yehoash, naga tea viri maga eu da davagi piri malo mawora maga ni nasum̃a mau.

⁷Go nawota Yehoash e soso Yehoiada tea viri umai, nara ma tea viri maga waina eu mamau doko, go e noa ki da, e naga, Ekasana ku da davagi piri malo mawora maga ni nasum̃a mau? Nalakena tea wanogoe, kuga ta moro dape m̃ane ki tea ni m̃aladigi ki mu mau, ma kuga vitua ki nia raki malo mawora maga ni nasum̃a.

⁸Go tea viri maga eu suasua naga euga ta moro dape m̃ane ki narei mau, kite davagi piri malo mawora maga ni nasum̃a mau.

⁹Ma Yehoiada tea viri e dape bokes sikai, po piloki sai wogoro kakana, po lawo ki nia nap̃irikia ni tip̃a taleva ni matua ni tea maga waina eu paki ekopu ni nasum̃a ki Yehovah: go tea viri maga waina eu pavaigoro namata, eu doropusi paki asa m̃ane mamau puti waina e pei tea viragiana umai paki ekopu ni nasum̃a ki Yehovah.

¹⁰Go e doko, ragi waina eu punusi naga m̃ane waina e doko bokes wanogoe e p̃arua, naga tea midiri ki nawota go tea viri pakilagi ero sake umai, go eu pai a nala maga po noasai totowo ni m̃ane waina e pei tea vap̃aiana doko nasum̃a ki Yehovah.

¹¹Go eu pitua ki m̃ane waina e pei tea rowogiana paki nam̃elearu ni naatam̃oli maga waina eu maraki dap̃au nawosiana ni nasum̃a ki Yehovah: go nara eu pitua ki nia paki mataisau maga go paki tea tavagi maga waina eu p̃osiwosi ki nasum̃a ki Yehovah,

¹²Go paki mataisau maga ni vatu, go tea tae vatu maga, go raki navakotoviana ni napapa go ni vatu taeana naga euga tavagi piri malo mawora maga ni nasum̃a ki Yehovah, go raki tea mamau puti waina e pei tea noaana raki nasum̃a naga euga tavagi piri a.

¹³Ma eu da magi nasum̃a ki Yehovah mari besin maga ni silver mau, kite siloa ni meru maga, kite boul maga, kite paiga maga, kite te lasa ni kold kite ni silver mau, ki m̃ane waina e pei tea viragiana umai paki ekopu ni nasum̃a ki Yehovah:

¹⁴Nalakena eu pitua ki nia paki tea maga waina eu mari nawosiana, po davagi piri nasum̃a ki Yehovah asa.

¹⁵Go eu da datago napuku sikai nalo kakana mau ki naatam̃oli maga waina eu pitua ki m̃ane wanogoe paki nam̃elearu ni tea maga waina euga vitua ki nia paki naatam̃oli wosiwosi maga: nalakena nara eu mari leana.

¹⁶M̃ane ni navituaana maga ni natapiriana, go m̃ane ni navituaana maga ni namarinaleosaana, e da pei tea viragiana umai paki ekopu ni nasum̃a ki Yehovah mau: e pei agi tea viri maga.

¹⁷Go Hasael nawota ni Siria e sake pano po mari navakalo dip̃a Cath, po puati a: go Hasael e lawo ki naraena naga ega sake paki Yerusalem pano.

¹⁸Go Yehoash nawota ni Yudah e puati sara naleo tapu maga waina tamana maga Yehoshafat go Yehoram go Ahasiah, nawota maga ni Yudah, eu dapugoro ra, go naleo tapu aneana maga, go kold mamau puti waina e pei tea vap̃aiana nasum̃a maga ni natauakiana ni naleo wia maga ni nasum̃a ki Yehovah, go ni nasum̃a ki nawota, po dip̃aki lua ra pano dua Hasael nawota ni Siria ara: go e m̃elu dua ki Yerusalem po pano.

¹⁹Go nawosiana maga ki Yoash, go tea mamau puti waina e mari a, eu da pei tea midiriana tusi ni nawosiana ni naaleatia maga ki nawota maga ni Yudah, kite?

²⁰Go tea suasua aneana maga eu duleana, po mari nasekeana sikai, po atugi Yoash nasum̃a ki Millo, napua waina e siwo paki Silla pano.

²¹Nalakena Yosakar natu ni Shimeath, go Yehosabad natu ni Shomer, tea suasua aneana maga, ero atugi a, go e mate; go eu ova ki nia e one sikoti tamana maga natokoana ki David: go natuna Amasiah e maramara du oli a.