Read Nguna Togoa Etafe North 2 NAWOTA MAGA 15 Bible Online

2 NAWOTA MAGA 15 - Nguna Togoa Etafe North bible

2 NAWOTA MAGA 15

¹Natau kerualima dua tamate larua ki Yeroboam nawota ni Israel, Asariah natu ni Amasiah nawota ni Yudah e pae asa maramara.

²E pei tea ni natau rualima sikai tamate latesa ragi waina e atulake maramara; go e maramara Yerusalem natau rualima lima tamate dua: go p̃ilana nagisana Yekoliah ni Yerusalem.

³Go e mari tea waina e leana namata ni Yehovah, pataka ni tea mamau puti waina tamana Amasiah e pea mari a.

⁴Ma tokora vakilagi maga eu da pei tea tapeluaana pano mau: narei eu mari naviriana maga po dap̃ara ki tea ni nap̃o wia tokora vakilagi maga, dakiusi sara ragi.

⁵Go Yehovah e atugi nawota, po mari a e pei lepero sikai pa pa paki naaleatia ni namateana aneana, go e masikina doko nasum̃a mamau sikai doko. Go Yotham natu ni nawota e pei tea tap̃au dap̃au tea ni nasum̃a, doko do pasap̃otae narei ni navanua.

⁶Go nawosiana maga ki Asariah, go tea mamau puti waina e mari ra, eu da pei tea midiriana tusi ni nawosiana ni naaleatia maga ki nawota maga ni Yudah, kite?

⁷Go Asariah e maturu sikoti tamana maga; go eu ova ki nia sikoti tamana maga natokoana ki David: go natuna Yotham e maramara du oli a.

⁸Natau kerualima dolu tamate latolu ki Asariah nawota ni Yudah, Sekariah natu ni Yeroboam e maramara Samaria dap̃au Israel, go e maramara atelagi latesa.

⁹Go e mari tea waina e sa namata ni Yehovah, dakiusi waina tamana maga eu pea mari a: e da m̃elu dua ki namarinaleosaana maga ki Yeroboam natu ni Nebat mau, waina e mari Israel eu mari naleo sa.

¹⁰Go Shallum natu ni Yabesh e mari nasekeana dip̃a e, po atugi a narae ni narei mamau, po mari punue a, po maramara du oli a.

¹¹Go nawosiana maga ki Sekariah, p̃a leo, eu pei tea midiriana tusi ni nawosiana ni naaleatia maga ki nawota maga ni Israel.

¹²Tea wanogoe e pei navasaana ki Yehovah waina e pasa asa paki Yehu, doko do naga, Natum̃a maga pa pa paki tagona kevati euga wo dasake malo tasake ni Israel. Go e pakilina dapala nogoe.

¹³Shallum natu ni Yabesh e atulake maramara natau kerualima dolu tamate loveti ki Ussiah nawota ni Yudah; go e maramara Samaria atelagi sikai maau.

¹⁴Go Menahem natu ni Cadi e sake pae Tirsah umai paki Samaria, po atugi Shallum natu ni Yabesh doko Samaria, po mari punue a, po maramara du oli a.

¹⁵Go nawosiana maga ki Shallum, go nasekeana aneana waina e mari a, p̃a leo, eu pei tea midiriana tusi ni nawosiana ni naaleatia maga ki nawota maga ni Israel.

¹⁶Go Menahem e atugi Tifsah, go tea maga mamau puti waina eu doko asa doko, go kokoi kakana maga, pae Tirsah pano pa pa: nalakena eu da maneana p̃olagati mau, nalakena tea wanogoe e atugi ra; go e dae p̃oraworae nagoroi diena maga mamau puti waina eu doko asa.

¹⁷Natau kerualima dolu tamate loveti ki Asariah nawota ni Yudah, Menahem natu ni Cadi e atulake maramara dap̃au Israel, go e maramara Samaria natau rualima sikai.

¹⁸Go e mari tea waina e sa namata ni Yehovah: sara naaleatia ni namauriana aneana e da m̃elu dua ki namarinaleosaana maga ki Yeroboam natu ni Nebat, waina e mari Israel eu mari naleo sa.

¹⁹Go Pul nawota ni Assiria e umai dip̃a navanua; go Menahem e dua Pul talenta ni silver manu sikai, naga ega silae a naga ega lawosoki namarakiana nam̃elearuna.

²⁰Go Menahem e dape lua m̃ane wanogoe ki Israel, ki sara naatam̃oli vakilagi go sogolapa maga, ki sara naatam̃oli sikasikai shekel ni silver rualima lima, naga ega vitua ki nia paki nawota ni Assiria. Nalakena tea wanogoe nawota ni Assiria e liliu pano, po da moro doko navanua wanogoe doko mau.

²¹Go nawosiana maga ki Menahem, go sara naleo waina e mari a, eu da pei tea midiriana tusi ni nawosiana ni naaleatia maga ki nawota maga ni Israel, kite?

²²Go Menahem e maturu sikoti tamana maga; go natuna Pekahiah e maramara du oli a.

²³Natau kerualima lima ki Asariah nawota ni Yudah, Pekahiah natu ni Menahem e atulake maramara Samaria dap̃au Israel, go e maramara natau dua.

²⁴Go e mari tea waina e sa namata ni Yehovah: e da m̃elu dua ki namarinaleosaana maga ki Yeroboam natu ni Nebat mau, waina e mari Israel eu mari naleo sa.

²⁵Go Pekah natu ni Remaliah, tasiga aneana, e mari nasekeana dip̃a e, po atugi a Samaria, nasum̃a ni p̃aaka ni nasum̃a ki nawota; go naatam̃oli rualima lima ni Cilead, nara ma Pekah eu mamau doko: go e atugi a, po maramara du oli a.

²⁶Go nawosiana maga ki Pekahiah, go tea mamau puti waina e mari a, p̃a leo, eu pei tea midiriana tusi ni nawosiana ni naaleatia maga ki nawota maga ni Israel.

²⁷Natau kerualima lima tamate dua ki Asariah nawota ni Yudah, Pekah natu ni Remaliah e atulake maramara Samaria dap̃au Israel, go e maramara natau rualima dua.

²⁸Go e mari tea waina e sa namata ni Yehovah: e da m̃elu dua ki namarinaleosaana maga ki Yeroboam natu ni Nebat mau, waina e mari Israel eu mari naleo sa.

²⁹Naaleatia maga ki Pekah nawota ni Israel, Tiklath‐pileser nawota ni Assiria e umai po puati Iyon, go Abel‐beth‐maakah, go Yanoah, go Kedesh, go Hasor, go Cilead, go Calilea, navanua mamau ni Naftali; go e piragi lua pavakoto narei po paki Assiria pano.

³⁰Go natau rualima kerua ki Yotham natu ni Ussiah, Hoshea natu ni Elah e mari nasekeana dip̃a Pekah natu ni Remaliah, po atugi a po mari punue a, po maramara du oli a.

³¹Go nawosiana maga ki Pekah, go tea mamau puti waina e mari a, p̃a leo, eu pei tea midiriana tusi ni nawosiana ni naaleatia maga ki nawota maga ni Israel.

³²Natau kerua ki Pekah natu ni Remaliah nawota ni Israel, Yotham natu ni Ussiah nawota ni Yudah e atulake maramara.

³³E pei tea ni natau rualima dua tamate lima ragi waina e atulake maramara; go e maramara Yerusalem natau rualima sikai tamate latesa: go p̃ilana nagisana Yerusha, Sadok natuna nagoroi.

³⁴Go e mari tea waina e leana namata ni Yehovah: e mari pataka ni tea mamau puti waina tamana Ussiah e pea mari a.

³⁵Ma tokora vakilagi maga eu da pei tea tapeluaana pano mau: narei eu mari naviriana maga, po dap̃ara ki tea ni nap̃o wia tokora vakilagi maga dakiusi sara ragi. Nae e davagi namata‐pua ni elagi ni nasum̃a ki Yehovah.

³⁶Go nawosiana maga ki Yotham, go tea mamau puti waina e mari a, eu da pei tea midiriana tusi ni nawosiana ni naaleatia maga ki nawota maga ni Yudah, kite?

³⁷Naaleatia maga wanogoe Yehovah e pae asa dip̃aki lua Resin nawota ni Siria, go Pekah natu ni Remaliah, naga euga mari dip̃a Yudah.

³⁸Go Yotham e maturu sikoti tamana maga, po pei tea ovakiana sikoti tamana maga natokoana ki tamana David: go natuna Ahas e maramara du oli a.