Read Nguna Togoa Etafe North 2 NAWOTA MAGA 16 Bible Online

2 NAWOTA MAGA 16 - Nguna Togoa Etafe North bible

2 NAWOTA MAGA 16

¹Natau kerualima sikai tamate larua ki Pekah natu ni Remaliah, Ahas natu ni Yotham nawota ni Yudah e pae asa maramara.

²Ahas e pei tea ni natau rualima dua ragi waina e atulake maramara; go e maramara Yerusalem natau rualima sikai tamate latesa: go e da mari tea waina e leana namata ni Yehovah Sup̃e aneana mau, dakiusi tamana David.

³Ma e surata napua maga ki nawota maga ni Israel, go e pitua ki natuna e pei navituaana tap̃arakiana sikai, dapala tea mamaragokiana maga ki nalauna maga waina Yehovah e kopasi lua ra m̃elu dua ki narae ni Israel natuna maga.

⁴Go e mari naviriana maga po dap̃ara ki tea ni nap̃o wia tokora vakilagi maga, go doko tava maga, go melu ni sara nakau mamalakesa maga.

⁵Go Resin nawota ni Siria go Pekah natu ni Remaliah nawota ni Israel ero sake umai naga eroga mari navakalo dip̃a Yerusalem: go ero kelugoro Ahas, ma ero mari sa marimatua ki nia mau.

⁶Ragi sikai maau wanogoe nawota ni Edom e magi Edom puati liliua ki Elath, po kopasi lua tea ni Yudea m̃elu dua ki Elath pano: go tea ni Edom eu rumai paki Elath, po doko asa doko, pa pa paki naaleatia waia.

⁷Go Ahas e dip̃aki lua tea tautauana maga pa punusi Tiklath‐pileser nawota ni Assiria, po naga, Kinau a pei tea suasua anigo go natum̃a: p̃a sake umai, po pualua au m̃elu dua ki nam̃elearu ni nawota ni Siria, go m̃elu dua ki nam̃elearu ni nawota ni Israel, waina ero duleana dip̃a au.

⁸Go Ahas e dape silver go kold waina e pei tea vap̃aiana nasum̃a ki Yehovah, go nasum̃a ni natauakiana ni naleo wia maga ki nawota, po dip̃aki lua e pano e pei navituaana sikai paki nawota ni Assiria.

⁹Go nawota ni Assiria e daki dorogo paki nia: go nawota ni Assiria e sake pano dip̃a Damaseko, po puati a, po piragi lua pavakoto narei paki Kir pano, po mari punue Resin.

¹⁰Go nawota Ahas e paki Damaseko pano naga ega sua Tiklath‐pileser nawota ni Assiria, go e punusi wede ni naviriana waina e doko Damaseko: go nawota Ahas e dip̃aki lua paki Uriyah tea viri naleodawonakiana ni wede ni naviriana wanogoe, go naleorowogiana kakana pataka ni namariana visarasara kakana maga.

¹¹Go Uriyah tea viri e davagi wede ni naviriana sikai: pataka ni tea mamau puti waina nawota Ahas e dip̃aki lua m̃elu Damaseko umai, dapala nogoe Uriyah tea viri e mari a, go e doko raki ragi waina nawota Ahas ega wo pae Damaseko umai.

¹²Go ragi waina nawota e pae Damaseko umai, nawota e punusi wede ni naviriana wanogoe: go nawota e paki m̃aladigi ki wede ni naviriana wanogoe, po pitua ki naviriana sikai asa.

¹³Go e dap̃ara ki navituaana tap̃arakiana aneana go navituaana ni flaur aneana, po daki lua navituaana takiana aneana, po meseura ki nada ni navituaana maga ni natam̃ateana aneana, wede ni naviriana wanogoe.

¹⁴Go wede ni naviriana ni brass waina e doko narae ni Yehovah, e piragi lua e m̃elu dua ki kivea ki nasum̃a, m̃elu dua ki namawota ni wede ni naviriana aneana go ni nasum̃a ki Yehovah, po lawo ki nia taleva ni ep̃au ni wede ni naviriana aneana.

¹⁵Go nawota Ahas e dip̃aki Uriyah tea viri, e naga, P̃a tap̃ara ki navituaana tap̃arakiana ni malip̃ogi wede ni naviriana warua, go navituaana ni flaur ni ragi melu, go navituaana tap̃arakiana ki nawota, go navituaana ni flaur aneana, ega vilake navituaana tap̃arakiana ki narei mamau puti ni navanua, go navituaana ni flaur adeada, go navituaana takiana adeada maga; po meseura ki nada mamau ni navituaana tap̃arakiana asa, go nada mamau ni naviriana: ma wede ni naviriana ni brass ega vei aginau naga aga tatago asa.

¹⁶Go Uriyah tea viri e mari dapala nogoe, pataka ni tea mamau puti waina nawota Ahas e pitip̃aki asa.

¹⁷Go nawota Ahas e dae kotokotovi lua nadigi ni laketano maga, po dape lua tea vavano m̃elu dua ki da; po dape lua lasa warua ni noai m̃elu dua ki elagi ni oks maga ni brass waina eu doko etano ki nia, po doropusi a e doko napara sikai ni vatu.

¹⁸Go napua tap̃aup̃augoroana raki sabbath, waina eu davagi a ekopu ni nasum̃a, go katama tokora ni nasiliana ki nawota, e mari ra ero pei nasum̃a ki Yehovah, nalakena nawota ni Assiria.

¹⁹Go nawosiana maga ki Ahas waina e mari ra, eu da pei tea midiriana tusi ni nawosiana ni naaleatia maga ki nawota maga ni Yudah, kite?

²⁰Go Ahas e maturu sikoti tamana maga, po pei tea ovakiana sikoti tamana maga natokoana ki David: go natuna Hesekiah e maramara du oli a.