Read Nguna Togoa Etafe North 2 NAWOTA MAGA 17 Bible Online

2 NAWOTA MAGA 17 - Nguna Togoa Etafe North bible

2 NAWOTA MAGA 17

¹Natau kerualima sikai tamate dua ki Ahas nawota ni Yudah, Hoshea natu ni Elah e pae asa maramara Samaria dap̃au Israel, go e maramara natau loveti.

²Go e mari tea waina e sa namata ni Yehovah, ma e da mari dapala waina nawota maga ni Israel eu pea mari a mau.

³Shalmaneser nawota ni Assiria e sake umai dip̃a e; go Hoshea e po pei tea suasua aneana, po maneana dape nasautoga umai.

⁴Go nawota ni Assiria e pap̃ai nasekeana doko Hoshea; nalakena nae e dip̃aki lua tea tautauana maga pano punusi So nawota ni Ityipt, go e da pitua ki te navatuna sikai paki nawota ni Assiria mau, dapala waina e pea mari a sara natau: nalakena tea wanogoe nawota ni Assiria e kokoro p̃onoti a, po soli a doko nasum̃a ni navavaigoroana.

⁵Go nawota ni Assiria e sake umai usuraki navanua mamau, po paki Samaria pano, po kelugoro e natau dolu.

⁶Natau keloveti ki Hoshea, nawota ni Assiria e puati Samaria, po piragi lua pavakoto Israel paki Assiria pano, po lawo ki da doko Halah, go Habor, nadigi ni noaisara ni Cosan, go doko natokoana maga ni Media.

⁷Go e mari dapala nogoe nalakena Israel natuna maga eu mari naleo sa dip̃a Yehovah Sup̃e adeada, waina e piragi lua ra m̃elu dua ki navanua ni Ityipt sake umai, m̃elu dua ki etano ni nam̃elearu ni Faraoh nawota ni Ityipt, go eu matau ki sup̃e p̃ota maga,

⁸Po surata pae natawonakiana maga ki nalauna maga waina Yehovah e kopasi lua ra m̃elu dua ki narae ni Israel natuna maga, go pae natawonakiana maga ki nawota maga ni Israel waina nara eu dum̃ada mari ra.

⁹Go Israel natuna maga eu mari sili ki naleo maga waina eu da leana mau dip̃a Yehovah Sup̃e adeada, go eu dum̃ada madeada davagi tokora vakilagi maga sara natokoana adeada maga, pae nasum̃a varau pakilagi ki tea vavaigoro pa pa paki natokoana ni p̃aaka.

¹⁰Go eu dum̃ada madeada sike lawo ki tea lawodu maga go Asherah maga nam̃asua ni sara tava vakilagi, go melu ni sara nakau mamalakesa maga:

¹¹Go eu dap̃ara ki tea ni nap̃o wia sara tokora vakilagi maga wanogoe, dapala nalauna maga waina Yehovah e kopasi lua ra m̃elu dua ki naraeda; go eu mari tea sigisigileo maga po mari Yehovah e maeto:

¹²Go eu magi idolo maga suasua, waina Yehovah e noa ki da asa, e naga, Kuga ta mari naleo wanogoe mau.

¹³Ma Yehovah e noasokisoki paki Israel, go paki Yudah, pae nam̃elearu ni sara profeta maga, go ni sara tea kikita maga, doko do naga, Kuga maradoa m̃elu dua ki napua sa animu maga, po pavaigoro natip̃akiana aginau maga go natawonakiana aginau maga, pataka ni nawotaeana mamau waina a dip̃aki tamamu maga asa, go waina a dip̃aki lua e paki mu pae nam̃elearu ni tea suasua aginau profeta maga.

¹⁴Ma eu karai dogo e, po dum̃ada mari nanoada e kasua, dakiusi nanoa ni tamada maga, waina eu da saralomau Yehovah Sup̃e adeada mau.

¹⁵Go eu dip̃adoa natawonakiana aneana maga, go navasasokiana waina e mari a paki tamada maga, go nanoasokisokiana aneana maga waina e noasokisoki paki da; go eu dausi nap̃aloana, po pei tea p̃alo maga, po dausi nalauna maga waina eu doko dalivirigoro ra, waina Yehovah e pasa parati ki da naga euga ta mari dakiusi ra mau.

¹⁶Go eu doropusi natip̃akiana maga mamau puti ki Yehovah Sup̃e adeada, po dum̃ada madeada mari nasup̃e takiana maga, kau natuna dua, po mari Asherah sikai, po lotu ki taua mamau ni nakoroatelagi, po magi Baal suasua.

¹⁷Go eu pitua ki natuda naanoai maga go natuda nagoroi maga eu pei navituaana tap̃arakiana maga, go eu mari nakikitaana go nawosidoaana maga, po dum̃ada sori ra naga euga mari tea waina e sa namata ni Yehovah, po mari a e maeto.

¹⁸Nalakena tea wanogoe Yehovah e maeto p̃arua ki Israel, po kopasi lua ra m̃elu dua ki naraena pano: te seara eu da moro doko mau, ma naworawora ni Yudah e sikina.

¹⁹Go Yudah nara ma eu da pavaigoro natip̃akiana ki Yehovah Sup̃e adeada mau, ma eu surata natawonakiana maga ki Israel waina nara eu surata asa.

²⁰Go Yehovah e dip̃adoa naworawora mamau puti ni Israel, po mari sa ki da, po pitua ki da paki nam̃elearu ni tea mari pavakoto maga pa pa e kopasi lua ra m̃elu dua ki naraena pano.

²¹Nalakena e puap̃orae Israel m̃elu dua ki nasum̃a ki David; go eu mari Yeroboam natu ni Nebat e pei nawota: go Yeroboam e kopasi lua Israel m̃elu dua ki narausi‐Yehovah‐ana, po mari ra eu mari naleo sa ki namarinaleosaana warua sikai.

²²Go Israel natuna maga eu surata namarinaleosaana maga mamau puti ki Yeroboam waina nae e dum̃ana mari ra; eu da m̃elu dua ki da pano mau;

²³Pa pa Yehovah e kopasi lua Israel m̃elu dua ki naraena pano, dapala waina e pasa asa pae nam̃elearu ni tea suasua aneana profeta maga mamau puti. Go dapala nogoe Israel e pei tea viragi‐lua‐pavakotoana m̃elu dua ki navanua adeada paki Assiria pano, pa pa paki naaleatia waia.

²⁴Go nawota ni Assiria e piragi naatam̃oli maga m̃elu Babelon umai, go m̃elu Kuthah, go m̃elu Avva, go m̃elu Hamath go Sefarvaim, po lawo ki da natokoana maga ni Samaria, eu du oli Israel natuna maga: go eu peani Samaria, po doko natokoana kakana maga doko.

²⁵Go e doko, ragi waina eu pae asa doko tokora wanogoe, naga eu da matau ki Yehovah mau: nalakena tea wanogoe Yehovah e dip̃aki lua laion maga eu doko m̃aleoputo kakada, waina eu mari punue ra te seara kakada.

²⁶Nalakena tea wanogoe eu pasa paki nawota ni Assiria, eu naga, Nalauna maga waina ku piragi lua pavakoto ara po lawo ki da natokoana maga ni Samaria, eu da atae nawotaeana ki Sup̃e ni navanua mau: nalakena tea wanogoe e dip̃aki lua laion maga m̃aleoputo kakada, go p̃a leo, eu do mari punue ra, nalakena eu da atae nawotaeana ki Sup̃e ni navanua mau.

²⁷Go nawota ni Assiria e pitip̃aki, po naga, Kuga viragi paloti paki tokora wanogoe pano, tea viri maga waina ku piragi lua ra m̃elu dua ki tokora wanogoe umai sikai kakada; go nae ega wo pano po doko tokora wanogoe doko, po pasa pisei ki da nawotaeana ki Sup̃e ni navanua.

²⁸Nalakena tea wanogoe tea viri maga waina eu piragi lua pavakoto ara m̃elu dua ki Samaria sikai kakada e umai po doko Beth‐el doko, po pasa pisei ki da takana waina euga wo matau ki Yehovah.

²⁹Ma sara nalauna sikasikai eu dum̃ada madeada mari sup̃e adeada maga, po lawo ki da nasum̃a maga ni tokora vakilagi maga, waina naka ni Samaria eu mari ra, sara nalauna sikasikai doko natokoana adeada maga waina eu doko ara doko.

³⁰Go naatam̃oli maga ni Babelon eu mari Sukkoth‐benoth, go naatam̃oli maga ni Kuth eu mari Nerkal, go naatam̃oli maga ni Hamath eu mari Ashima,

³¹Go tea ni Avva eu mari Nibhas go Tartak, go tea ni Sefarvaim eu pitua ki natuda maga eu pei navituaana tap̃arakiana maga paki Adrammelek go Anammelek, sup̃e maga ni Sefarvaim.

³²Go eu matau ki Yehovah, po dum̃ada madeada matadoa m̃elu dua ki da tea viri maga ni tokora vakilagi maga, waina eu madeada mari naviriana maga ekopu ni nasum̃a maga ni tokora vakilagi maga.

³³Eu matau ki Yehovah, ma eu magi sup̃e adeada maga suasua, dapala natomariana ni nalauna maga waina eu pei tea viragi‐lua‐pavakotoana m̃elu dua ki da pano.

³⁴Pa pa paki naaleatia waia eu dausi natomariana maga ni tuai: eu da matau ki Yehovah mau, kite mari pataka ni natawonakiana maga, kite pataka ni nanoasokisokiana maga, kite pataka ni nawotaeana, kite pataka ni natip̃akiana waina Yehovah e pitip̃aki asa paki Yakob natuna maga waina e salagisana ki Israel;

³⁵Waina Yehovah e mari navasasokiana sikai paki da, po pasa parati ki da, doko do naga, Kuga ta matau ki sup̃e p̃ota maga mau, kite kolo suai natano paki da mau, kite madeada suasua, kite mari naviriana paki da mau:

³⁶Ma Yehovah waina e piragi lua mu m̃elu dua ki navanua ni Ityipt sake umai ki nakasuaana warua go ki naruna saikiana sikai, e pei nae waina kuga matau ki nia, go kuga kolo suai natano paki nia, go kuga mari naviriana maga paki nia:

³⁷Go natawonakiana maga go nanoasokisokiana maga, go nawotaeana go natip̃akiana, waina e manimu midiri ra, kuga vavaigoro po mari ra pa pa ega tu du po du mau du, go kuga ta matau ki sup̃e p̃ota maga mau:

³⁸Go navasasokiana waina e mari a paki mu, kuga ta malio ki nia mau; go kuga ta matau ki sup̃e p̃ota maga mau.

³⁹Ma kuga matau ki Yehovah Sup̃e animu; go nae ega wo pualua mu m̃elu dua ki nam̃elearu ni tea kokona ki mu maga mamau puti.

⁴⁰Ma eu da dogo parati ki nia mau, ma eu mari pataka ni natomariana adeada ni tuai.

⁴¹Go dapala nogoe nalauna maga wanogoe eu matau ki Yehovah, go eu moro magi nasup̃e taeana adeada maga suasua; natuda maga dapala nogoe, go natuda natuda maga, dapala waina tamada maga eu pea mari a, dapala nogoe nara ma eu moro mari a pa pa paki naaleatia waia.