Read Nguna Togoa Etafe North 2 NAWOTA MAGA 18 Bible Online

2 NAWOTA MAGA 18 - Nguna Togoa Etafe North bible

2 NAWOTA MAGA 18

¹Go e pakilina natau ketolu ki Hoshea natu ni Elah nawota ni Israel, naga Hesekiah natu ni Ahas nawota ni Yudah e pae asa maramara.

²E pei tea ni natau rualima dua tamate lima ragi waina e pae asa maramara; go e maramara Yerusalem natau rualima dua tamate loveti: go p̃ilana nagisana Abi, Sekariah natuna nagoroi.

³Go e mari tea waina e leana namata ni Yehovah, pataka ni tea mamau puti waina tamana David e pea mari a.

⁴E dape lua tokora vakilagi maga, po dakai tea lawodu maga, po dae kotovi Asherah: go e duki p̃oroworosi m̃aata ni brass waina Moses e mari a; nalakena pa pa paki naaleatia maga wanogoe, Israel natuna maga eu dap̃ara ki tea ni nap̃o wia paki nia; go e salagisana ki Nehushtan.

⁵E pavatu Yehovah, Sup̃e ki Israel; go nawota sikai waina e dakiusi a, e da doko mau m̃aleoputo ni nawota maga mamau puti ni Yudah waina eu doko pea ki nia kite edaku ki nia.

⁶Nalakena e puluti Yehovah, e da m̃elu dua ki narausi‐a‐ana mau, ma e pavaigoro natip̃akiana aneana maga waina Yehovah e dip̃aki Moses asa.

⁷Go Yehovah e sikoti a doko; sara tokora waina e paki asa pano, e disu p̃ia: go e mari p̃auluulu dip̃a nawota ni Assiria, po da maneana suasua mau.

⁸E atugi Filistine maga pano pa pa paki Casa, go kokoi kakana maga, pae nasum̃a varau pakilagi ki tea vavaigoro pa pa paki natokoana ni p̃aaka.

⁹Go e pakilina natau kevati ki nawota Hesekiah, waina e pei natau kelarua ki Hoshea natu ni Elah nawota ni Israel, naga Shalmaneser nawota ni Assiria e sake umai dip̃a Samaria, po kelugoro e.

¹⁰Go ragi ni nanopuana ni natau ketolu eu puati a: e pei natau kelatesa ki Hesekiah, waina e pei natau keloveti ki Hoshea nawota ni Israel, ragi waina eu puati lua Samaria.

¹¹Go nawota ni Assiria e piragi lua pavakoto Israel paki Assiria pano, po lawo ki da doko Halah, go doko Habor, nadigi ni noaisara ni Cosan, go doko natokoana maga ni Media:

¹²Nalakena eu da dogo parati ki nadaleo ni Yehovah Sup̃e adeada mau, ma eu dapiri navasasokiana aneana, tea mamau puti waina Moses tea suasua ki Yehovah e pitip̃aki asa, go eu da masau dogo e mau, kite mari a mau.

¹³Go natau kerualima sikai tamate pati ki nawota Hesekiah, Sennakerib nawota ni Assiria e sake umai dip̃a natokoana maga ni p̃aaka mamau puti ni Yudah, po puati ra.

¹⁴Go Hesekiah nawota ni Yudah e dip̃aki lua paki Lakish pa punusi nawota ni Assiria, po naga, Kinau a mari naleo sa; p̃a liliu m̃elu dua kinau pano: tea waina ku pe toropusi doko au, tea wanogoe a pe wo dapetape a. Go nawota ni Assiria e magi Hesekiah nawota ni Yudah noa p̃otae talenta ni silver p̃onotia dolu go talenta ni kold rualima dolu.

¹⁵Go Hesekiah e dua e silver mamau puti waina e pei tea vap̃aiana doko nasum̃a ki Yehovah, go doko nasum̃a ni natauakiana ni naleo wia maga ki nawota.

¹⁶Ragi sikai maau wanogoe Hesekiah e mulusi lua kold m̃elu dua ki namata maga ni nasum̃a tapu ki Yehovah, go m̃elu dua ki tip̃a maga waina Hesekiah nawota ni Yudah e pulutigoro ra, po dua nawota ni Assiria asa.

¹⁷Go nawota ni Assiria e dip̃aki lua Tartan go Rab‐saris go Rabshakeh nara ma taua warua sikai ni navakalo m̃elu Lakish pano punusi nawota Hesekiah doko Yerusalem. Go eu sake pano po paki Yerusalem. Go ragi waina eu rumai sua, eu lawodu pisari napua ni noai ni namarourou ni elagi, waina e doko napua warua ni vanua ki tea sarue maga.

¹⁸Go eu pioso raki nawota, go Eliakim natu ni Hilkiah, waina e pei tea tap̃au dap̃au tea ni nasum̃a, go Shebnah tea midiri, go Yoah natu ni Asaf tea terausi, eu dave umai punusi ra.

¹⁹Go Rabshakeh e noa ki da, e naga, Kuga noa ki Hesekiah naga, Nawota ni Assiria, nawota warua waina, e noa dapala nea, e naga, Seve navavatuana waia waina ku pavatu asa?

²⁰Nigo ku midoa ki nia naga navasaana m̃oli e pei namidoaki‐p̃otaeana go nakasuaana pataka ni navakalo. Ma ku do pavatu sei, naga ku mari p̃auluulu dip̃a au?

²¹Go p̃a leo, ku do pavatu tiko ni napati nau waina e pei wola, Ityipt nogo; waina naatam̃oli sikai e pe ovi a, e pe wo puri nam̃elearuna, po puri sai a: Faraoh nawota ni Ityipt e pei tea tapala nogoe paki tea mamau puti waina eu pavatu asa.

²²Ma ku pe noa kinau naga, Au do pavatu Yehovah Sup̃e aginami: e pe ta pei nae, waina tokora vakilagi aneana maga go wede ni naviriana aneana maga, Hesekiah e mari puoli ki da, po noa ki Yudah go ki Yerusalem, Kuga wo lotu narae ni wede ni naviriana waia Yerusalem, kite?

²³Nalakena tea wanogoe, a pavara ni ko asa, p̃a vitua ki nanadisokiana maga paki nawota aginau, nawota ni Assiria, go aga wo dua ko horse manu dua, waina ku pe mariatae lawo ki tea sakesaake horse maga euga sakesaake ara.

²⁴Go dapale sava ku mariatae doa liliua ki narae ni tea suasua maga ki nawota aginau tea sikai kakada, po lawo ki navavatuana anigo doko Ityipt raki kariot maga go raki tea sakesaake horse maga?

²⁵Kinau a po sake umai masale ki Yehovah dip̃a tokora waia naga aga mari sa ki nia, kite? Yehovah e noa kinau, e naga, P̃a sake pano dip̃a navanua wanogoe, po mari sa ki nia.

²⁶Go Eliakim natu ni Hilkiah, go Shebna, go Yoah eu noa ki Rabshakeh, eu naga, P̃a vasa paki tea suasua anigo maga pae masileo ni Siria, a pavara ni ko asa; nalakena au midoaki atae a: go p̃a ta pasa paki gami pae masileo ni Yudah mau, nadaliga ni narei waina eu doko p̃aaka.

²⁷Ma Rabshakeh e noa ki da, e naga, Nawota aginau e dip̃aki lua au umai naga aga noa navasaana maga waia paki‐go go paki nawota anigo, kite? E da dip̃aki lua au umai naga aga vasa paki naatam̃oli maga waina eu sakesaake doko p̃aaka, waina eu pei tea tip̃akotoviana naga euga tum̃ada gani nataeda, go naga euga tum̃ada munu nameada, dakiusi mu, kite?

²⁸Go Rabshakeh e lawodu, po pioso ki nadaleo kasua sikai pae masileo ni Yudah, po pasa, doko do naga, Kuga rogo navasaana ki nawota warua, nawota ni Assiria.

²⁹Nawota e noa dapala nea, e naga, Kuga ta suasua ki Hesekiah naga ega surue mu mau; nalakena ega wo da mariatae pualua mu m̃elu dua ki nam̃elearugu mau:

³⁰Go kuga ta suasua ki Hesekiah mau naga ega mari mu kuga vavatu Yehovah, doko do naga, Yehovah ega wo pualua gida, go natokoana waia ega wo da pei tea vituakiana paki nam̃elearu ni nawota ni Assiria mau.

³¹Kuga ta daki dorogo paki Hesekiah mau: nalakena nawota ni Assiria e noa dapala nea, e naga, Kuga mari natam̃ateana paki nau, go kuga tave umai po sikoti au; go kuga wo dum̃amu gani tea ni vaine animu sara naata sikasikai kakamu, go tea ni nakau napuliva animu, go kuga wo dum̃amu munu noai maga m̃elu luku ni noai animu, sara naata sikasikai kakamu;

³²Pa pa aga valoti po piragi lua mu pano paki navanua sikai waina e dakiusi navanua animu, navanua sikai ni korn go ni waine, navanua sikai ni navinaga go ni roara maga ni vaine, navanua sikai ni naroro ni nakau oliva go ni honi, naga kuga mauri, po da mate mau: go kuga ta daki dorogo paki Hesekiah mau, ragi waina e do pasadie mu, doko do naga, Yehovah ega wo pualua gida.

³³Sup̃e maga ni nalauna maga te sikai kakada e pualua navanua aneana m̃elu dua ki nam̃elearu ni nawota ni Assiria, kite?

³⁴Sup̃e maga ni Hamath, go ni Arpad wai? Sup̃e maga ni Sefarvaim, go ni Hena, go ni Ivvah wai? Nara eu pualua Samaria m̃elu dua ki nam̃elearugu, kite?

³⁵Sei maga ni sup̃e maga mamau puti ni navanua maga, waina eu dum̃ada pualua navanua adeada m̃elu dua ki nam̃elearugu, naga Yehovah e pe wo pualua Yerusalem m̃elu dua ki nam̃elearugu?

³⁶Ma narei eu punuta doko, po da pasadara e ki te navasaana sikai mau: nalakena natip̃akiana ki nawota e pei tea waia, e naga, Kuga ta pasadara e mau.

³⁷Go Eliakim natu ni Hilkiah, waina e pei tea tap̃au dap̃au tea ni nasum̃a, go Shebna tea midiri, go Yoah natu ni Asaf tea terausi, eu rumai punusi Hesekiah, sugoro adeada maga eu pei tea vuap̃oraeana, go eu noa ki nia ki navasaana maga ki Rabshakeh.