Read Nguna Togoa Etafe North 2 NAWOTA MAGA 19 Bible Online

2 NAWOTA MAGA 19 - Nguna Togoa Etafe North bible

2 NAWOTA MAGA 19

¹Go e pakilina ragi waina nawota Hesekiah e dogo e, naga e pua p̃orae sugoro aneana maga, po dum̃ana kulugoro e ki nakulukulu ni sak, po paki ekopu ni nasum̃a ki Yehovah.

²Go e dip̃aki lua Eliakim, waina e pei tea tap̃au dap̃au tea ni nasum̃a, go Shebna tea midiri, go tea matua maga ni tea viri maga, eu pei tea kulugoroana ki nakulukulu ni sak, pano punusi profeta Isaiah natu ni Amos.

³Go eu noa ki nia, eu naga, Hesekiah e noa dapala nea, e naga, Naaleatia waia e pei naaleatia sikai ni narogokitesaana, go ni navasakasuaana, go ni navasadaoana: nalakena piakiki maga eu po umai naga euga vakilina, go nakasuaana ni navisola‐ki‐da‐ana e dika.

⁴Mase Yehovah Sup̃e anigo e pe wo dogo navasaana maga ki Rabshakeh, waina nawota aneana, nawota ni Assiria, e dip̃aki lua e umai naga ega vasa pinoa ki Sup̃e mauri asa, go e pe wo pasa kasua dip̃a navasaana maga waina Yehovah Sup̃e anigo e dogo e: nalakena tea wanogoe p̃a magi namagovai waina e pei tea toropusiana doko sike natapasavasaana anigo.

⁵Go dapala nogoe tea suasua maga ki nawota Hesekiah eu rumai punusi Isaiah.

⁶Go Isaiah e noa ki da, e naga, Kuga noa ki nawota animu ega tapala nea, kuga naga, Yehovah e noa dapala nea, e naga, P̃a ta mataku mau nalo ni navasaana maga waina ku dogo ra, waina tea suasua maga ki nawota ni Assiria e pasa sa kinau ara.

⁷Kuga leo, aga wo doropusi naatana sikai ega toko nap̃alauna, go ega wo dogo narogorogoana sikai, go ega wo liliu paki navanua aneana; go aga wo mari a ega rowo ki lova navanua aneana.

⁸Go Rabshakeh e liliu, po pap̃ai naga nawota ni Assiria e do mari navakalo dip̃a Libnah: nalakena e dogo sua naga e m̃elu dua ki Lakish pano.

⁹Go ragi waina e dogo eu noa nalo ni Tirhakah nawota ni Ethiopia, eu naga, P̃a leo, e po dave umai naga ega mari navakalo dip̃a ko: e moro dip̃aki lua tea tautauana maga pa punusi Hesekiah, doko do naga,

¹⁰Kuga noa ega tapala nea paki Hesekiah nawota ni Yudah, kuga naga, P̃a ta suasua ki Sup̃e anigo waina ku pavatu asa naga ega surue ko mau, doko do naga, Yerusalem ega wo da pei tea vituakiana paki nam̃elearu ni nawota ni Assiria mau.

¹¹P̃a leo, ku dogo sua tea waina nawota maga ni Assiria eu mari a paki navanua maga mamau puti, naga eu mari puoli ki puti ra: go nigo p̃a wo pei tea vualuaana, kite?

¹²Sup̃e maga ni nalauna maga eu pualua tea maga waina tamagu maga eu mari puoli ki da, Cosan, go Haran, go Resef, go Eden natuna maga waina eu doko Telassar, kite?

¹³Nawota ni Hamath wai, go nawota ni Arpad, go nawota ni natokoana Sefarvaim, go ni Hena, go ni Ivvah?

¹⁴Go Hesekiah e dape tusi midiriana pae nam̃elearu ni tea tautauana maga, po peve a: go Hesekiah e sake paki ekopu ni nasum̃a ki Yehovah pano, po p̃elesa ki nia narae ni Yehovah.

¹⁵Go Hesekiah e dapasavasa narae ni Yehovah, po naga, Yehovah O, Sup̃e ki Israel, waina ku sakesaake kerub maga, nigo ku pei Sup̃e, nigo sikim̃a, ki namarakiana maga mamau puti ni maramana; nigo ku mari nakoroatelagi go maramana.

¹⁶P̃a taki nadaligam̃a, Yehovah O, po daki dorogo; p̃a wolagati namatam̃a maga, Yehovah O, po leo punusi: po dogo navasaana maga ki Sennakerib waina e dip̃aki lua ra umai naga ega vasa pinoa ki Sup̃e mauri asa.

¹⁷E pei lomau, Yehovah, nawota maga ni Assiria eu mari nalauna maga go navanua adeada maga eu pei maso maladi doko,

¹⁸Go eu nadi ki sup̃e adeada maga paki nakapu: nalakena eu da pei sup̃e maga mau, ma eu pei nawosiana ni nam̃elearu ni naatam̃oli maga, nakau go vatu; nalakena tea wanogoe eu mari puoli ki da.

¹⁹Go nalakena tea wanogoe, Yehovah Sup̃e aginami O, p̃a mauti gami, a pavara ni ko asa, m̃elu dua ki nam̃elearuna, naga namarakiana maga mamau puti ni maramana euga atae naga nigo ku pei Yehovah Sup̃e, nigo sikim̃a.

²⁰Go Isaiah natu ni Amos e dip̃aki lua pa punusi Hesekiah, po naga, Yehovah, Sup̃e ki Israel, e noa dapala nea, e naga, Natapasavasaana anigo waina ku dapasavasa asa paki nau nalo ni Sennakerib nawota ni Assiria, a po dogo e.

²¹Tea waia e pei navasaana waina Yehovah e noa e nalo kakana, e naga, Nagoroi atara ni Sion e midoaki p̃alo ki‐go po muru ki saudoa ki‐go; Yerusalem natuna nagoroi e ligiligi p̃au paki‐go.

²²Sei waina ku pasa saudoa ki nia, po pasa sa ki nia? Go ku sike nadaleom̃a dip̃a sei, po leolagi dip̃a sei? E dip̃a Tea Tapu ki Israel.

²³Pae tea tautauana anigo maga, ku pasa saudoa ki Yehovah, go ku noa naga, Ki nalaapaana ni kariot aginau maga a sake umai paki tokora vakilagi ni tava maga, paki nap̃alau ni Lebanon; go aga wo dae kotokotovi sidar varau pakilagi kakana maga, go nakau paine wia liu kakana maga: go aga wo sili paki namatap̃ago edaku maau ni tokora ni nam̃enakiana kakana, mala ni nakau ni vanua ni namasu kakana.

²⁴A kili m̃oru noai maga po munu noai vanop̃ota maga, go ki nam̃ele natuagu aga wo mari noaisara maga mamau puti ni Ityipt euga wo dap̃a garagara.

²⁵Ku da dogo naga a mari a tuai, po mari dawona ki nia sala vea mau, kite? Go sala waia a mari a e po pakilina, naga p̃a wo mari natokoana p̃aakagoroana maga euga vei taua makaka maga.

²⁶Nalakena tea wanogoe naatatoko kakada maga eu pei tea ni nakasuaana kiki, eu saram̃akoto po pinovinoi; eu dapala nam̃enau ni vanua, go dapala nataputea mamalakesa, dapala nam̃enau ni nap̃au ni nasum̃a maga, go dapala korn waina e kokolo nalakena nalagi ruatu.

²⁷Ma a atae natasake‐tokotanoana anigo, go natave‐pano‐ana anigo, go nasili‐umai‐ana anigo, go namaritausuana anigo dip̃a au.

²⁸Nalakena namaritausuana anigo dip̃a au, go nalakena namari‐lagilagi‐ana anigo e po sake umai paki nadaligagu maga, nalakena tea wanogoe aga wo doropusi tagau aginau nagisum̃a, go pauasi aginau nagolem̃a, go aga wo mari ko p̃a wo liliu pae napua waina ku pae asa umai.

²⁹Go tea waia ega wo manigo pei navaivaiana kakana: natau waia kuga wo gani ora, go natau kerua tea waina ega visou asa; go natau ketolu kuga sapura ki po dagaukotovi, po lalawo roara maga ni vaine, po gani nawada.

³⁰Go namagovai ni nasum̃a ni Yudah waina eu pei tea mautiana, euga wo moro koakoa etano, po dau ki nawada elagi.

³¹Nalakena namagovai sikai ega wo m̃elu Yerusalem po dave pano, go taua sikai ni tea mautiana maga m̃elu tava Sion: nasuisuiana ki Yehovah ega wo mari tea wanogoe.

³²Nalakena tea wanogoe Yehovah e noa dapala nea nalo ni nawota ni Assiria, e naga, Ega wo da umai paki natokoana wanogoe mau, kite dipe te nalua sikai tokora wanogoe mau, go ega wo da umai paki kivea ki nia pilake kokororum̃a mau, kite nadi ki natauakiana sikai dip̃a e mau.

³³Napua waina e pae asa umai, napua sikai maau wanogoe ega wo moro pae asa liliu, go ega wo da umai paki natokoana wanogoe mau, Yehovah e noa e.

³⁴Nalakena aga wo p̃alugoro natokoana wanogoe naga aga mauti a, nalakena kinau go nalakena tea suasua aginau David.

³⁵Go e pakilina p̃ogi wanogoe, naga agelo ki Yehovah e dave pano, po atugi naatam̃oli manu p̃onotia sikai, tivilia latolu, go manu takuna lima tokora ni nam̃enakiana ki tea ni Assiria: go ragi waina naatam̃oli maga eu duleana malip̃ogi loaloa, p̃a leo, eu pei nap̃atoko mate mau.

³⁶Go Sennakerib nawota ni Assiria e m̃elu pano, po liliu, po doko Nineveh doko.

³⁷Go e pakilina, ragi waina e do lotu ekopu ni nasum̃a ki Nisrok sup̃e aneana, naga Adrammelek go Shareser ero atugi a ki lova: go ero sava paki navanua ni Ararat pano. Go natuna Esarhaddon e maramara du oli a.