Read Nguna Togoa Etafe North 2 NAWOTA MAGA 2 Bible Online

2 NAWOTA MAGA 2 - Nguna Togoa Etafe North bible

2 NAWOTA MAGA 2

¹Go e pakilina ragi waina Yehovah e midoa ki nia naga ega tape Eliyah sake paki nakoroatelagi pae suitaviro sikai, naga Eliyah go Elisha ero pae napua adeada pano m̃elu dua ki Cilcal.

²Go Eliyah e noa ki Elisha, e naga, P̃a toko nea, a pavara ni ko asa; nalakena Yehovah e dip̃aki lua au naga aga vaki Beth‐el pano. Ma Elisha e naga, Yehovah e mauri, go naatam̃a ma e mauri, aga wo da doropusi ko mau. Go ero siwo paki Beth‐el pano.

³Go profeta natuda maga waina eu doko Beth‐el, eu dave umai punusi Elisha, po noa ki nia, eu naga, Nigo ku atae naga masoso Yehovah ega wo dape lua tea maraki dap̃au ko m̃elu dua ki‐go pano, kite? Go e naga, Io, a atae; kuga vunuta.

⁴Go Eliyah e noa ki nia, e naga, Elisha, p̃a toko nea, a pavara ni ko asa; nalakena Yehovah e dip̃aki lua au naga aga vaki Yeriko pano. Ma e naga, Yehovah e mauri, go naatam̃a ma e mauri, aga wo da doropusi ko mau. Go ero umai paki Yeriko.

⁵Go profeta natuda maga waina eu doko Yeriko eu rumai punusi Elisha, po noa ki nia, eu naga, Nigo ku atae naga masoso Yehovah ega wo dape lua tea maraki dap̃au ko m̃elu dua ki‐go pano, kite? Go e pasadara, po naga, Io, a atae; kuga vunuta.

⁶Go Eliyah e noa ki nia, e naga, P̃a toko nea, a pavara ni ko asa, nalakena Yehovah e dip̃aki lua au naga aga vaki Yordan pano. Go e naga, Yehovah e mauri, go naatam̃a ma e mauri, aga wo da doropusi ko mau. Go ero dua pano.

⁷Go naatam̃oli rualima lima ki profeta natuda maga eu pano po lawodu leana dip̃a ra uvea ki da: go nara ero lawodu nadigi ni Yordan.

⁸Go Eliyah e puati sugoro kovagoro aneana, po lulu ki nia, po atugi noai maga asa, go eu pamawota paki taleva go paki taleva, go ero surata duagoto pano natano garagara.

⁹Go e pakilina ragi waina ero duagoto sua, naga Eliyah e noa ki Elisha, e naga, P̃a tatago tea waina aga manigo mari a, pea ki aga vei tea tapeana m̃elu dua ki‐go pano. Go Elisha e naga, A pavara ni ko, matele ni naatam̃a ega vaka rua doko au.

¹⁰Go e naga, Ku datago naleo kasua sikai: ma ku pe vunusi au ragi waina aga vei tea tapeluaana m̃elu dua ki‐go pano, e pe wo dapala nogoe paki‐go; ma e pe tika, e pe wo da dapala nogoe mau.

¹¹Go e pakilina ragi waina ero do pano po do pusum̃aki, naga p̃a leo, kariot sikai ni nakapu e pakilina, go horse maga ni nakapu, waina eu mari ra eu pamawota; go Eliyah e pae suitaviro sikai sake paki nakoroatelagi pano.

¹²Go Elisha e punusi a, go e pioso, po naga, Mama aginau, mama aginau, kariot maga ni Israel, go naatam̃oli maga ni horse kakana maga! Go e da moro punusi a mau: go e puati sugoro aneana maga, po puap̃orae ra matele edua asa.

¹³Go e dape dakati sugoro kovagoro ki Eliyah waina e dowo m̃elu dua ki nia, po liliu pano po lawodu nadigi ni Yordan.

¹⁴Go e dape sugoro kovagoro ki Eliyah waina e dowo m̃elu dua ki nia, po atugi noai maga asa, po naga, Yehovah Sup̃e ki Eliyah wai? Go ragi waina e atugi noai maga, eu pamawota paki taleva go paki taleva: go Elisha e duagoto pano.

¹⁵Go ragi waina profeta natuda maga waina eu doko Yeriko eu punusi a e leana dip̃a ra, eu naga, Naata ni Eliyah e doko Elisha. Go eu rumai naga euga sua e, po kolo suai natano naraena.

¹⁶Go eu noa ki nia, eu naga, P̃a leo, naatam̃oli kasua rualima lima eu doko sikoti tea suasua anigo maga; p̃a suasua ki da, au pavara ni ko asa, naga euga vano po laaga tea maraki anigo: mase alagoro Naata ni Yehovah e pe tape a sake, po nadi ki nia te tava sikai, kite paki te nap̃aloa sikai. Go e naga, Kuga ta dip̃aki lua ra pano mau.

¹⁷Go ragi waina eu pasadie a pa pa e maliere, e naga, Kuga tip̃aki lua ra pano. Nalakena tea wanogoe eu dip̃aki lua naatam̃oli rualima lima eu pano; go eu laaga asa naaleatia dolu, ma eu da pap̃ai a mau.

¹⁸Go eu moro liliu umai punusi a ragi waina e ko doko Yeriko doko. Go e noa ki da, e naga, Kinau a da noa ki mu asa naga kuga ta pano mau, kite?

¹⁹Go naatam̃oli maga ni natokoana eu noa ki Elisha, eu naga, P̃a leo, au pavara ni ko asa, natokoana waia e doko tokora masauniana, dapala waina nawota aginau e punusi a: ma noai e sa, go navanua e p̃ara.

²⁰Go e naga, P̃a maginau dape lasa vau sikai umai, po daki natasimena paki asa. Go eu dape a umai dua e asa.

²¹Go e paki namata ni noai maga pano, po daki natasimena wanogoe paki asa, po naga, Yehovah e noa dapala nea, e naga, A mari noai maga waia eu po mauri; go pae ragi waia pa pa, namateana kite navisola‐sa‐ana ega wo da moro m̃elu asa mau.

²²Go dapala nogoe noai maga eu peani namauriana pa pa paki naaleatia waia, pataka ni navasaana ki Elisha waina e noa e.

²³Go e sake m̃elu dua ki tokora wanogoe po paki Beth‐el pano: go ragi waina e do sake pae napua pano, piakirikiri maga eu dave m̃elu dua ki natokoana umai, po mari saudoa ki nia, eu noa ki nia, eu naga, P̃a sake pano, nigo p̃au m̃asua; p̃a sake pano, nigo p̃au m̃asua.

²⁴Go e leo kitaku po punusi ra, po pasa sa ki da pae nagisa ni Yehovah. Go bear goroi dua ero dave m̃elu dua ki namalasi umai, po pua p̃oraworae piakirikiri maga rualima pati tamate dua kakada.

²⁵Go e m̃elu dua ki tokora wanogoe po paki tava ni Karmel pano, go e moro m̃elu dua ki tokora wanogoe po liliu paki Samaria.