Read Nguna Togoa Etafe North 2 NAWOTA MAGA 20 Bible Online

2 NAWOTA MAGA 20 - Nguna Togoa Etafe North bible

2 NAWOTA MAGA 20

¹Naaleatia maga wanogoe Hesekiah e sasana, po m̃aladigi naga ega mate. Go profeta Isaiah natu ni Amos e umai punusi a, po noa ki nia, e naga, Yehovah e noa dapala nea, e naga, P̃a poroa ki nasum̃a anigo; nalakena p̃a wo mate, po da mauri mau.

²Go e doa naraena paki naravita, po dapasavasa paki Yehovah, po naga,

³P̃a midoa ki nia, Yehovah O, a pavara ni ko asa, naga a surata naraem̃a doko nalomauana go ki p̃op̃o wialua, po mari tea waina e p̃ia namatam̃a. Go Hesekiah e dagi p̃arua.

⁴Go e pakilina, ragi waina Isaiah e pano, ma e ko da m̃elu dua ki m̃aleoputo ni roara pano mau, naga navasaana ki Yehovah e umai paki nia,

⁵e naga, P̃a moro liliu, po noa ki Hesekiah tea maraki ni narei aginau, p̃a naga, Yehovah, Sup̃e ki tamam̃a David e noa dapala nea, e naga, A dogo natapasavasaana anigo, a punusi naririmatam̃a maga: p̃a leo, aga wo mari pauri ko: naaleatia ketolu p̃a sake paki nasum̃a ki Yehovah pano.

⁶Go aga wo sokari naaleatia anigo maga ki natau rualima sikai tamate lima; go aga wo pualua ko go natokoana waia m̃elu dua ki nam̃elearu ni nawota ni Assiria; go aga wo p̃alugoro natokoana waia nalakena kinau go nalakena tea suasua aginau David.

⁷Go Isaiah e naga, P̃a tape keke sikai ni napuliva. Go eu dape a po doropusi a doko topu, go e moro mauri.

⁸Go Hesekiah e noa ki Isaiah, e naga, Nasava ega wo pei navaivaiana naga Yehovah ega wo mari pauri au, go naga aga wo sake pano paki nasum̃a ki Yehovah naaleatia ketolu?

⁹Go Isaiah e naga, Tea waia ega wo manigo pei navaivaiana m̃elu Yehovah, naga Yehovah ega wo mari tea waina e sai a: melu ega risu paki kivea pano navasiana rualima sikai, kite ega liliu pano navasiana rualima sikai, kite?

¹⁰Go Hesekiah e pasadara, po naga, E pei tea masalesale naga melu ega risu paki kivea pano navasiana rualima sikai: io, ma melu ega moro liliu navasiana rualima sikai.

¹¹Go profeta Isaiah e pioso paki Yehovah: go e mari melu e moro liliu navasiana rualima sikai, waina e siwo pakitano asa namata ni elo ki Ahas.

¹²Ragi sikai maau wanogoe Berodakbaladan natu ni Baladan nawota ni Babelon, e dip̃aki lua tusi midiriana maga go navituaana sikai pa punusi Hesekiah: nalakena e dogo naga Hesekiah e sasana.

¹³Go Hesekiah e maro ara, po pisei ki da tea mamau puti waina e doko nasum̃a ni naleo masauniana aneana maga, silver, go kold, go tea ni nap̃o wia, go naroro wia liu, go nasum̃a ni nalikau aneana, go tea mamau waina e pei tea vap̃aiana nasum̃a ni natauakiana ni naleo wia aneana: te navatuna e da doko nasum̃a aneana, kite doko usuraki namarakiana aneana, waina Hesekiah e da pisei ki da asa mau.

¹⁴Go profeta Isaiah e umai punusi nawota Hesekiah, po noa ki nia, e naga, Naatam̃oli maga wanogoe eu noa nasava? Go eu pae esava umai punusi ko? Go Hesekiah e naga, Eu pae navanua ni uvea umai, pae Babelon.

¹⁵Go e naga, Eu punusi nasava ekopu ni nasum̃a anigo? Go Hesekiah e pasadara, po naga, Eu punusi sua tea mamau puti waina e doko nasum̃a aginau: te navatuna ni tea tauakiana aginau maga e da doko waina a da pisei ki da asa mau.

¹⁶Go Isaiah e noa ki Hesekiah, e naga, P̃a rogo navasaana ki Yehovah.

¹⁷P̃a leo, naaleatia maga euga wo umai, naga tea mamau puti waina e doko nasum̃a anigo, go tea waina tamam̃a maga eu daua ki nia pa pa paki naaleatia waia, euga wo pei tea viragi‐lua‐pavakotoana paki Babelon pano: te navatuna ega wo da pei tea toropusiana ega toko mau, Yehovah e noa e.

¹⁸Go natum̃a naanoai maga waina euga m̃elu ako, waina p̃a wo pesi ra, euga wo piragi lua pavakoto ara pano; go euga wo pei atavau maga ni nasum̃a ni naveinawotaana ki nawota ni Babelon.

¹⁹Go Hesekiah e noa ki Isaiah, e naga, Navasaana ki Yehovah waina ku noa e, e p̃ia. Go e moro naga, E pe wo dapala nogoe, ma natam̃ateana go nalomauana ero pe wo da doko naaleatia aginau maga mau, kite?

²⁰Go nawosiana maga ki Hesekiah, go nakasuaana aneana mamau, go takana waina e mari luku ni noai, go napua ni noai, po mari noai e sara paki natokoana, eu da pei tea midiriana tusi ni nawosiana ni naaleatia maga ki nawota maga ni Yudah, kite?

²¹Go Hesekiah e maturu sikoti tamana maga: go natuna Manasseh e maramara du oli a.