Read Nguna Togoa Etafe North 2 NAWOTA MAGA 22 Bible Online

2 NAWOTA MAGA 22 - Nguna Togoa Etafe North bible

2 NAWOTA MAGA 22

¹Yosiah e pei tea ni natau latolu ragi waina e pae asa maramara; go e maramara Yerusalem natau rualima dolu tamate sikai: go p̃ilana nagisana Yedidah, Adaiah ni Boskath natuna nagoroi.

²Go e mari tea waina e leana namata ni Yehovah, po surata napua mamau ki tamana David, po da dawasi m̃elu dua ki nia paki taleva ni matua kite paki taleva ni mawiri mau.

³Go e pakilina natau kerualima sikai tamate latolu ki nawota Yosiah, naga nawota e dip̃aki lua Shafan natu ni Asaliah, natu ni Meshullam tea midiri, paki nasum̃a ki Yehovah, e naga,

⁴P̃a sake pano punusi Hilkiah tea viri warua liu, naga ega veve totowo ni m̃ane waina e pei tea viragiana umai paki ekopu ni nasum̃a ki Yehovah, waina tea vavaigoro maga ni namata eu pilae saisai ki nia pae narei:

⁵Go euga vitua ki nia paki nam̃elearu ni naatam̃oli maga waina eu maraki dap̃au nawosiana ni nasum̃a ki Yehovah: go nara euga vitua ki nia paki tea wosiwosi maga waina eu doko ekopu ni nasum̃a ki Yehovah, naga euga tavagi piri malo mawora maga ni nasum̃a;

⁶Paki mataisau maga, go paki tea tavagi maga, go paki mataisau maga ni vatu; go naga euga vakotovi napapa go vatu taeana maga naga euga tavagi piri nasum̃a.

⁷Ma eu da datago napuku sikai ki da mau nalo ni m̃ane waina e pei tea vituakiana paki nam̃elearuda; nalakena eu mari leana.

⁸Go Hilkiah tea viri warua liu e noa ki Shafan tea midiri, e naga, A po pap̃ai tusi ni nawotaeana ekopu ni nasum̃a ki Yehovah. Go Hilkiah e dua Shafan tusi wanogoe, go e peve a.

⁹Go Shafan tea midiri e umai punusi nawota, po moro magi nawota dape navasaana umai, e naga, Tea suasua anigo maga eu daki lua m̃ane waina e pei tea vap̃aiana ekopu ni nasum̃a, po pitua ki nia paki nam̃elearu ni naatam̃oli maga waina eu maraki dap̃au nawosiana ni nasum̃a ki Yehovah.

¹⁰Go Shafan tea midiri e noa ki nawota, e naga, Hilkiah tea viri e dua au tusi sikai. Go Shafan e peve a narae ni nawota.

¹¹Go e pakilina, ragi waina nawota e dogo navasaana maga ni tusi ni nawotaeana, naga e pua p̃orae sugoro aneana maga.

¹²Go nawota e dip̃aki Hilkiah tea viri, go Ahikam natu ni Shafan, go Akbor natu ni Mikaiah, go Shafan tea midiri, go Asaiah tea suasua ki nawota,

¹³e naga, Kuga vano, kuga maginau pusuusu ki Yehovah, go magi narei, go magi Yudah mamau, nalo ni navasaana maga ni tusi waia waina e po pei tea vap̃aiana: nalakena namaritausuana ki Yehovah waina e pavaga dip̃a gida e p̃arua, nalakena tamagida maga eu da dogo parati ki navasaana maga ni tusi waia mau, naga euga mari pataka ni tea mamau puti waina e pei tea midiriana asa nalo kakagida.

¹⁴Go Hilkiah tea viri, go Ahikam, go Akbor, go Shafan, go Asaiah, eu pa punusi Huldah profeta nagoroi, nagoroi ki Shallum natu ni Tikvah, natu ni Harhas, tea vavaigoro tea suniana maga; (go nae e doko Yerusalem doko tokora kerua;) go eu pusum̃aki paki nia.

¹⁵Go e noa ki da, e naga, Yehovah, Sup̃e ki Israel, e noa dapala nea, e naga, Kuga noa ki naatam̃oli waina e dip̃aki lua mu umai punusi au, kuga naga,

¹⁶Yehovah e noa dapala nea, e naga, P̃a leo, aga wo piragi nasaana ega wo pakilina ki tokora waia, go ki naatatoko kakana maga, pataka ni navasaana maga mamau puti ni tusi waina nawota ni Yudah e peve a:

¹⁷Nalakena eu doropusi au, po dap̃ara ki tea ni nap̃o wia paki sup̃e p̃ota maga, po mari au a maeto ki nawosiana mamau puti ni nam̃elearuda; nalakena tea wanogoe namaritausuana aginau ega wo pavaga dip̃a tokora waia, go ega wo da pei tea vuepunueana mau.

¹⁸Ma paki nawota ni Yudah, waina e dip̃aki lua mu umai naga kuga vusuusu ki Yehovah, kuga noa ega tapala nea, kuga naga, Yehovah, Sup̃e ki Israel, e noa dapala nea, e naga, Nalo ni navasaana maga waina ku dogo ra,

¹⁹Nalakena nap̃op̃om̃a e midoaki doa, go ku dum̃am̃a doro ko pakitano narae ni Yehovah, ragi waina ku dogo tea waina a pasa asa dip̃a tokora waia, go dip̃a naatatoko kakana maga, naga euga wo pei maso maladi sikai go navasasakiana sikai, go ku pua p̃orae sugoro anigo maga, po dagi naraegu; kinau ma a po dogo ko, Yehovah e noa e.

²⁰Nalakena tea wanogoe, p̃a leo, aga wo saisai ki‐go paki tamam̃a maga, go p̃a wo pei tea saisaikiana paki matigom̃a natam̃ateana, go namatam̃a eroga wo da punusi nasaana mamau waina aga wo mari a ega vakilina ki tokora waia mau. Go eu moro dape navasaana liliu umai punusi nawota.