Read Nguna Togoa Etafe North 2 NAWOTA MAGA 24 Bible Online

2 NAWOTA MAGA 24 - Nguna Togoa Etafe North bible

2 NAWOTA MAGA 24

¹Doko naaleatia aneana maga, Nebukadnessar nawota ni Babelon e sake umai, go Yehoiakim e po pei tea suasua aneana po maneana suasua natau dolu: go e maradoa po mari p̃auluulu dip̃a e.

²Go Yehovah e dip̃aki lua taua maga ni tea ni Kaldea naga euga marimari dip̃a e, go taua maga ni tea ni Siria, go taua maga ni Moab, go taua maga ni Ammon natuna maga, po dip̃aki lua ra pano dip̃a Yudah naga euga mari puoli ki nia, pataka ni navasaana ki Yehovah, waina e noa e pae nam̃elearu ni tea suasua aneana profeta maga.

³E pei natip̃akiana ki Yehovah naga tea wanogoe e pakilina ki Yudah, naga euga vei tea maripuoli‐kiana pa dua ki naraena, nalakena namarinaleosaana maga ki Manasseh, dapala tea mamau puti waina e mari ra;

⁴Go e moro pei nalakena nada tautau waina e daki nia; nalakena e mari Yerusalem e pura ki nada tautau: go Yehovah e da masauna naga ega maneana midoakikorokoro e mau.

⁵Go nawosiana maga ki Yehoiakim, go tea mamau puti waina e mari ra, eu da pei tea midiriana tusi ni nawosiana ni naaleatia maga ki nawota maga ni Yudah, kite?

⁶Go Yehoiakim e maturu sikoti tamana maga: go natuna Yehoiakin e maramara du oli a.

⁷Go nawota ni Ityipt e da moro m̃elu dua ki navanua aneana umai mau: nalakena nawota ni Babelon e puati tea mamau puti waina e pei agi nawota ni Ityipt, pae nap̃ap̃a noaisara ni Ityipt pano pa pa liliu noaisara Eufrates.

⁸Yehoiakin e pei tea ni natau rualima sikai tamate latolu ragi waina e pae asa maramara; go e maramara Yerusalem atelagi dolu: go p̃ilana nagisana Nehushta, Elnathan ni Yerusalem natuna nagoroi.

⁹Go e mari tea waina e sa namata ni Yehovah, dapala tea mamau puti waina tamana e pea mari a.

¹⁰Ragi sikai maau wanogoe tea suasua maga ki Nebukadnessar nawota ni Babelon, eu sake umai dip̃a Yerusalem, go natokoana e pei tea kelugoroana.

¹¹Go Nebukadnessar nawota ni Babelon e umai paki natokoana, ragi waina tea suasua aneana maga eu do kelugoro e;

¹²Go Yehoiakin nawota ni Yudah e dave pano po dum̃ana pitua ki nia paki nam̃elearu ni nawota ni Babelon, nara ma p̃ilana, go tea suasua aneana maga, go tea maraki aneana maga, go tasiga aneana maga eu mamau: go nawota ni Babelon e dape pavakoto asa, e pei natau kelatolu ni namaramaraana aneana.

¹³Go e piragi lua pavakoto pano naleo tauakiana wia maga mamau puti ni nasum̃a ki Yehovah, go naleo tauakiana wia maga ni nasum̃a ki nawota, po dae p̃oraworae ki puti ki lasa maga ni kold waina Solomon nawota ni Israel e mari ra nasum̃a tapu ki Yehovah, dapala waina Yehovah e noa sua e.

¹⁴Go e piragi lua pavakoto Yerusalem mamau pano, go tea maraki maga mamau puti, go naatam̃oli maga ni navakalo mamau puti, tea viragilua‐pavakotoana tivilia sikai, go mataisau maga, go mataisau ni airon mamau puti; te naata sikai e da pei tea toropusiana doko mau, ma tea tika maga ni narei ni navanua eu sikida.

¹⁵Go e piragi lua pavakoto Yehoiakin paki Babelon pano; go nawota p̃ilana, go nawota anagoroi maga, go tasiga aneana maga, go naatam̃oli vakilagi maga ni navanua, e piragi lua pavakoto ara m̃elu dua ki Yerusalem pano paki Babelon.

¹⁶Go naatam̃oli marimatua maga manu larua, go mataisau maga go mataisau ni airon manu sikai, tea mamau puti waina eu kasua naga eu mariatae mari navakalo, tea maga wanogoe nawota ni Babelon e piragi lua pavakoto ara pano paki Babelon.

¹⁷Go nawota ni Babelon e mari Mattaniah, Yehoiakin aloana, e pei nawota du oli a, po doa nagisana e pei Sedekiah.

¹⁸Sedekiah e pei tea ni natau rualima dua tamate sikai ragi waina e pae asa maramara; go e maramara Yerusalem natau rualima sikai tamate sikai: go p̃ilana nagisana Hamutal, Yeremiah ni Libnah natuna nagoroi.

¹⁹Go e mari tea waina e sa namata ni Yehovah, dapala tea mamau puti waina Yehoiakim e pea mari a.

²⁰Go tea wanogoe e pakilina Yerusalem go Yudah nalakena namaetoana ki Yehovah, pa pa e kopasi lua ra m̃elu dua ki naraena pano: go Sedekiah e mari p̃auluulu dip̃a nawota ni Babelon.