Read Nguna Togoa Etafe North 2 NAWOTA MAGA 25 Bible Online

2 NAWOTA MAGA 25 - Nguna Togoa Etafe North bible

2 NAWOTA MAGA 25

¹Go e pakilina natau keloveti ni namaramaraana aneana, atelagi kerualima, nakup̃a kerualima ni atelagi, naga Nebukadnessar nawota ni Babelon e umai, nara ma taua ni navakalo aneana mamau, po mari dip̃a Yerusalem, po m̃enakigoro e; go eu davagi p̃aaka maga dip̃a e dalivirigoro e.

²Go natokoana e pei tea kelugoroana pa pa paki natau kerualima sikai tamate sikai ki nawota Sedekiah.

³Nakup̃a keloveti ni atelagi kevati, navitoloana e p̃arua natokoana, dapala waina navinaga agi narei ni navanua e dika.

⁴Go malo mawora sikai e pei tea mariana p̃aaka ni natokoana, go naatam̃oli maga ni navakalo eu sava puti pano p̃ogi pae napua ni namata‐pua namawota ni p̃aaka dua, waina e doko pisari roara ki nawota: (go naka ni Kaldea eu kelugoro natokoana daliviri:) go nawota e pae napua ni Arabah pano.

⁵Ma taua navakalo ni tea ni Kaldea eu sava dausi nawota, po pa parati ki nia malo matemate maga ni Yeriko: go taua mamau ni navakalo aneana eu daperavera m̃elu dua ki nia pano.

⁶Go eu puati nawota, po piragi lua e sake paki Riblah pano punusi nawota ni Babelon; go eu pasa p̃otae a.

⁷Go eu atugi Sedekiah natuna maga naraena, po asiri lua namata ni Sedekiah, po soli a ki tea moti, po piragi lua pavakoto asa paki Babelon pano.

⁸Go atelagi kelima, nakup̃a kelarua ni atelagi, waina e pei natau kerualima sikai tamate loveti ki nawota Nebukadnessar, nawota ni Babelon, Nebusaradan nap̃au ni tea vavaigoro maga, tea suasua sikai ki nawota ni Babelon, e umai paki Yerusalem:

⁹Go e dap̃ara ki nasum̃a ki Yehovah, go nasum̃a ki nawota; go nasum̃a maga mamau puti ni Yerusalem, sara nasum̃a ki tea vakilagi maga, e dap̃ara ki da.

¹⁰Go taua navakalo mamau ni tea ni Kaldea, waina nara ma nap̃au ni tea vavaigoro maga eu mamau doko, eu dakai p̃aaka maga ni Yerusalem daliviri.

¹¹Go namagovai ni narei waina eu pei tea toropusiana doko natokoana, go tea maga waina eu dowo pano paki nawota ni Babelon, go namagovai ni tea laapa waina eu doko, Nebusaradan nap̃au ni tea vavaigoro maga, e piragi lua pavakoto ara pano.

¹²Ma nap̃au ni tea vavaigoro maga e doropusi tea tika ni navanua eu doko naga euga vei tea wosiwosi maga ni vaine, go tea wosiwosi maga ni natano.

¹³Go tip̃a maga ni brass waina eu doko nasum̃a ki Yehovah, go laketano maga go lasa takiana warua ni noai waina eu doko nasum̃a ki Yehovah, tea ni Kaldea eu mari p̃oroworosi ra, po dape lua pavakoto brass kakada paki Babelon pano.

¹⁴Go pot maga, go savel maga, siloa ni meru maga, go spun maga, go lasa mamau puti ni brass waina eu mari nawosiana ni nasuasuaana asa, eu dape lua pavakoto ara pano.

¹⁵Go pan ni nakapu vavaga, go besin maga; sara navatuna ni kold, go sara navatuna ni silver, nap̃au ni tea vavaigoro maga e dape lua ra pano.

¹⁶Tip̃a dua, lasa takiana warua ni noai, go laketano maga waina Solomon e magi nasum̃a ki Yehovah mari ra; brass ni lasa mamau puti wanogoe eu mari sap̃o pei tea rowogi‐ataeana.

¹⁷Navarau‐pakilagiana ni tip̃a sikai e pei kubit rualima sikai tamate latolu, go nap̃auna e pei brass: go navarau‐pakilagiana ni nap̃auna e pei kubit dolu; go tea turuturua go pomekranet maga waina eu doko daliviri nap̃auna eu mamau puti pei brass: go tip̃a kerua e moro dakiusi a, e pilake tea turuturua.

¹⁸Go nap̃au ni tea vavaigoro maga e piragi lua Seraiah, tea viri warua liu, go Sefaniah kerua kakana, go tea vavaigoro dolu ni namata:

¹⁹Go eu puati m̃elu natokoana, atavau sikai waina e pei tea lawokiana e dap̃au naatam̃oli maga ni navakalo; go naatam̃oli maga ni natokoana waina eu lawodu nap̃irikia ni nawota eu lima kakada; go tea midiri, tea maraki ki taua, waina e piragi saisai ki narei ni navanua; go naatam̃oli rualima latesa ni narei ni navanua, waina eu pei tea vap̃aiana doko natokoana.

²⁰Go Nebusaradan tea maraki ni tea vavaigoro maga e piragi lua pavakoto ara pano paki Riblah punusi nawota ni Babelon.

²¹Go nawota ni Babelon e atugi ra, po doropusi ra paki namateana doko Riblah, doko navanua ni Hamath. Go dapala nogoe Yudah eu pei tea viragilua‐pavakotoana m̃elu dua ki navanua adeada pano.

²²Go narei maga waina eu pei tea toropusiana doko navanua ni Yudah, waina Nebukadnessar nawota ni Babelon e doropusi ra eu doko, e mari Cedaliah natu ni Ahikam, natu ni Shafan, tea maramara, e pei tea tap̃au dap̃au ra.

²³Go ragi waina tea maraki maga ni taua maga ni navakalo, nara ma naatam̃oli adeada maga, eu dogo naga nawota ni Babelon e mari Cedaliah e pei tea maramara, eu rumai paki Mispah punusi Cedaliah, Ishmael natu ni Nethaniah, go Yohanan natu ni Kareah, go Seraiah natu ni Tanhumeth tea ni Netofah, go Yaasaniah natu ni naatam̃oli sikai ni Maakah, nara ma naatam̃oli adeada maga eu mamau.

²⁴Go Cedaliah e pivisa paki da go paki naatam̃oli adeada maga, po noa ki da, e naga, Kuga ta mataku mau nalakena tea suasua maga ni tea ni Kaldea: kuga toko navanua doko, po magi nawota ni Babelon suasua, go kuga wo doko p̃ia.

²⁵Ma e pakilina atelagi kelarua, naga Ishmael natu ni Nethaniah, natu ni Elishama, ni nawora ni naveinawotaana, e umai nara ma naatam̃oli rualima sikai eu mamau, po atugi Cedaliah, go e mate, nara ma tea ni Yudea go tea ni Kaldea waina eu mamau doko Mispah.

²⁶Go narei mamau, tea vakitano maga go tea vakilagi, maga, go tea maraki maga ni taua maga ni navakalo, eu duleana po paki Ityipt pano: nalakena eu matau ki tea ki Kaldea.

²⁷Go e pakilina natau kerualima dolu tamate larua ni naviragi‐luapavakotoana ni Yehoiakin nawota ni Yudah, atelagi kerualima sikai tamate dua, nakup̃a kerualima dua tamate larua ni atelagi, naga Evil‐merodak nawota ni Babelon, doko natau vea waina e pae asa maramara, e sike nap̃au ni Yehoiakin nawota ni Yudah po kakaro lua e m̃elu dua ki nasum̃a ni navavaigoroana.

²⁸Go e pasa matemate paki nia, po lawo ki malo tasake aneana e pakilagi liu malo tasake ki nawota maga waina eu mamau doko Babelon.

²⁹Go e sawo lua sugoro aneana maga ni nasum̃a ni navavaigoroana, po ganikani pitip̃atip̃a wede ki nawota sara naaleatia ni namauriana aneana.

³⁰Go nawota e dua e navinaga pitip̃atip̃a, e dua e matele sikai sara naaleatia, naaleatia maga mamau puti ni namauriana aneana.