Read Nguna Togoa Etafe North 2 NAWOTA MAGA 3 Bible Online

2 NAWOTA MAGA 3 - Nguna Togoa Etafe North bible

2 NAWOTA MAGA 3

¹Go natau kerualima sikai tamate latolu ki Yehoshafat nawota ni Yudah, Yehoram natu ni Ahab e pae asa maramara Samaria dap̃au Israel, go e maramara natau rualima sikai tamate dua.

²Go e mari tea waina e sa namata ni Yehovah; ma e da mari dapala waina tamana e pea mari a, go dapala waina p̃ilana e pea mari a mau: nalakena e doropusi tea lawodu ni Baal waina tamana e mari a.

³Ma e puluti namarinaleosaana maga ki Yeroboam, natu ni Nebat, waina e mari Israel eu mari naleo sa; e da m̃elu dua ki nia pano mau.

⁴Go Mesha, nawota ni Moab, e pei talakea ni shiip; go sara natau e pitua paki nawota ni Israel ki shiip natuna manu p̃onotia sikai, go ki shiip anoai manu p̃onotia sikai, pilake nam̃auda.

⁵Ma e pakilina, ragi waina Ahab e mate, naga nawota ni Moab e mari p̃auluulu dip̃a nawota ni Israel.

⁶Go ragi sikai maau wanogoe nawota Yehoram e m̃elu dua ki Samaria pano po piragi saisai ki Israel mamau.

⁷Go e pano po dip̃aki lua paki Yehoshafat nawota ni Yudah, po naga, Nawota ni Moab e mari p̃auluulu dip̃a au: toroga rua paki navakalo dip̃a Moab, kite? Go e naga, Toroga rua pano: toro pataka sikai, narei aginau narei anigo, horse aginau maga horse anigo maga.

⁸Go e naga, Seve napua tuga vae asa sake pano? Go e pasadara, po naga, Napua pae masop̃alo paki Edom.

⁹Go nawota ni Israel e pano, go nawota ni Yudah, go nawota ni Edom eu mamau: go eu surata daliviri nasurataana ni naaleatia larua: go noai agi taua ni navakalo, go agi nalo tuavati maga waina eu dausi ra e dika.

¹⁰Go nawota ni Israel e naga, Awi! Yehovah e soso saisai ki nawota dolu waia naga ega vitua ki da paki nam̃elearu ni Moab.

¹¹Ma Yehoshafat e naga, Te profeta sikai ki Yehovah e da doko nea naga tuga vusuusu ki Yehovah asa, kite? Go tea suasua maga ki nawota ni Israel sikai kakada e pasadara, po naga, Elisha, Shafat natuna waina e daki noai nam̃elearu ni Eliyah, nae e doko nea.

¹²Go Yehoshafat e naga, Navasaana ki Yehovah e sikoti a doko. Go nawota ni Israel, nara ma Yehoshafat, go nawota ni Edom, eu siwo pano punusi a.

¹³Go Elisha e noa ki nawota ni Israel, e naga, Aga kasa ki‐go? P̃a vano punusi profeta maga ki tamam̃a, go profeta maga ki p̃ilam̃a. Go nawota ni Israel e noa ki nia, e naga, Ee: nalakena Yehovah e soso saisai ki nawota dolu waia naga ega vitua ki da paki nam̃elearu ni Moab.

¹⁴Go Elisha e naga, Yehovah ki taua maga e mauri, waina a lawodu naraena, e pe ta pei naga a dodomadagani Yehoshafat nawota ni Yudah, a pe ta leo punusi ko, kite midoa ki‐go mau.

¹⁵Ma p̃a maginau piragi aurea sikai umai punusi au. Go e pakilina ragi waina aurea e p̃okati nagalo, naga nam̃elearu ni Yehovah e puvua umai doko asa.

¹⁶Go e naga, Yehovah e noa dapala nea, e naga, Nap̃aloa garagara waia ega vura ki namata noai maga.

¹⁷Nalakena Yehovah e noa dapala nea, e naga, Kuga wo da punusi nalagi mau, go kuga wo da punusi usa mau, ma nap̃aloa waia ega vei tea vakavuroana ki noai: go kuga wo munu, nimu ma katel animu, go nalo tuavati animu maga.

¹⁸Go tea wanogoe e pei naleo masalesale sikai namata ni Yehovah: ega wo moro pitua ki tea ni Moab paki nam̃elearumu.

¹⁹Go kuga wo atugi sara natokoana maga ni p̃aaka, go sara natokoana wia maga, po dae kotokotovi sara nakau wia maga, po donigoro namata noai maga mamau puti, po diugoro sara matele wia maga ni natano ki vatu kirikiri maga.

²⁰Go e pakilina malip̃ogi ki nia, ragi ni navituaana ni naviriana ni navinaga, naga p̃a leo, noai e pae napua ni Edom umai, go navanua e pei tea vakavuroana ki noai.

²¹Go ragi waina tea ni Moab eu dogo naga nawota maga eu sake umai naga euga mari navakalo dip̃a ra, eu dum̃ada piragi saisai ki da, tea mamau puti waina eu mariatae suni nalikau, natureai maga paki tea matua maga, po pano po lawodu kokoi.

²²Go eu duleana malip̃ogi loaloa, go elo e maramalagati noai, go tea ni Moab eu punusi noai leana dip̃a ra e miala dapala nada:

²³Go eu naga, Tea waia e pei nada; nawota maga eu po pei tea atugiana lomau, go eu po dum̃ada atugi ra sara naata dip̃a taina: nalakena tea wanogoe Moab, tuga vano, tuga tape pavakoto.

²⁴Go ragi waina eu rumai paki tokora ni nam̃enakiana ki Israel, tea ni Israel eu duleana po atugi tea ni Moab, go eu sava m̃elu dua ki naraeda pano: ma eu sava dausi ra doko do atugi tea ni Moab doko do pano.

²⁵Go eu dap̃olosiwo ki natokoana maga; go eu nadi ki vatu adeada sara naata sikasikai paki sara matele wia maga ni natano pa pa e pei tea vakavuroana; go eu donigoro sara namata noai maga, po dae kotokotovi nakau wia maga mamau puti: pa pa paki Kir‐hareseth eu doropusi a e pei vatu mau doko; go tea vulua ki vatu maga eu dalivirigoro e po atugi a.

²⁶Go ragi waina nawota ni Moab e punusi naga navakalo e kasua sa dip̃a e, e piragi naatam̃oli p̃onotia larua waina eu puati lova eu sikoti a, naga euga duap̃ora paki nawota ni Edom: ma eu mari sa.

²⁷Go e puati natuna takalapa waina e pe wo maramara du oli a, po pitua ki nia e pei navituaana tap̃arakiana sikai elagi ni p̃aaka. Go namaritausuana warua e pakilina dip̃a Israel: go eu m̃elu dua ki nia, po liliu paki navanua adeada pano.