Read Nguna Togoa Etafe North 2 NAWOTA MAGA 4 Bible Online

2 NAWOTA MAGA 4 - Nguna Togoa Etafe North bible

2 NAWOTA MAGA 4

¹Go profeta natuda maga nagoroi ki sikai kakada e pioso paki Elisha, po naga, Tea suasua anigo aguwota e mate: go ku atae naga tea suasua anigo e matau ki Yehovah: go tea vitua ki tea seakiana e po umai naga ega vuati natugu dua naga eroga vei naviti maga.

²Go Elisha e noa ki nia, e naga, Aga manigo mari nasava? P̃a noa kinau asa; ku peani nasava e doko nasum̃a anigo? Go e naga, Tea suasua nagoroi anigo e da peani te navatuna doko nasum̃a mau, ma lasa sikai ni naroro e sikina.

³Go e naga, P̃a vano, po sea paki tea ni m̃aladigi ki‐go mamau puti usuraki, po datagovi ra ki lasa maga, lasa p̃alo maga; euga ta pisa maau mau.

⁴Go p̃a vaki ekopu ni nasum̃a anigo, nimu ma natum̃a maga, po kokoro namata, go p̃a taki naroro paki lasa maga wanogoe; go p̃a vua daki tea waina ega vura.

⁵Go e m̃elu dua ki nia pano paki ekopu ni nasum̃a aneana, nara ma natuna maga, po kokoro namata; go nara ero maneana dape lasa maga umai dua e ara, go e daki naroro paki ara.

⁶Go e pakilina ragi waina lasa maga eu po pura, naga e noa ki natuna, e naga, P̃a moro dape lasa sikai umai dua au asa. Go e noa ki nia, e naga, Te lasa sikai e da moro doko. Go naroro e ko doko.

⁷Go e umai po noa ki naatam̃oli ki Sup̃e asa. Go e naga, P̃a vano po sori naroro seara po pakotovi naulu anigo, go tea waina ega ko doko ega vei tea ni namauriana animu ma natum̃a maga.

⁸Go e pakilina naaleatia sikai naga Elisha e paki Shunem pano, paki tokora waina nagoroi sogolapa sikai e doko asa; go e piragi soki a naga ega kanikani. Go e dapala nogoe sara ragi waina e do pae napua wanogoe pano, naga e dawasi paki asa naga ega kanikani.

⁹Go e noa ki anawota, e naga, P̃a leo, a atae naga naatam̃oli waia waina e do surata liu gida sara ragi, e pei naatam̃oli tapu sikai ki Sup̃e.

¹⁰Tuga lawo ki em̃ago kiki sikai tagona ni elagi, a pavara ni ko asa; go tuga maneana doropusi nawewele sikai asa, go wede sikai, go tea tasake sikai, go nakau ni nasulu sikai: ega wo doko, ragi waina ega umai punusi gida, naga ega wo paki asa.

¹¹Go e pakilina naaleatia sikai naga e umai paki tokora wanogoe po sili paki em̃ago wanogoe, po one asa.

¹²Go e noa ki Cehasi tea suasua aneana, e naga, P̃a soso nagoroi ni Shunem waina umai. Go e soso e umai, go e lawodu naraena.

¹³Go e noa ki nia, e naga, P̃a noa ki nia naga, P̃a leo, ku midoaki parati ki gami ki namidoaki‐parati‐kiana wia waia; nasava ega manigo pei tea mariana? Ku masauna naga aga manigo pasa navasaana sikai paki nawota, kite paki tea maraki taua ni navakalo, kite? Go e pasadara, po naga, Kinau a doko m̃aleoputo ni narei aginau doko.

¹⁴Go e naga, Ma nasava ega maneana pei tea mariana? Go Cehasi e pasadara, po naga, Lomau e dika natuna, go anawota e po pei tea matua.

¹⁵Go e naga, P̃a soso e umai. Go e soso e, go e umai po lawodu namata.

¹⁶Go e naga, Natau vau, ragi dapala nea, ragi waina ragi vusavusa ega liliu umai, p̃a wo dape piakiki naanoai sikai. Go e naga, Ee, nawota aginau, naatam̃oli ki Sup̃e O, p̃a ta sorosoro paki tea suasua nagoroi anigo mau.

¹⁷Go nagoroi wanogoe e diena, go e dape piakiki naanoai sikai ragi kakana, ragi waina ragi vusavusa e liliu umai, dapala waina Elisha e noa ki nia asa.

¹⁸Go ragi waina piakiki wanogoe e disu lavulavu, e pakilina naaleatia sikai naga e dave pano punusi tamana m̃aleoputo ni tea tagaukotovi maga.

¹⁹Go e noa ki tamana, e naga, Nap̃augu, nap̃augu. Go tamana e noa ki tea suasua aneana, e naga, P̃a tape a pano dua p̃ilana asa.

²⁰Go e dape a po piragi a umai dua p̃ilana asa, go e dasake doko nap̃atuana maga pa pa elo e p̃ora p̃au, go e mate.

²¹Go p̃ilana e sake pano, po lesi a e one nawewele ki naatam̃oli ki Sup̃e, po kokoro p̃onoti namata, po dave pano.

²²Go e pioso paki anawota, po naga, P̃a tip̃aki lua tea suasua sikai ega umai punusi au, a pavara ni ko asa, go ass sikai, naga aga sava pano punusi naatam̃oli ki Sup̃e, po moro liliu umai.

²³Go e naga, Ekasava p̃a vano punusi a masoso? E da pei atelagi vau, kite sabbath mau. Go e naga, E p̃ia doko.

²⁴Go e sawa ki tea sawagoro nam̃adu ni ass sikai, po noa ki tea suasua aneana, e naga, P̃a suatoro ki nia, go torogo vano; p̃a suatoro ki nia naga ega ta do purasa mau, a pe ta noa ki‐go asa.

²⁵Go e pano, po umai punusi naatam̃oli ki Sup̃e doko tava ni Karmel. Go e pakilina ragi waina naatam̃oli ki Sup̃e e punusi a uvea, naga e noa ki Cehasi, tea suasua aneana, e naga, P̃a leo, nagoroi ni Shunem waina:

²⁶P̃a sava pano, a pavara ni ko asa, naga p̃a sua e, go p̃a noa ki nia naga, Ku p̃ia doko, kite? Am̃awota e p̃ia doko, kite? Piakiki e p̃ia doko, kite? Go nagoroi wanogoe e pasadara, po naga, E p̃ia doko.

²⁷Go ragi waina e umai punusi naatam̃oli ki Sup̃e tava, e puati soki nam̃ele natuana maga. Go Cehasi e paki m̃aladigi naga ega rosa lua e; ma naatam̃oli ki Sup̃e e naga, P̃a toropusi a: nalakena naatana e dogokitesa nap̃alauna; go Yehovah e dasuru ki nia paki nau, po da noa kinau asa mau.

²⁸Go nagoroi wanogoe e naga, Kinau a datagovi nawota aginau ki piakiki naanoai sikai, kite? Kinau a da noa naga, P̃a ta soro au mau, kite?

²⁹Go naatam̃oli ki Sup̃e e noa ki Cehasi, e naga, P̃a tasoki namalom̃a, po puati tiko aginau nam̃elearum̃a, go p̃a vano: ku pe sua te naatam̃oli, p̃a ta pasa dodomi a mau; go te naata e pe vasa dodomi ko, p̃a ta pasa dape a mau: ma p̃a lesi tiko aginau ega toko narae ni piakiki.

³⁰Go piakiki p̃ilana e naga, Yehovah e mauri, go naatam̃a ma e mauri, aga wo da doropusi ko mau. Go e duleana, po dausi a pano.

³¹Go Cehasi e pea ki da pano, po lesi tiko e doko narae ni piakiki; ma nadaleo e dika, go navaivaiana ni namauriana e dika. Nalakena tea wanogoe e liliu naga ega sua e, go e noa ki nia, e naga, Piakiki e ko da darapa mau.

³²Go ragi waina Elisha e paki ekopu ni nasum̃a, p̃a leo, piakiki e mate one nawewele aneana one.

³³Nalakena tea wanogoe e paki ekopu po kokoro namata, po dapasavasa paki Yehovah.

³⁴Go e sake po dap̃olosiwogoro piakiki, po mari nagolena paki nagolena, go namatana paki namatana, go nam̃elearuna paki nam̃elearuna: go e dum̃ana pitosi goro piakiki; go nap̃okasi ni piakiki e do pivitinu.

³⁵Go e moro duleana, po surata papiliu ekopu ni nasum̃a; go e sake po dum̃ana pitosi goro piakiki: go piakiki e metue paka larua, go piakiki e leleo.

³⁶Go e soso Cehasi umai, po naga, P̃a soso nagoroi ni Shunem waina umai. Go e soso e. Go e sili umai punusi a, go e naga, P̃a tape dakati natum̃a.

³⁷Go e umai po doko pisari nam̃elena, po kolo suai natano; go e dape dakati natuna, po dave pano.

³⁸Go Elisha e moro paki Cilcal pano: go navitoloana sikai e doko navanua; go profeta natuda maga eu doko natano naraena: go e noa ki tea suasua aneana, e naga, P̃a lawo ki pot warua ega toko nakapu, po magi profeta natuda maga mari navinaga.

³⁹Go tea sikai e dave pano po paki vanua naga ega vila saisai ki nataputea, go e pap̃ai vaine kau sikai, po pila saisai ki lesi miala asa, nala aneana e pura ki lesi miala maga, go e moro umai po mani ra paki pot ni navinaga: nalakena eu da pea atae naga e pei nasava.

⁴⁰Go eu daki kovai a naga naatam̃oli maga euga kanikani. Go e pakilina, ragi waina eu do ganikani, naga eu pioso, po naga, Naatam̃oli ki Sup̃e O, namateana e doko pot. Go eu mari sa moro gani a mau.

⁴¹Ma e naga, Kuga tape flaur umai. Go e daki nia paki pot; go e naga, Kuga magi narei daki kovai a, naga euga kanikani. Go te namarisakiana e da moro doko pot mau.

⁴²Go naatam̃oli sikai e pae Baalshalishah umai, e magi naatam̃oli ki Sup̃e dape navinaga ni nawa vea maga umai, m̃olim̃oli ni barle rualima dua, go m̃okai maga ni korn vau, doko sak aneana. Go e naga, Kuga tua narei asa, naga euga kanikani.

⁴³Go tea suasua aneana e naga, Nasava, aga wo doropusi tea waia ega toko narae ni naatam̃oli p̃onotia sikai, kite? Ma e moro naga, P̃a tua narei asa, naga euga kanikani; nalakena Yehovah e noa dapala nea, e naga, Euga kanikani, go tea tupele ega ko doko.

⁴⁴Go e doropusi a e doko naraeda, go eu ganikani, go tea tupele e ko doko, dapala navasaana ki Yehovah.