Read Nguna Togoa Etafe North 2 NAWOTA MAGA 5 Bible Online

2 NAWOTA MAGA 5 - Nguna Togoa Etafe North bible

2 NAWOTA MAGA 5

¹Go Naaman tea maraki taua ni navakalo ki nawota ni Siria, e pei naatam̃oli warua sikai narae ni nawota aneana, go tea dodomadaganiana, nalakena Yehovah e dua Siria namarimatuaana pae asa: go e pei naatam̃oli marimatua sikai ni navakalo, ma e pei lepero sikai.

²Go tea ni Siria eu mari taua maga po dave pano, po piragi lua pavakoto naatara sikai m̃elu dua ki navanua ni Israel; go e po pei tea suasua ki Naaman anagoroi.

³Go e noa ki nawota nagoroi aneana, e naga, Nawota aginau e pe toko sikoti profeta waina e doko Samaria, e pe maripauri a m̃elu dua ki naveilepero‐ana aneana!

⁴Go tea sikai e paki ekopu, po noa ki nawota aneana asa, e naga, Tea suasua nagoroi waina e pei naka ni navanua ni Israel, e noa dapala nea go dapala nea.

⁵Go nawota ni Siria e naga, Ita, p̃a vano, go aga wo dip̃aki lua tusi sikai pano paki nawota ni Israel. Go e pano, po dape sikoti a silver talenta rualima sikai, go kold matele manu latesa, go tea suniana maga rualima sikai.

⁶Go e dape tusi wanogoe umai dua nawota ni Israel asa, waina e naga, Ragi waina tusi waia ega wo paki nam̃elearum̃a, p̃a atae naga a dip̃aki lua tea suasua aginau Naaman paloti punusi ko, naga p̃a maripauri a m̃elu dua ki navei‐lepero‐ana aneana.

⁷Go e pakilina, ragi waina nawota ni Israel e peve tusi wanogoe, naga e pua p̃orae sugoro aneana maga, po naga, Kinau a pei Sup̃e, naga aga mari punue go naga aga mari pauri, naga naatam̃oli waia e dip̃aki lua naatam̃oli sikai umai punusi au naga aga mari pauri a m̃elu dua ki navei‐lepero‐ana aneana, kite? Ma kuga midoakiusiusi, a pavara ni mu asa, po punusi takana waina e do laaga naga ega mari navileana sikai dip̃a au.

⁸Go e doko, ragi waina Elisha naatam̃oli ki Sup̃e, e dogo naga nawota ni Israel e pua p̃orae sugoro aneana maga, naga e dip̃aki lua po noa ki nawota, e naga, Ekasava ku pua p̃orae sugoro anigo maga? Ega umai punusi au, go ega wo atae naga profeta sikai e doko Israel.

⁹Go dapala nogoe Naaman e umai pilake horse aneana maga go kariot aneana maga, po lawodu namata ni nasum̃a ki Elisha.

¹⁰Go Elisha e dip̃aki lua tea tautauana sikai pano punusi a, e naga, P̃a vano, po loloso Yordan ega vaka larua, go nap̃okasim̃a ega wo moro liliu, go p̃a wo dautau.

¹¹Go Naaman e maeto, go e pano, po naga, P̃a leo, kinau a midoa ki nia naga e pe wo dave umai punusi au, po lawodu, po pioso paki nagisa ni Yehovah Sup̃e aneana, po salesalea ki naruna tokora kakana, po mari pauri au m̃elu dua ki navei‐leperoana.

¹²Abana go Farpar, noaisara maga ni Damaseko, ero da pei tea wia liu noaisara maga mamau puti ni Israel, kite? A da mariatae loloso ara po dautua, kite? Nalakena tea wanogoe e maradoa po moro pano namaetoana aneana.

¹³Go tea suasua aneana maga eu rumai paki m̃aladigi, po pasa paki nia, po naga, Mama, profeta wanogoe e pe tip̃aki‐go naga p̃a mari te naleo warua sikai, ku pe wo da mari a mau, kite? Go e pe noa ki‐go, P̃a loloso, po dautau, e pe ta p̃ia liu, kite?

¹⁴Go e siwo pano, po dum̃ana pupugi a Yordan paka larua, pataka ni navasaana ki naatam̃oli ki Sup̃e: go nap̃okasina e moro liliu, e dakiusi nap̃okasi ni piakiki kiki sikai, go e dautau.

¹⁵Go e moro pano punusi naatam̃oli ki Sup̃e, nara ma taua aneana eu mamau, po umai po lawodu naraena: go e naga, P̃a leo, ragi waia a po atae naga te Sup̃e e da doko te tokora ni maramana mamau mau, ma e doko Israel e sikina: nalakena tea wanogoe, a pavara ni ko, p̃a tape navasam̃atakiana sikai ki tea suasua anigo.

¹⁶Ma e naga, Yehovah e mauri, waina a lawodu naraena, aga wo da dape te navatuna mau. Go e maridie a naga ega tape a; ma e karai.

¹⁷Go Naaman e naga, E pe tika, ma a pavara ni ko, natapetapeana ni natano waina mule dua eroga tapetape a, ega vei tea vituakiana paki tea suasua anigo; nalakena tea suasua anigo ega wo da moro pitua ki te navituaana tap̃arakiana kite te naviriana paki sup̃e p̃ota maga mau, ma ega vaki Yehovah ega sikina.

¹⁸Nalo ni tea waia, Yehovah ega magi tea suasua anigo midoakikorokoro: ragi waina nawota aginau ega vaki ekopu ni nasum̃a ni Rimmon naga ega lotu tokora wanogoe, doko do ovi narugu, go kinau aga kolo suai natano ekopu ni nasum̃a ni Rimmon, ragi waina aga kolo suai natano ekopu ni nasum̃a ni Rimmon, Yehovah ega magi tea suasua anigo midoakikorokoro nalo kakana.

¹⁹Go e noa ki nia, e naga, P̃a vano natam̃ateana. Go e m̃elu dua ki nia pano paki uvea kiki.

²⁰Ma Cehasi, tea suasua ki Elisha naatam̃oli ki Sup̃e, e naga, P̃a leo, nawota aginau e mauti Naaman naatam̃oli ni Siria wanogoe, po da dape ki nam̃elearuna maga tea waina e dape a umai: Yehovah e mauri, aga wo sava dausi a, po dape te navatuna kiana.

²¹Go Cehasi e sava dausi Naaman. Go ragi waina Naaman e punusi tea sikai naga e do sava dausi a, e doro dua ki kariot aneana naga ega sua e, po naga, E p̃ia, kite?

²²Go e naga, Io, e p̃ia. Nawota aginau e dip̃aki lua au umai, e naga, P̃a leo, natureai dua, profeta natuda maga, ero po pae navanua ni tava ni Efraim umai punusi au; p̃a tua ra, a pavara ni ko asa, silver talenta ega sikai, go tea suniana maga ega rua.

²³Go Naaman e naga, E p̃ia, p̃a tape talenta ega rua. Go e maridie asa, po soli saisai ki silver talenta dua, po pai a nala dua, pilake tea suniana maga dua, po doropusi ra eu doko tea suasua dua aneana; go eu dapetape ra pano pea ki nia.

²⁴Go ragi waina e umai paki tava, e puati lua ra ki nam̃elearuda, po doropusi ra eu doko nasum̃a: go e dip̃aki lua naatam̃oli maga pano, go eu pano.

²⁵Ma nae e dum̃ana paki ekopu, po lawodu narae ni nawota aneana. Go Elisha e noa ki nia, e naga, Ku pae esava umai, Cehasi? Go e naga, Tea suasua anigo e da paki te vatuna mau.

²⁶Go e noa ki nia, e naga, Nap̃op̃ogu e da sikoti ko ragi waina naatam̃oli wanogoe e doro dua kariot aneana naga ega sua ko, kite? E pei ragi wia naga p̃a tape m̃ane, go naga p̃a tape tea suniana maga, go roara maga ni nakau oliva, go roara maga ni vaine, go shiip maga go oks maga, go tea suasua naanoai maga, go tea suasua nagoroi maga, kite?

²⁷Nalakena tea wanogoe navei‐lepero‐ana ki Naaman ega wo puluti ko, go ega wo puluti naworaworam̃a pa pa ega tu mau du. Go e m̃elu dua ki naraena pano, e po pei lepero sikai, e dare dapala sno.