Read Nguna Togoa Etafe North 2 NAWOTA MAGA 6 Bible Online

2 NAWOTA MAGA 6 - Nguna Togoa Etafe North bible

2 NAWOTA MAGA 6

¹Go profeta natuna maga eu noa ki Elisha, eu naga, P̃a leo, tokora waina au doko asa doko naraem̃a e da pataka gami mau, e kiki.

²P̃a suasua ki gami, au pavara ni ko asa, naga auga vaki Yordan pano, naga auga tape natokai sikasikai sarasara gami, go p̃a suasua ki gami naga auga tum̃agami maginami mari tokora sikai waina auga toko asa doko tokora wanogoe. Go e pasadara, po naga, Kuga vano.

³Go tea sikai e naga, P̃a suasua, a pavara ni ko asa, go p̃a sikoti tea suasua anigo maga pano. Go e pasadara, po naga, Aga wo pano.

⁴Go e sikoti ra pano. Go ragi waina eu rumai paki Yordan eu dae kotokotovi nakau maga.

⁵Ma ragi waina tea sikai e do dae kotovi natokai sikai, nap̃au ni karau e dowo paki noai: go e pioso, po naga, Awi, nawota aginau! Nalakena e pei tea ki naatam̃oli p̃ota sikai.

⁶Go naatam̃oli ki Sup̃e e naga, E dowo esava? Go e pisei ki nia tokora waina e dowo asa. Go e dae kotovi nakau sikai, po nadi ki nia tokora wanogoe, po mari airon wanogoe e sale.

⁷Go e naga, P̃a tape dakati a. Go e sai ki nam̃elearuna po puati a.

⁸Go nawota ni Siria e mari navakalo dip̃a Israel; go e pusum̃aki paki tea suasua aneana maga, po naga, Tuga lawo ki tea kusugoro maga tokora sikai.

⁹Go naatam̃oli ki Sup̃e e dip̃aki lua pa punusi nawota ni Israel, po naga, P̃a vavaigoro naga p̃a ta liu tokora sikai wanogoe mau; nalakena tea ni Siria eu do kusugoro asa.

¹⁰Go nawota ni Israel e dip̃aki lua pano paki tokora waina naatam̃oli ki Sup̃e e noa ki nia asa, po pasakorokoro e asa; go e dum̃ana mauti a asa, e da pei sala sikai kite sala dua maau mau.

¹¹Go nap̃op̃o ni nawota ni Siria e dogokitesa p̃arua nalo kakana; go e soso tea suasua aneana maga umai, po noa ki da, e naga, Kuga wo da pisei kinau mau sei kakagida waina e pei agi nawota ni Israel, kite?

¹²Go tea suasua aneana maga sikai kakada e naga, Ee, nawota aginau, nawota O: ma Elisha, profeta waina e doko Israel, nae e do noa ki nawota ni Israel navasaana maga waina ku do pasa asa ekopu ni em̃ago ni namaturuana anigo.

¹³Go e naga, P̃a vano po leo pavaraka tokora waina e doko asa, naga aga tip̃aki lua po paraki nia umai. Go e pei tea noaana paki nia, eu naga, P̃a leo, e doko Dothan doko.

¹⁴Nalakena tea wanogoe e dip̃aki lua horse maga pano, go kariot maga, go taua navakalo warua sikai: go eu rumai p̃ogi, po dalivirigoro natokoana.

¹⁵Go tea suasua ki naatam̃oli ki Sup̃e e duleana malip̃ogi loaloa, po dave pano, go p̃a leo, taua navakalo sikai pilake horse maga go kariot maga eu dalivirigoro natokoana. Go tea suasua aneana e noa ki nia, e naga, Awi, nawota aginau! Tuga mari nasava?

¹⁶Go e pasadara, po naga, Kuga ta mataku mau: nalakena tea aginami eu laapa liu tea adeada.

¹⁷Go Elisha e dapasavasa, po naga, Yehovah, a pavara ni ko asa, p̃a wolagati namatana maga, naga ega leosai. Go Yehovah e p̃olagati namata ni natureai wanogoe; go e leosai: go p̃a leo, tava wanogoe e pura ki horse maga go kariot maga ni nakapu vavaga, eu dalivirigoro Elisha.

¹⁸Go ragi waina tea ni Siria eu siwo umai dip̃a e, Elisha e dapasavasa paki Yehovah, po naga, P̃a atugi narei waia ki nakesaana, a pavara ni ko asa. Go e atugi ra ki nakesaana pataka ni navasaana ki Elisha.

¹⁹Go Elisha e noa ki da, e naga, Tea waia e da pei napua, go tea waia e da pei natokoana: kuga rausi au, go aga wo piragi mu pano punusi naatam̃oli waina ku do laaga asa. Go e maraki ra paki Samaria pano.

²⁰Go e pakilina ragi waina eu rumai paki Samaria, naga Elisha e noa naga, Yehovah, p̃a wolagati namata ni naatam̃oli maga waia, naga euga leosai. Go Yehovah e p̃olagati namatada maga, go eu leosai; go p̃a leo, eu doko m̃aleoputo ni Samaria doko.

²¹Go ragi waina nawota ni Israel e punusi ra, e noa ki Elisha, e naga, Mama aginau, aga atugi ra, kite? Aga atugi ra, kite?

²²Go e pasadara, po naga, P̃a ta atugi ra mau: ku masau atugi tea maga waina ku piragi lua pavakoto ara ki lova anigo go ki naasu anigo, kite? P̃a toropusi navinaga go noai naraeda, naga euga kanikani po munu, po pano punusi nawota adeada.

²³Go eu madeada mari m̃ata ki nakaniana warua sikai: go ragi waina eu ganikani po munu go e nopu, e dip̃aki lua ra pano, go eu pano punusi nawota adeada. Go taua navakalo maga ni Siria eu da moro umai paki navanua ni Israel te ragi mau.

²⁴Go e pakilina edaku ki tea wanogoe, naga Ben‐hadad nawota ni Siria e piragi saisai ki taua navakalo mamau aneana, po sake pano, po kelugoro Samaria.

²⁵Go navitoloana warua sikai e doko Samaria: go p̃a leo, e kelugoro e doko pa pa nap̃au ni ass sikai maau e do pei tea soriana raki silver matele rualima latolu, go namagovai kevati maau ni kab sikai ni natae ni tokopea raki silver matele lima.

²⁶Go ragi waina nawota ni Israel e do liu pano nam̃asua ni p̃aaka, nagoroi sikai e pioso paki nia, po naga, P̃a silae au, nawota aginau, nawota O.

²⁷Go e naga, Yehovah e pe ta silae ko mau, kinau a pe wo silae ko ki nasava? Ki malo wokalesue, kite ki m̃oru ni navasokiana ni nawa ni vaine, kite?

²⁸Go nawota e noa ki nia, e naga, Nasava e mari ko ku dogokitesa? Go e pasadara, po naga, Nagoroi waia e noa kinau, e naga, P̃a vitua ki natum̃a, naga tuga kani a masoso, go tuga wo gani natugu matamai.

²⁹Nalakena tea wanogoe au peni natugu, po gani a: go matamai ki nia a noa ki nia, a naga, P̃a vitua ki natum̃a, naga tuga kani a: go nae e po dasuru ki natuna.

³⁰Go e pakilina, ragi waina nawota e dogo navasaana maga ki nagoroi wanogoe, naga e pua p̃orae sugoro aneana maga; (go e do liu pano nam̃asua ni p̃aaka;) go narei eu leo, go p̃a leo, e do pilake nakulukulu ni sak e doko p̃ai nawilina.

³¹Go e naga, Sup̃e ega mari dapala nogoe paki nau, go ega moro mari a, nap̃au ni Elisha, Shafat natuna, e pe toko nap̃atokona doko masoso.

³²Ma Elisha e doko natano ekopu ni nasum̃a aneana, nara ma tea matua maga eu mamau; go nawota e dip̃aki lua naatam̃oli sikai m̃elu dua ki naraena pano: ma ragi waina tea tautauana wanogoe e ko da umai sua punusi a mau, e noa ki tea matua maga, e naga, Ku punusi takana waina tea maripunue wanogoe e po dip̃aki lua umai naga ega tape lua nap̃augu, kite? Kuga leo, ragi waina tea tautauana wanogoe ega vakilina nea, kuga kokoro namata, po puasoki kasua ki namata dip̃a e: natukitukiana ni nam̃ele natua ni nawota aneana e da do edaku ki nia mau, kite?

³³Go ragi waina e ko do pasa paki da, p̃a leo, nawota wanogoe e siwo umai punusi a, po naga, P̃a leo, nasaana waia e po pae Yehovah umai; ekasana aga wo leogoro pavatu Yehovah?