Read Nguna Togoa Etafe North 2 NAWOTA MAGA 7 Bible Online

2 NAWOTA MAGA 7 - Nguna Togoa Etafe North bible

2 NAWOTA MAGA 7

¹Go Elisha e naga, Kuga rogo navasaana ki Yehovah: Yehovah e noa dapala nea, e naga, Matamai ragi dapala nea, flaur wia totowo sikai ega wo pei tea soriana namata‐pua ni Samaria raki shekel ega sikai maau, go barle totowo dua raki shekel ega sikai maau.

²Go tea maraki waina nawota e ovi naruna, e pasadara naatam̃oli ki Sup̃e, po naga, P̃a leo, Yehovah e pe tum̃ana mari namata leo maga nakoroatelagi, naleo wanogoe e pe mariatae pakilina, kite? Go e naga, P̃a leo, namatam̃a eroga wo dum̃ada punusi a, ma nigo p̃a wo da gani a mau.

³Go naatam̃oli pati waina eu pei lepero eu doko pisari namasova ni namata‐pua: go eu dum̃ada noa ki da, eu naga, Ekasana tuga to dasake nea pa pa tuga mate?

⁴Tu pe noa naga, Tuga sili paki natokoana, tu pe wo mate tokora wanogoe, nalakena navitoloana waina e doko natokoana doko: go tu pe tasake doko nea doko, ma tu pe wo mate. Nalakena tea wanogoe, tuga vano, go tuga rowo paki nam̃elearu ni taua ni naatam̃oli maga ni Siria: eu pe mauti gida, tu pe wo mauri; go eu pe mari punue gida, tu pe wo mate, ma tea m̃oli.

⁵Go eu duleana ragi ni namarama kiki ni ragi melu, naga euga vaki tokora ni nam̃enakiana ki naatam̃oli maga ni Siria: go ragi waina eu rumai paki nadigi ni tokora ni nam̃enakiana ki naatam̃oli maga ni Siria, p̃a leo, te naata e da doko asa doko mau.

⁶Nalakena Yehovah e mari taua ni tea ni Siria naga eu dogo nasaruruana ni kariot maga, go nasaruruana ni horse maga, nasaruruana ni taua warua sikai: go eu dum̃ada noa ki da, eu naga, P̃a leo, nawota ni Israel e po pasa dapui dip̃a gida nawota maga ki naworawora ni Heth, go nawota maga ki naka ni Ityipt, naga euga umai po atu gida.

⁷Nalakena tea wanogoe eu duleana po sava pano ragi ni namarama kiki ni ragi melu, go eu doropusi tap̃aup̃au adeada maga, go horse adeada maga, go ass adeada maga eu mamau puti madoko tokora ni nam̃enakiana doko, po sava pano raki namauriana adeada.

⁸Go ragi waina lepero maga wanogoe eu rumai paki nadigi ni tokora ni nam̃enakiana, eu sili paki ekopu ni tap̃aup̃au sikai, po ganikani po munu, go eu dape lua pavakoto silver, go kold, go tea suniana maga m̃elu dua ki nia, po pano po dasuru ki da; go eu moro umai, po sili paki ekopu ni tap̃aup̃au p̃ota sikai, po moro dape lua pavakoto naleo maga m̃elu dua ki nia, po moro pano po moro dasuru ki da.

⁹Go eu dum̃ada noa ki da, eu naga, Tu da do mari tea wia mau: naaleatia waia e pei naaleatia sikai ni narogorogoana wia, go tu do punuta: tu pe toko pa pa paki namarama ni malip̃ogi, navaratiana e pe wo pa parati ki gida: nalakena tea wanogoe, kuga umai, tuga vano po noakisai tea ni nasum̃a ki nawota asa.

¹⁰Go dapala nogoe eu rumai po pioso paki tea vavaigoro maga ni namata‐pua ni natokoana: go eu noa ki da, eu naga, Au paki tokora ni nam̃enakiana ki naatam̃oli maga ni Siria, go p̃a leo, te naata e da doko asa doko mau, kite nadaleo ni naatam̃oli mau, ma horse maga eu pei tea likotiana doko, go ass maga eu pei tea likotiana doko, go tap̃aup̃au maga eu doko dapala waina eu doko.

¹¹Go e pioso paki tea vavaigoro maga ni namata‐pua; go nara eu noa ki tea ni nasum̃a ki nawota asa, waina eu doko ekopu doko.

¹²Go nawota e duleana e ko pei p̃ogi, po noa ki tea suasua aneana maga, e naga, Aga wo noa ki mu tea waina naatam̃oli maga ni Siria eu po mari a paki gida. Eu atae naga tu pitolo; nalakena tea wanogoe eu po m̃elu dua ki tokora ni nam̃enakiana pano naga euga tokoloku namalasi, doko do naga, Ragi waina euga tave m̃elu dua ki natokoana umai, tuga vuati ra euga vei pulemauri, po pano po sili paki natokoana.

¹³Go tea suasua aneana maga sikai kakada, e pasadara po naga, P̃a suasua, a pavara ni ko asa, naga naatam̃oli seara euga vano, go horse maga waina eu pei tea toropusiana doko elima kakada; eu pe mate, eu pe wo puoli dakiusi taua mamau ni Israel waina eu puoli sua, go tuga wo mamau puti puoli; ma eu pe mauri, tu pe wo mamau puti mauri, nara lima wanogoe go nigida waina tu doko natokoana doko. Tuga tip̃aki lua pano po punusi a.

¹⁴Nalakena tea wanogoe eu matadoa naatam̃oli dua waina ero sakesaake horse; go nawota e dip̃aki lua ra pano naga euga sava dausi taua navakalo ni naatam̃oli maga ni Siria, e naga, Koroga vano po punusi a.

¹⁵Go eu sava dausi ra pano pa pa liliu Yordan: go p̃a leo, napua e pura usuraki ki tea suniana maga go ki lasa maga, waina naatam̃oli maga ni Siria eu nadi ki da namari‐m̃araveraveana adeada. Go tea tautauana maga eu liliu po noa ki nawota asa.

¹⁶Go narei eu dave pano, po puti lua pavakoto tokora ni nam̃enakiana ki naatam̃oli maga ni Siria. Go flaur wia totowo sikai e pei tea soriana raki shekel sikai maau, go barle totowo dua raki shekel sikai maau, pataka ni navasaana ki Yehovah.

¹⁷Go nawota e pasa dawona ki tea maraki waina e ovi naruna naga ega vei tea leo parati ki namata‐pua: go narei eu pasi puludoa e namata‐pua, go e mate, dapala waina naatam̃oli ki Sup̃e e noa ki sua e asa ragi waina nawota e siwo umai punusi a.

¹⁸Go e pakilina dapala navasaana ki naatam̃oli ki Sup̃e waina e pea noa ki nawota asa, doko do naga, Barle totowo dua raki shekel ega sikai maau, go flaur wia totowo sikai raki shekel ega sikai maau, matamai ragi dapala nea namata‐pua ni Samaria;

¹⁹Go tea maraki wanogoe e pasadara naatam̃oli ki Sup̃e, po naga, Go p̃a leo, Yehovah e pe tum̃ana mari namata leo maga nakoroatelagi, naleo wanogoe e pe mariatae pakilina, kite? Go e naga, p̃a leo, namatam̃a eroga wo dum̃ada punusi a, ma nigo p̃a wo da gani a mau:

²⁰E pakilina ki nia dapala nogoe; nalakena narei eu pasi puludoa e namata‐pua, go e mate.