Read Nguna Togoa Etafe North 2 NAWOTA MAGA 9 Bible Online

2 NAWOTA MAGA 9 - Nguna Togoa Etafe North bible

2 NAWOTA MAGA 9

¹Go profeta Elisha e soso profeta natuda maga sikai kakada umai punusi a, po noa ki nia, e naga, P̃a tasoki namalom̃a, po dape lasa ni naroro waia nam̃elearum̃a, go p̃a vaki Ramoth‐cilead pano.

²Go ragi waina p̃a wo sili paki tokora wanogoe, p̃a leo laaga Yehu natu ni Yehoshafat natu ni Nimshi, go p̃a vaki ekopu, po mari a ega tuleana m̃elu dua ki taina maga, po piragi a paki em̃ago tukituki sikai pano.

³Go p̃a tape lasa ni naroro, po daki nia nap̃auna, po naga, Yehovah e noa dapala nea, e naga, A po puvurai ki‐go ku pei nawota dap̃au Israel. Go p̃a wolagati namata ni nasum̃a, po sava pano, p̃a ta mari daliali asa mau.

⁴Go natureai wanogoe, natureai profeta nogo, e paki Ramoth‐cilead pano.

⁵Go ragi waina e umai paki asa, p̃a leo, tea maraki maga ni taua ni naatam̃oli navakalo eu doko natano; go e naga, A peani navasaana sikai paki‐go, tea maraki O. Go Yehu e naga, Paki seve tea kakagami? Go e naga, Paki‐go, tea maraki O.

⁶Go e duleana, po paki ekopu ni nasum̃a pano; go e daki naroro nap̃auna, po noa ki nia, e naga, Yehovah, Sup̃e ki Israel, e noa dapala nea, e naga, A po puvurai ki‐go ku pei nawota dap̃au narei maga ki Yehovah, dap̃au Israel.

⁷Go p̃a atugi nasum̃a ki Ahab, nawota anigo, naga aga siko nada ni tea suasua aginau profeta maga, go nada ni tea suasua maga mamau puti ki Yehovah, paki nam̃elearu ni Yesebel.

⁸Nalakena nasum̃a mamau ki Ahab ega wo mavunuvunu: go aga wo daelua pa dua ki Ahab sara piakiki naanoai ni Israel, tea waina e pei naviti go tea waina e dum̃ana doko.

⁹Go aga wo mari nasum̃a ki Ahab ega wo dakiusi nasum̃a ki Yeroboam natu ni Nebat, go dakiusi nasum̃a ki Baasha natu ni Ahiyah.

¹⁰Go koria maga euga wo gani Yesebel matele natano ni Yesreel, go tea waina ega ova ki nia ega wo dika. Go e p̃olagati namata ni nasum̃a, po sava pano.

¹¹Go Yehu e dave umai punusi tea suasua maga ki nawota aneana; go tea sikai e noa ki nia, e naga, E p̃ia puti, kite? Ekasava naatam̃oli doropa wanogoe e umai punusi ko? Go e noa ki da, e naga, Nimu ku atae naatam̃oli wanogoe, go navasaana aneana.

¹²Go eu naga, E pei nasorosoroana; p̃a noa ki gami asa. Go e naga, E pasa dapala nea go dapala nea paki nau, e naga, Yehovah e noa dapala nea, e naga, A po puvurai ki‐go ku pei nawota dap̃au Israel.

¹³Go eu mari m̃araverave, po dape sugoro kovagoro adeada sara naata sikasikai, po p̃elesa ki nia etano ki nia nap̃au ni napua vavadu maga, po sui paiga, po naga, Yehu e pei nawota.

¹⁴Dapala nogoe Yehu natu ni Yehoshafat natu ni Nimshi e mari nasekeana dip̃a Yoram. (Go Yoram nara ma Israel mamau eu doko pavaigoro Ramoth‐cilead, nalakena Hasael nawota ni Siria:

¹⁵Ma nawota Yehoram e liliu sua paki Yesreel naga ega vei tea maripauriana m̃elu dua ki wotu aneana maga waina tea ni Siria eu dua e asa, ragi waina e mari navakalo dip̃a Hasael nawota ni Siria.) Go Yehu e naga, E pe vei nap̃op̃om̃a, p̃a ta suasua ki te naata sikai naga ega tave m̃elu dua ki natokoana mau, naga ega sava pano po noasai a Yesreel.

¹⁶Go Yehu e porau kariot sikai, po paki Yesreel pano; nalakena Yoram e one tokora wanogoe. Go Ahasiah nawota ni Yudah e po siwo umai naga ega vunusi Yoram.

¹⁷Go tea vavaigoro e lawodu nap̃au ni nasum̃a vakilagi ni Yesreel, go e punusi taua naatam̃oli ki Yehu ragi waina eu rumai, go e naga, A punusi taua sikai ni naatam̃oli. Go Yoram e naga, P̃a noa ki naatam̃oli sikai waina ega sakesaake horse, p̃a tip̃aki lua e pano naga ega sua ra, go ega noa naga, E pei natam̃ateana, kite?

¹⁸Nalakena tea wanogoe tea sikai e sakesaake horse po pano naga ega sua e, go e naga, Nawota e noa dapala nea, e naga, E pei natam̃ateana, kite? Go Yehu e naga, Nigo p̃a kasa ki natam̃ateana? P̃a vaki natakugu. Go tea vavaigoro e noasai a, e naga, Tea tautauana e pa parati ki da, ma e da moro liliu umai mau.

¹⁹Go e moro dip̃aki lua naatam̃oli sikai pano sala kerua, e sakesaake horse po pa punusi ra, po naga, Nawota e noa dapala nea, e naga, E pei natam̃ateana, kite? Go Yehu e pasadara, po naga, Nigo p̃a kasa ki natam̃ateana? P̃a vaki natakugu.

²⁰Go tea vavaigoro e noasai a, e naga, E pa parati ki da, po da moro liliu umai mau: go nasavaana e dakiusi nasavaana ki Yehu natu ni Nimshi; nalakena e do sava m̃araverave.

²¹Go Yoram e naga, Kuga mari m̃ata. Go eu mari m̃ata ki kariot aneana. Go Yoram nawota ni Israel, go Ahasiah nawota ni Yudah ero dave pano, ero doko kariot adeada sikasikai, go ero dave pano naga eroga sua Yehu, po pap̃ai a matele ni natano ki Naboth, naatam̃oli ni Yesreel.

²²Go e pakilina ragi waina Yoram e punusi Yehu, naga e noa, E pei natam̃ateana Yehu, kite? Go e pasadara, po naga, Natam̃ateana e mariatae doko dapale sava ragi waina namaripeleana maga go nawosidoaana maga ki p̃ilam̃a Yesebel eu laapa liu?

²³Go Yoram e doa nam̃elearuna maga, po sava pano, po noa ki Ahasiah, e naga, E pei namari‐malauwelukiana, Ahasiah O.

²⁴Go Yehu e pua p̃elua ki kasua ki naasu aneana, po dipe Yoram namawota ni naruna maga, go nalua e puri sasama nam̃ona, go e dowo doko kariot aneana.

²⁵Go Yehu e noa ki Bidkar tasiga aneana, e naga, P̃a tape dakati a, po nadi ki nia matele ni vanua ki Naboth naatam̃oli ni Yesreel: nalakena a midoaki parati ki ragi waina nigida toro dua dausi tamana Ahab, naga Yehovah e pasa ki navasaana waia dip̃a e, e naga,

²⁶Dapala waina a punusi nada ni Naboth nanova, go nada ni natuna maga, Yehovah e noa e; dapala nogoe aga wo lagati dua ko asa tokora ni natano waia, Yehovah e noa e. Nalakena tea wanogoe, p̃a tape dakati a, po nadi ki nia paki matele ni natano wanogoe, ega vataka ni navasaana ki Yehovah.

²⁷Ma ragi waina Ahasiah nawota ni Yudah e punusi tea wanogoe, e sava pae napua ni Beth‐hakan pano. Go Yehu e kopasi a, po naga, Kuga moro atugi a doko kariot aneana: go eu atugi a tokora ni nasakesakeana paki Cur, waina e doko m̃aladigi ki Ibleam. Go e sava paki Mekiddo pano, po mate tokora wanogoe.

²⁸Go tea suasua aneana maga eu musagi a kariot sikai paki Yerusalem pano, po ova ki nia matigo aneana sikoti tamana maga natokoana ki David.

²⁹Go Ahasiah e pae asa maramara dap̃au Yudah natau kerualima sikai tamate sikai ki Yoram natu ni Ahab.

³⁰Go ragi waina Yehu e umai paki Yesreel, Yesebel e dogo e; go e pitai naraena, po suni tagotop̃au, po leoduru namata leoduru.

³¹Go ragi waina Yehu e sili namata‐pua, e naga, E pei natam̃ateana, nigo Simri, tea maripunue nawota anigo, kite?

³²Go e sike namatana paki namata leoduru, po naga, Sei e pei aginau? Sei? Go atavau dua kite dolu eu leoduru punusi a.

³³Go e naga, Kuga nadi ki nia pakitano. Go eu nadi ki nia pakitano: go nadana seara e pei tea meseurakiana namalo ni nasum̃a, go paki horse maga: go e pasi soki a natano.

³⁴Go e paki ekopu ni nasum̃a, po ganikani po munu; go e naga, Kuga vano po punusi nagoroi vasasakiana wanogoe, po ova ki nia: nalakena e pei nawota natuna nagoroi sikai.

³⁵Go eu pano naga euga ova ki nia: ma eu da pap̃ai a mau, ma lasa nadagaina, go natuana maga, go nam̃elearuna maga eu sikida.

³⁶Nalakena tea wanogoe eu moro umai, po noa ki nia asa. Go e naga, E pei navasaana ki Yehovah, waina e pasa asa pae nawoka ni tea suasua aneana Eliyah, naatam̃oli ni Tishbe, doko do naga, Koria maga euga wo gani nap̃okasi ni Yesebel matele ni natano ni Yesreel:

³⁷Go nap̃atoko mate ni Yesebel ega wo dapala natap̃ata narae ni vanua doko matele ni natano ni Yesreel; dapala waina euga wo da noa naga, Tea waia e pei Yesebel.