Read Nguna Togoa Etafe North 1 KRONIKEL MAGA 10 Bible Online

1 KRONIKEL MAGA 10 - Nguna Togoa Etafe North bible

1 KRONIKEL MAGA 10

¹Go Filistine maga eu marimari dip̃a Israel: go naatam̃oli maga ni Israel eu sava pa dua ki narae ni Filistine maga, go eu pei tea atugiana eu dowo tava Cilboa.

²Go Filistine maga eu sava pa dua ki Saul go natuna maga; go Filistine maga eu atugi Yonathan, go Abinadab, go Malki‐shua, Saul natuna maga.

³Go navakalo e kasua sa dip̃a Saul, go tea tape naasu maga eu pa parati ki nia; go e dogokitesa nalakena tea tape naasu maga.

⁴Go Saul e noa ki tea to dape nalikau aneana, e naga, P̃a sai lua lova anigo, po puri sasama au asa; mase tea ta pei tea tovadaviviana maga waia eu pe umai po mari saudoa kinau. Ma tea to dape nalikau aneana e da suasua asa mau; nalakena e mataku p̃arua. Nalakena tea wanogoe Saul e puati lova aneana, po dowo dap̃olosiwo asa.

⁵Go ragi waina tea to dape nalikau aneana e punusi naga Saul e mate, nae ma e dowo dap̃olosiwo lova aneana, po mate.

⁶Go dapala nogoe Saul e mate, nara ma natuna dolu; go tea maga mamau puti ni nasum̃a aneana eu mate ragi sikai maau.

⁷Go ragi waina naatam̃oli maga mamau puti ni Israel waina eu doko nap̃aloa eu punusi naga eu sava, go naga Saul go natuna maga eu mate one, eu doro dua ki natokoana adeada maga, po sava pano; go Filistine maga eu rumai po doko ara doko.

⁸Go e pakilina matamai ki nia, ragi waina Filistine maga eu rumai naga euga sawo lua sara naleo ki tea atugiana maga, naga eu pap̃ai Saul go natuna maga eu mate one tava Cilboa.

⁹Go eu sawo lua sara naleo aneana, po dae kotovi nap̃auna, po puati pulum̃a ki nalikau aneana maga, po dip̃aki lua paki navanua ki Filistine maga daliviri, naga euga tape narogorogoana kakana paki nasup̃e adeada maga, go paki narei.

¹⁰Go eu doropusi pulum̃a ki nalikau aneana maga eu doko nasum̃a ni nasup̃e adeada maga, go eu sara ki nap̃auna nasum̃a ni Dakon.

¹¹Go ragi waina tea ni Yabesh‐cilead mamau puti eu dogo tea mamau puti waina Filistine maga eu mari a paki Saul,

¹²M̃aau maga mamau puti eu duleana, po dape lua nap̃atoko mate ni Saul, go nap̃atoko mate ni natuna maga, po dape ra pano paki Yabesh, po ova ki navatuda maga Yabesh etano ni nakau oak waina e doko Yabesh, po pali naaleatia larua.

¹³Go dapala nogoe Saul e mate nalakena natapiriana aneana waina e mari a dip̃a Yehovah, nalakena navasaana ki Yehovah waina e da pavaigoro e mau; go nalakena e pusuusu ki parati ki naata sikai waina e peani naatana vasapua, naga ega tatagovi a asa,

¹⁴Go e da pusuusu paki Yehovah mau: nalakena tea wanogoe Yehovah e atugi a, po doa namarakiana paki David natu ni Yesse.