Read Nguna Togoa Etafe North 1 KRONIKEL MAGA 12 Bible Online

1 KRONIKEL MAGA 12 - Nguna Togoa Etafe North bible

1 KRONIKEL MAGA 12

¹Go tea maga waia eu pei nara waina eu rumai punusi David doko Siklak, ragi waina e dum̃ana dasuru ki nia doko, nalakena Saul natu ni Kish: go eu pei m̃aau maga, tea silae aneana maga ni navakalo seara kakada.

²Eu pei tea vua naasu maga, go eu pei aruaru kusue doko do pulua ki vatu maga po do dipe ki nalua maga; eu pei Saul taina maga naworawora ni Benyamin.

³Nap̃auda e pei Ahieser, go kerua kakana Yoash, Shemaah ni Cibeath natuna maga; go Yesiel, go Pelet Asmaveth natuna maga; go Berakah, go Yehu tea ni Anathoth;

⁴Go Ishmaiah tea ni Cibeon, m̃aau sikai m̃aleoputo ni tea rualima dolu waina, go e pei nap̃auda; go Yeremiah, go Yahasiel, go Yohanan, go Yosabad tea ni Cederath;

⁵Elusai, go Yerimoth, go Bealiah, go Shemariah, go Shefatiah tea ni Haruf;

⁶Go Elkanah, go Isshiah, go Asarel, go Yoeser, go Yashobeam tea ni Korah;

⁷Go Yoelah, go Sebadiah, Yeroham ni Cedor natuna maga.

⁸Go naatam̃oli maga ni Cad seara kakada, m̃aau maga, tea vasapiseiki‐m̃ata‐kiana raki navakalo, tea tape m̃ata ki nakokoro go naio, eu puluti David doko tokora kasua ni nasiliana doko masop̃alo; naraeda eu dapala narae ni laion maga, go eu pei tea sava kasua dapala diir maga nam̃asua ni tava maga;

⁹Nap̃auda e pei Eser, go kerua kakana Obadiah, go ketolu Eliab;

¹⁰Mishmannah kevati, Yeremiah kelima;

¹¹Attai kelatesa, Eliel kelarua;

¹²Yohanan kelatolu, Elsabad keloveti;

¹³Yeremiah kerualima, Makbannai kerualima sikai tamate sikai.

¹⁴Tea maga wanogoe Cad natuna maga seara kakada eu pei tea maraki maga ni taua ni naatam̃oli navakalo: tea waina e pei tea kiki sa liu e pataka sikai ma p̃onotia sikai, go tea warua liu e pataka sikai ma manu sikai.

¹⁵Tea maga wanogoe eu pei nara waina eu duagoto Yordan pano atelagi vea, ragi waina e puragoro natavaaki kakana maga; go eu kopasi lua tea maga mamau puti waina eu doko nap̃aloa maga paki elo sake go paki elo musu.

¹⁶Go Benyamin go Yudah natuda maga seara kakada eu rumai punusi David doko tokora kasua.

¹⁷Go David e dave pano naga ega sua ra, po noa ki da, e naga, Nimu ku pe umai punusi au ki natam̃ateana naga kuga silae au, nap̃op̃ogu e pe wo puluti mu: ma ku pe umai naga kuga vitua kinau paki tea kokona kinau maga, go te namaripavakotoana e dika nam̃elearugu, Sup̃e ki tamagida maga ega leo punusi a po pasa kasua asa.

¹⁸Ragi wanogoe Naata ni Sup̃e e pakilina ki Amasai waina e pei nap̃au ni tea rualima dolu wanogoe, go e naga, Kinami au pei tea anigo maga, David, go au pei naatam̃oli anigo maga, nigo natu ni Yesse: natam̃ateana, natam̃ateana ega vei anigo, go natam̃ateana ega vei agi tea silae anigo maga; nalakena Sup̃e anigo e do silae ko. Go David e piragi soki ra, po mari ra eu pei tea maraki maga ni taua wanogoe.

¹⁹Go tea ni naworawora ni Manasseh seara kakada eu dowo m̃elu dua ki da po umai puluti David, ragi waina nara ma Filistine maga eu mari navakalo dip̃a Saul, ma eu da silae ra mau: nalakena nawota maga ni Filistine maga eu dum̃ada pusum̃aki paki da po dip̃aki lua e pano, eu naga, Ega wo m̃elu dua ki gida pano po puluti tea maraki aneana Saul, mase eu pe atugi nap̃augida maga.

²⁰Go ragi waina e paki Siklak pano, naatam̃oli maga waia ki Manasseh eu m̃elu asa po umai puluti a, Adnah, go Yosabad, go Yediael, go Mikael, go Yosabad, go Elihu, go Sillethai, tea maraki maga ni manu maga waina eu pei tea ki Manasseh.

²¹Go nara eu silae David dip̃a taua ni tea mari pavakoto maga: nalakena eu mamau puti pei m̃aau maga, go eu pei tea maraki maga ni taua maga ni navakalo.

²²Nalakena sara naaleatia eu rumai punusi David naga euga silae a, pa pa eu pei taua warua sikai dakiusi taua ki Sup̃e.

²³Go tea maga waia eu pei naveveana ni nap̃au maga ni tea maga waina eu dakaraka raki navakalo, waina eu rumai punusi David Hebron, naga euga roa namarakiana ki Saul paki nia, pataka ni navasaana ki Yehovah.

²⁴Yudah natuna maga waina eu dape nakokoro go naio eu pei naatam̃oli manu latesa go p̃onotia latolu waina eu dakaraka raki navakalo.

²⁵Ni Simeon natuna maga, m̃aau maga raki navakalo, manu larua go p̃onotia sikai.

²⁶Ni Levi natuna maga manu pati go p̃onotia latesa.

²⁷Go Yehoiada e pei tea maraki ni nasum̃a ki Aaron, go naatam̃oli manu dolu go p̃onotia larua eu sikoti a;

²⁸Go Sadok, m̃aau natureai sikai, go tea ni nasum̃a ki tamana tea maraki rualima dua tamate dua.

²⁹Go ni Benyamin natuna maga, Saul taina maga, manu dolu: nalakena pae tuai pa pa pa namagovai warua kakada eu pavaigoro nawotaeana ni nasum̃a ki Saul.

³⁰Go ni Efraim natuna maga tivilia dua go p̃onotia latolu, m̃aau maga, naatam̃oli rogoana maga ni nasum̃a maga ni tamada maga.

³¹Go ni namagovai ni naworawora ni Manasseh tivilia sikai go manu latolu, waina eu noasai nagisada, naga euga umai po mari David ega vei nawota.

³²Go ni Issakar natuna maga, naatam̃oli maga waina eu peani namidoakiataeana nalo ni ragi maga naga euga atae tea waina e leana ki Israel naga ega mari a; nap̃auda maga eu pei naatam̃oli p̃onotia dua; go taida maga mamau puti eu doko etano ki natip̃akiana adeada.

³³Ni Sebulun, tea maga waina eu mariatae sikoti taua ni navakalo dave pano, tea marimatua navakalo, waina eu pilake pulum̃a ki nalikau visarasara maga, eu pei naatam̃oli tivilia lima; eu mariatae marimatua navakalo go eu da pei p̃op̃o rua mau.

³⁴Go ni Naftali tea maraki maga manu sikai, nara ma naatam̃oli tivilia dolu go manu larua waina eu pilake nakokoro go naio.

³⁵Go ni naworawora ni Dan waina eu dakaraka raki navakalo tivilia dua manu latolu go p̃onotia latesa.

³⁶Go ni Asher, tea maga waina eu mariatae sikoti taua ni navakalo dave pano, waina eu dakaraka raki navakalo, tivilia pati.

³⁷Go doko taleva kerua ni Yordan, ni naworawora ni Reuben, go naworawora ni Cad, go ni namagovai ni naworawora ni Manasseh, naatam̃oli manu p̃onotia sikai go tivilia dua, waina eu pilake pulum̃a ki nalikau visarasara maga.

³⁸Tea maga mamau puti wanogoe, waina eu pei naatam̃oli maga ni navakalo, waina eu mariatae marimatua navakalo, eu rumai paki Hebron nap̃op̃oda eu sikai maau asa, naga euga mari David ega vei nawota dap̃au Israel mamau: go tea laapa ni Israel nara ma eu pei p̃op̃o sikai maau asa naga euga mari David ega vei nawota.

³⁹Go nara eu doko sikoti David doko tokora wanogoe naaleatia dolu, eu ganikani po munu: nalakena taida maga eu madeada mari m̃ata.

⁴⁰Go tea maga waina eu doko m̃aladigi ki da, go waina eu pae Issakar go Sebulun go Naftali umai, eu dape navinaga umai, ass maga eu ova e, go kamel maga, go mule maga, go oks maga, flaur, go keke maga ni napuliva, go m̃okai maga ni resin maga, go waine, go naroro, go oks maga go shiip eu laapa liu: nalakena nasamasamaana e doko Israel.