Read Nguna Togoa Etafe North 1 KRONIKEL MAGA 13 Bible Online

1 KRONIKEL MAGA 13 - Nguna Togoa Etafe North bible

1 KRONIKEL MAGA 13

¹Go David e pusum̃aki sikoti nap̃au maga ni manu maga go ni p̃onotia maga, tea maraki maga mamau puti.

²Go David e noa ki nasaisaiana mamau ni Israel, e naga, Ku pe midoa ki nia naga e p̃ia, go e pe vei namasauana ki Yehovah Sup̃e anigida, tuga vitip̃aki peravera paki taigida maga waina eu doko navanua mamau ni Israel, waina tea viri maga go naworawora ni Levi eu mamau doko natokoana adeada maga doko go napega kakada maga, naga euga tum̃ada saisai ki da umai punusi gida:

³Go tuga moro dape areka ki Sup̃e anigida ega liliu umai punusi gida: nalakena tu da pusuusu paki nia naaleatia maga ki Saul mau.

⁴Go nasaisaiana mamau eu noa naga euga wo mari ega tapala nogoe: nalakena e leana namata ni narei mamau.

⁵Nalakena tea wanogoe David e piragi saisai ki Israel mamau, pae Shihor nap̃ap̃a noaisara ni Ityipt pa pa liliu tokora ni nasiliana paki Hamath, naga euga viragi areka ki Sup̃e pae Kiriath‐yearim umai.

⁶Go David e sake pano nara ma Israel mamau paki Baalah, e pei Kiriath‐yearim nogo, waina e pei agi Yudah, naga euga viragi areka ki Sup̃e pae tokora wanogoe umai, Yehovah waina e dasake doko namawota ni kerub maga doko, waina e pei tea sosoana ki Nagisa.

⁷Go eu dapetape areka ki Sup̃e m̃elu dua ki nasum̃a ki Abinadab umai, e doko kart vau sikai: go Ussa go Ahio ero pei tea p̃owolau ki kart wanogoe.

⁸Go David nara ma Israel mamau eu mari katakata narae ni Sup̃e ki nakasuaana adeada mamau: ki nalegaana maga, go ki harp maga, go ki salteri maga, go ki timbrel maga, go ki simbal maga, go ki paiga maga.

⁹Go ragi waina eu rumai paki malo wokalesue ni Kidon, Ussa e sai ki nam̃elearuna naga ega tape soki areka; nalakena oks maga eu dapilagona.

¹⁰Go namaetoana ki Yehovah e pavaga dip̃a Ussa, go e atugi a, nalakena e sai ki nam̃elearuna paki areka: go e mate tokora wanogoe narae ni Sup̃e.

¹¹Go David e midoa ki sa ki nia, nalakena Yehovah e duap̃ora paki Ussa: go e salagisa ni tokora wanogoe ki Peres‐ussa pa pa paki naaleatia waia.

¹²Go David e matau ki Sup̃e naaleatia wanogoe, po naga, Aga wo dape areka ki Sup̃e umai paki nasum̃a aginau dapale sava?

¹³Nalakena tea wanogoe David e da dape areka umai paki naliana natokoana ki David mau, ma e dapetape a dawasi paki ekopu ni nasum̃a ki Obed‐edom tea ni Cath.

¹⁴Go areka ki Sup̃e e doko sikoti tea ni nasum̃a ki Obed‐edom doko nasum̃a aneana atelagi dolu: go Yehovah e pasa p̃ia ki nasum̃a ki Obed‐edom, go tea mamau puti waina e peani ra.