Read Nguna Togoa Etafe North 1 KRONIKEL MAGA 14 Bible Online

1 KRONIKEL MAGA 14 - Nguna Togoa Etafe North bible

1 KRONIKEL MAGA 14

¹Go Hairam nawota ni Tair e dip̃aki lua tea tautauana maga pano punusi David, go nakau sidar maga, go mataisau maga ni vatu, go mataisau maga naga euga maneana davagi nasum̃a sikai.

²Go David e atae naga Yehovah e lawokisoki a e pei nawota dap̃au Israel, nalakena namarakiana aneana e pei tea sikeana pakilagi, nalakena narei aneana Israel.

³Go David e moro dawiri nagoroi seara doko Yerusalem: go David e moro pesi natuna naanoai maga go natuna nagoroi maga.

⁴Go tea maga waia eu pei nagisa ni natuna maga waina eu maneana pakilina Yerusalem; Shammua, go Shobab, Nathan, go Solomon;

⁵Ibhar, go Elishua, go Elpelet;

⁶Go Nokah, go Nefek, go Yafia;

⁷Go Elishama, go Beeliada, go Elifelet.

⁸Go ragi waina Filistine maga eu dogo naga David e pei tea vuvuraikiana e pei nawota dap̃au Israel mamau, Filistine maga eu mamau puti sake pano naga euga laaga David: go David e dogo e, po dave pano dip̃a ra.

⁹Go Filistine maga eu rumai paki nap̃aloa ni Refaim naga euga mari pavakoto.

¹⁰Go David e pusuusu paki Sup̃e, po naga, Aga wo sake dip̃a Filistine maga, kite? Go p̃a wo pitua ki da paki nam̃elearugu, kite? Go Yehovah e noa ki nia, e naga, P̃a sake pano; nalakena aga wo pitua ki da paki nam̃elearum̃a.

¹¹Go eu rumai paki Baal‐perasim, go David e atugi ra tokora wanogoe; go David e naga, Sup̃e e mari p̃oraworae tea kokona kinau maga ki nam̃elearugu, dakiusi namapuaana ni noai maga. Nalakena tea wanogoe eu salagisa ni tokora wanogoe ki Baal‐perasim.

¹²Go eu doropusi sup̃e adeada maga eu doko tokora wanogoe; go David e pitip̃aki, go eu pei tea tap̃arakiana ki nakapu.

¹³Go Filistine maga eu moro paki nap̃aloa wanogoe pano sala kerua naga euga moro mari pavakoto.

¹⁴Go David e moro pusuusu paki Sup̃e; go Sup̃e e noa ki nia, e naga, P̃a ta sake pano dip̃a ra mau: p̃a tawasi pa dua ki da po pa parati ki da leana dip̃a nakau mulberri maga.

¹⁵Go ega wo doko, ragi waina p̃a rogo nasaruruana ni nasurataana nam̃asua ni nakau mulberri maga, naga ragi wanogoe p̃a tave pano paki navakalo: nalakena Sup̃e e po pea ki‐go pano naga ega atugi taua ni Filistine maga.

¹⁶Go David e mari dapala waina Sup̃e e dip̃aki nia asa: go eu atugi taua ni Filistine maga pae Cibeon pa pa liliu Ceser.

¹⁷Go narogoana nalo ni David e dave pano paki navanua maga mamau puti; go Yehovah e mari namatauki‐nia‐ana e doko nalauna maga mamau puti.