Read Nguna Togoa Etafe North 1 KRONIKEL MAGA 15 Bible Online

1 KRONIKEL MAGA 15 - Nguna Togoa Etafe North bible

1 KRONIKEL MAGA 15

¹Go David e dum̃ana maneana davagi nasum̃a maga natokoana ki David; go e mari m̃ata ki tokora sikai raki areka ki Sup̃e, po sike tap̃aup̃au sikai raki nia.

²Go David e naga, E da p̃ia naga naatam̃oli p̃ota maga euga tapetape areka ki Sup̃e, ma ega vei naworawora ni Levi nara euga sikida: nalakena Yehovah e matadoa ra naga nara euga tapetape areka ki Sup̃e, go naga euga maneana suasua asa pa pa ega tu du po du mau du.

³Go David e piragi saisai ki Israel mamau puti Yerusalem, naga euga tape areka ki Yehovah sake umai paki malo tokoana kakana, waina e mari m̃ata ki nia raki nia.

⁴Go David e piragi saisai ki Aaron natuna maga, go naworawora ni Levi:

⁵Ni Kohath natuna maga; Uriel tea maraki, go taina maga p̃onotia sikai rualima takuna dua:

⁶Ni Merari natuna maga; Asaiah tea maraki, go taina maga p̃onotia dua rualima takuna dua:

⁷Ni Cershom natuna maga; Yoel tea maraki, go taina maga p̃onotia sikai rualima takuna dolu;

⁸Ni Elisafan natuna maga; Shemaiah tea maraki, go taina maga p̃onotia dua:

⁹Ni Hebron natuna maga; Eliel tea maraki, go taina maga rualima latolu:

¹⁰Ni Ussiel natuna maga; Amminadab tea maraki, go taina maga p̃onotia sikai rualima takuna sikai tamate dua.

¹¹Go David e soso Sadok go Abiathar tea viri maga umai, go naworawora ni Levi, go Uriel, Asaiah, go Yoel, Shemaiah, go Eliel, go Amminadab,

¹²Go e noa ki da, e naga, Nimu ku pei nap̃au maga ni nasum̃a maga ni tamada maga ni naworawora ni Levi: kuga tum̃amu mari mu kuga tautau, nimu ma taimu maga, naga kuga tapetape areka ki Yehovah, Sup̃e ki Israel, umai paki malo tokoana waina a po mari m̃ata ki nia raki nia.

¹³Nalakena nimu ku da dapetape a sala vea mau, Yehovah Sup̃e anigida e mari namarip̃oraeana sikai e doko gida nalakena tu da laaga asa pataka ni natawonakiana mau.

¹⁴Nalakena tea wanogoe tea viri maga go naworawora ni Levi eu dum̃ada mari ra eu dautau naga euga tapetape areka ki Yehovah, Sup̃e ki Israel, sake umai.

¹⁵Go Levi natuna maga eu dapetape areka ki Sup̃e ki nakau vavau dua ero doko napauda, dapala waina Moses e pitip̃aki asa pataka ni navasaana ki Yehovah.

¹⁶Go David e pasa paki tea maraki ni naworawora ni Levi naga euga matadoa taida maga euga vei tea lega maga, euga vilake tea ni roroaleo ni nalegaana maga, salteri maga, go harp maga go simbal maga, euga saruru kasua, go nadaleoda ega vei tea sikeana pilake nalaelaeaana.

¹⁷Nalakena tea wanogoe naworawora ni Levi eu matadoa Heman, Yoel natuna; go ni taina maga Asaf, Berekiah natuna; go ni taida maga Merari natuna maga, Ethan, Kushaiah natuna;

¹⁸Nara ma taida maga tagona kerua, Sekariah, Ben, go Yaasiel, go Shemiramoth, go Yehiel, go Unni, Eliab, go Benaiah, go Maaseiah, go Mattithiah, go Elifelehu, go Mikneiah, go Obed‐edom, go Yeiel, tea vavaigoro namata maga.

¹⁹Go dapala nogoe tea lega maga, Heman, Asaf, go Ethan, eu pei tea matadoaana naga euga tukituki simbal maga ni brass euga saruru kasua;

²⁰Go Sekariah, go Asiel, go Shemiramoth, go Yehiel, go Unni, go Eliab, go Maaseiah, go Benaiah euga tape salteri maga, euga vuati nakolakola;

²¹Go Mattithiah, go Elifelehu, go Mikneiah, go Obed‐edom, go Yeiel, go Asasiah euga tape harp maga, euga vuati ruruaki, naga euga vei tea maraki maga.

²²Go Kenaniah tea maraki ni naworawora ni Levi, e pei tea maraki nalegaana: nae e pei tea vasapisei ki nalegaana nalakena e pei tea atae m̃ata ki nia.

²³Go Berekiah go Elkanah ero pei tea vavaigoro maga ni namata raki areka.

²⁴Go Shebaniah, go Yoshafat, go Nethanel, go Amasai, go Sekariah, go Benaiah, go Elieser, tea viri maga, eu sui paiga maga pea ki areka ki Sup̃e: go Obed‐edom go Yehiah ero pei tea vavaigoro maga ni namata raki areka.

²⁵Go dapala nogoe David go tea matua maga ni Israel, go tea maraki maga ni manu maga, eu pano naga euga tapetape areka ni navasasokiana ki Yehovah m̃elu dua ki nasum̃a ki Obed‐edom umai pilake nalaelaeaana:

²⁶Go e pakilina, ragi waina Sup̃e e silae naworawora ni Levi waina eu dapetape areka ni navasasokiana ki Yehovah, naga eu mari naviriana ni kau anoai larua go shiip anoai larua.

²⁷Go David e pei tea sugoroana ki sugoro kovagoro sikai ni linen wia, nara ma naworawora ni Levi mamau puti waina eu dapetape areka, go tea lega maga, go Kenaniah tea maraki nalegaana, nara ma tea lega maga eu mamau: go David e pilake efod sikai ni linen.

²⁸Go dapala nogoe Israel mamau eu dapetape areka ni navasasokiana ki Yehovah sake umai pilake nararasaana, go ki nadaleo ni sagoa, go ki paiga maga, go ki simbal maga, eu marip̃arai laelaea ki salteri maga go ki harp maga.

²⁹Go e pakilina, ragi waina areka ni navasasokiana ki Yehovah e umai paki natokoana ki David, naga Mikal, Saul natuna nagoroi, e leoduru namata leoduru, po punusi nawota David e sale po mari katakata; go e midoa ki p̃alo ki nia nap̃op̃ona.