Read Nguna Togoa Etafe North 1 KRONIKEL MAGA 16 Bible Online

1 KRONIKEL MAGA 16 - Nguna Togoa Etafe North bible

1 KRONIKEL MAGA 16

¹Go eu dape areka ki Sup̃e umai, po lawo ki nia m̃aleoputo ni ekopu ni tap̃aup̃au waina David e sike a raki nia: go eu pitua ki navituaana tap̃arakiana maga go navituaana maga ni natam̃ateana narae ni Sup̃e.

²Go ragi waina David e pitua ki sua navituaana tap̃arakiana go navituaana maga ni natam̃ateana, e pasa p̃ia ki narei pae nagisa ni Yehovah.

³Go e dua sara naata ni Israel, naanoai go nagoroi, sara naata sikasikai m̃olim̃oli ni bred sikai, go matele sikai ni nap̃okasi, go keke sikai ni resin maga.

⁴Go e pasa dawona ki naworawora ni Levi seara kakada naga euga suasua narae ni areka ki Yehovah, go naga euga mari nalotuana go naga euga vasa dodo m̃ata ki po samasama ni Yehovah, Sup̃e ki Israel:

⁵Asaf e pei nap̃auda, go kerua kakana Sekariah, Yeiel, go Shemiramoth, go Yehiel, go Mattithiah, go Eliab, go Benaiah, go Obed‐edom, go Yeiel, eu puati salteri maga go harp maga; go Asaf e puati simbal maga, po mari ra eu saruru kasua;

⁶Go Benaiah go Yahasiel tea viri maga ero sui paiga maga ero da makoto asa mau, narae ni areka ni navasasokiana ki Sup̃e.

⁷Go naaleatia wanogoe David e noa p̃otae naga euga vasa dodo m̃ata ki Yehovah, ega vae nam̃elearu ni Asaf go taina maga, ega tapala nea:

⁸Kuga vasa dodo m̃ata ki Yehovah O, Kuga vioso noa nagisana; Kuga mari nawosiana aneana maga, Euga vei tea ataeana usuraki narei maga.

⁹Kuga lega ki nia, kuga lega samasama ni a; Kuga noa nawosiana ni namagaana aneana maga mamau puti.

¹⁰Kuga vakavakae nagisana tapu: Nap̃op̃o ni tea maga waina eu do laaga Yehovah ega kola laelaea.

¹¹Kuga laaga Yehovah go nakasuaana aneana; Kuga laaga naraena sara ragi.

¹²Kuga midoa ki parati ki nawosiana ni namagaana aneana maga waina e mari a; Navaivaiana aneana maga, go navasap̃otaeana maga ni nawokana.

¹³Nimu nawora ni Israel tea suasua aneana O, Nimu Yakob natuna maga, tea matadoaana aneana maga.

¹⁴Nae e pei Yehovah Sup̃e anigida: Navasap̃otaeana aneana maga eu doko maramana mamau.

¹⁵Kuga midoa ki parati ki navasasokiana aneana pa pa ega tu mau du, Navasaana waina e dip̃aki tagona manu sikai asa;

¹⁶Navasasokiana waina e mari a paki Abraham, Go navivisaana aneana paki Isaak;

¹⁷Go e lawosoki a paki Yakob ega vei natawonakiana sikai, Paki Israel naga ega vei navasasokiana sikai waina ega tu du po du mau du:

¹⁸E naga, Aga wo dua ko navanua ni Kanaan, Laine totowo ni tea veanipiolikiana animu:

¹⁹Ragi waina nimu ku ko pei naatam̃oli pisa maau; Ioro, tea visa maau sa, Nam̃enaki‐atatoko doko asa;

²⁰Go eu surata pasara pae nalauna paki nalauna, Go pae namarakiana sikai paki narei p̃ota sikai.

²¹E da suasua naga te naata sikai ega mari pavakoto paki da mau; Go e pasa kasua ki nawota maga nalakena nara;

²²E naga, Kuga ta kisidogo tea vuvuraikiana aginau maga mau, Go kuga ta mari te namarisakiana sikai paki profeta aginau maga mau.

²³Kuga lega ki Yehovah, maramana mamau; Kuga noasokisoki namautipauriana aneana pae naaleatia pa pa paki naaleatia.

²⁴Kuga noasai nasamasamaniana aneana usuraki nalauna maga, Nawosiana ni namagaana aneana maga usuraki narei maga mamau puti.

²⁵Nalakena Yehovah e pei tea warua, Go e pei tea waina ega vei tea lega‐samasamaniana warua liu: Go e pei tea waina ega vei tea mataukiana dap̃au sup̃e maga mamau puti.

²⁶Nalakena sup̃e maga mamau puti ki narei maga eu pei idolo mau: Ma Yehovah e mari nakoroatelagi maga.

²⁷Nadodomadaganiana go natatap̃auana ero doko naraena: Nakasuaana go nasamasamaana ero doko tokora tapu aneana.

²⁸Kuga tua Yehovah, naworawora maga ni nalauna maga, Kuga tua Yehovah nasamasamaana go nakasuaana.

²⁹Kuga tua Yehovah nasamasamaana ni nagisana: Kuga tape navituaana sikai po umai paki naraena: Kuga lotu ki Yehovah doko narekeikiana ni natapuana.

³⁰Kuga rurururu kivea ki naraena, maramana mamau: Maramana e pei tea lawo‐kilaketokoana, ega wo da parivari mau.

³¹Nakoroatelagi maga euga laelaea, go maramana ega sokamidi; Go euga noa m̃aleoputo ni nalauna maga, Yehovah e do maramara.

³²Natasi ega saruru, go navuraana kakana; Vanua ega rarasa, go tea mamau puti waina eu doko asa;

³³Ragi wanogoe nakau maga ni mala ni nakau euga wo kolalaelaea narae ni Yehovah, Nalakena e umai naga ega vasap̃otae navanua.

³⁴Kuga vasa dodo m̃ata ki Yehovah; nalakena nae e p̃ia: Nadodomiana aneana e du du po du mau du.

³⁵Go kuga noa, P̃a mautipauri gami; Sup̃e ni namautipauri‐gamiana O, Go p̃a viragi saisai ki gami, po pualua gami pa dua ki nalauna maga, Naga auga vasa dodo m̃ata ki nagisam̃a tapu, Go naga auga vakavakae nasamasamani‐ko‐ana.

³⁶Yehovah, Sup̃e ki Israel, ega vei tea vasap̃iakiana, Ega vae tuai mau pa pa paki tuai mau. Go narei mamau eu naga, Amen, go eu samasama ni Yehovah.

³⁷Go David e doropusi Asaf nara ma taina maga eu doko tokora wanogoe doko narae ni areka ni navasasokiana ki Yehovah, naga euga suasua narae ni areka pitip̃atip̃a, pataka ni nawosiana ni sara naaleatia:

³⁸Go Obed‐edom go Hosah nara ma taida maga rualima latesa tamate latolu; Obed‐edom natu ni Yeduthun go Hosah naga eroga vei tea vavaigoro namata‐pua maga:

³⁹Go Sadok tea viri, go taina maga tea viri maga, eu doko kivea ki tap̃aup̃au ki Yehovah doko tokora vakilagi waina e doko Cibeon,

⁴⁰Naga euga vitua ki navituaana tap̃arakiana maga paki Yehovah doko wede ni navituaana tap̃arakiana sara naaleatia, malip̃ogi go ragi melu, pataka ni tea mamau puti waina e pei tea midiriana doko tusi ni nawotaeana ki Yehovah, waina e dip̃aki Israel asa;

⁴¹Nara ma Heman go Yeduthun eu mamau doko, go tea maga waina eu pei tea matadoaana, waina eu noasai nagisada, naga euga vasa dodo m̃ata ki Yehovah, nalakena nadodomiana aneana e du du po du mau du;

⁴²Heman go Yeduthun ero puati paiga maga go simbal maga raki tea maga waina euga saruru kasua, go eu puati naleo maga ni nagalo raki nalegaana maga ki Sup̃e: go Yeduthun natuna maga eu pei tea vavaigoro namata‐pua.

⁴³Go naatam̃oli maga mamau puti eu m̃elu pano sara naata sikasikai paki nasum̃a adeada: go David e liliu naga ega vasa p̃ia ki tea ni nasum̃a aneana.