Read Nguna Togoa Etafe North 1 KRONIKEL MAGA 17 Bible Online

1 KRONIKEL MAGA 17 - Nguna Togoa Etafe North bible

1 KRONIKEL MAGA 17

¹Go e pakilina, ragi waina David e doko nasum̃a aneana doko, naga David e noa ki profeta Nathan, e naga, P̃a leo, kinau a doko nasum̃a sikai ni sidar, ma areka ni navasasokiana ki Yehovah e doko ekopu ni tap̃aup̃au sikai doko.

²Go Nathan e noa ki David, e naga, P̃a mari tea mamau puti waina e doko nap̃op̃om̃a; nalakena Sup̃e e sikoti ko doko.

³Go e pakilina nap̃ogiana sikai maau wanogoe, naga navasaana ki Sup̃e e pakilina ki Nathan, e naga,

⁴P̃a vano po noa ki tea suasua aginau David, p̃a naga, Yehovah e noa dapala nea, e naga, P̃a wo da maginau davagi nasum̃a sikai naga aga toko asa doko mau:

⁵Nalakena pae naaleatia waina a piragi Israel sake umai pa pa paki naaleatia waia, a da doko nasum̃a sikai doko mau; ma a doko tap̃aup̃au m̃elu paki tap̃aup̃au, go a m̃elu nasum̃atokoana sikai po paki nasum̃atokoana p̃ota sikai.

⁶Sara tokora waina kinami ma Israel au mamau surata asa, kinau a noa navasaana sikai paki tea vasap̃otae maga ni Israel sikai kakada, waina a dip̃aki da naga euga vagani narei aginau, kinau a naga, Ekasana ku da maginau davagi nasum̃a sikai ni sidar, kite?

⁷Nalakena tea wanogoe p̃a noa ki tea suasua aginau David ega tapala nea, p̃a naga, Yehovah ki taua maga e noa dapala nea, e naga, A piragi lua ko m̃elu dua ki loga ni shiip, melu dua ki naleo‐parati‐kiana ni shiip, naga p̃a vei tea maraki dap̃au narei aginau Israel:

⁸Go a doko sikoti ko doko sara tokora waina ku surata asa, go a daelua tea kokona ki‐go maga mamau puti pa dua ki naraem̃a; go aga wo manigo mari nagisa sikai ega takiusi nagisa ni tea warua liu maga waina eu doko maramana doko.

⁹Go aga wo magi narei aginau Israel noa p̃otae tokora sikai, go aga wo lawo ki da asa naga euga toko tokora adeada doko, po da moro pei tea risua‐ki‐luaana mau; go tea sigisigileo natuna maga euga wo da moro mari sa ki da mau dakiusi waina eu mari a sala vea,

¹⁰Pae naaleatia waina a pasa dawona ki tea vasap̃otae maga naga euga tap̃au narei aginau Israel pa pa paki naaleatia waia; go aga wo mari tea kokona ki‐go maga mamau puti euga wo doko etano. Go a noa ki‐go naga Yehovah ega wo manigo davagi nasum̃a sikai.

¹¹Go ega wo pakilina, ragi waina naaleatia anigo maga euga wo pei tea vakavuroana naga p̃a wo pano po doko sikoti tamam̃a maga, naga aga wo sike lawo ki naworam̃a waina ega wo edakugoro ko, waina ega vei natum̃a maga sikai kakada; go aga wo lawosoki namarakiana aneana.

¹²Nae ega wo maginau davagi nasum̃a sikai, go aga wo lawosoki malo tasake aneana ega tu mau du.

¹³Go aga wo pei tamana, go nae ega wo pei natugu: go aga wo da dape lua nadodomiana aginau m̃elu dua ki nia pano mau, dapala waina a pea dape lua e m̃elu dua ki tea waina e doko pea ki‐go.

¹⁴Ma aga wo lawosoki a ega toko nasum̃a aginau go ega toko namarakiana aginau pa pa po du mau du: go malo tasake aneana ega wo pei tea lawosokiana ega tu mau du.

¹⁵Pataka ni navasaana maga mamau puti wanogoe, go pataka ni navunusiana mamau wanogoe, Nathan e pasa paki David dapala nogoe.

¹⁶Go nawota David e umai po doko etano narae ni Yehovah, po naga, Kinau a pei sei, Yehovah Sup̃e O, go nasum̃a aginau e pei nasava, naga ku po piragi au umai paki nea?

¹⁷Go naleo wanogoe e pei tea kiki sikai namatam̃a, Sup̃e O; ma ku pasa sua tuai nalo ni nasum̃a ki tea suasua anigo, go ku midoa kinau naga a dapala naatam̃oli vakilagi sikai, Yehovah Sup̃e O.

¹⁸David e mariatae moro noa nasava paki‐go nalo ni nadodoma daganiana waina e paki tea suasua anigo? Nalakena nigo ku atae tea suasua anigo.

¹⁹Yehovah O, nalakena tea suasua anigo, go pae nap̃op̃om̃a, nigo ku mari tea warua mamau puti wanogoe, doko do mari naleo warua maga wanogoe eu pei tea ataeana.

²⁰Yehovah O, tea waina e dakiusi ko e da doko mau, go te Sup̃e sikai e dika ma nigo ku sikim̃a, dapala tea mamau puti waina au dogo sua e nadaligagami maga.

²¹Go nalauna maga ni maramana seve tea kakada e dakiusi nalauna anigo Israel, waina Sup̃e e pano naga ega taulua e naga ega vei narei aneana, naga ega manigo mari nagisa sikai tea warua go tea mataukiana, doko do kopasi lua nalauna maga pano pa dua ki narae ni narei anigo, waina ku daulua e m̃elu dua ki Ityipt?

²²Nalakena narei anigo Israel, ku dum̃am̃a mari ra eu pei narei anigo pa pa ega tu mau du; go nigo, Yehovah, ku po pei Sup̃e adeada.

²³Nalakena tea wanogoe Yehovah O, tea waina ku noa e nalo ni tea suasua anigo, go nalo ni nasum̃a aneana, ega vei tea lawosokiana pa pa ega tu mau du, go p̃a mari ega tapala waina ku po noa sua e.

²⁴Ega vei tea lawosokiana, naga nagisam̃a ega vei tea samasamaniana pa pa ega tu mau du, doko do naga, Yehovah ki taua maga e pei Sup̃e ki Israel, e pei Sup̃e sikai agi Israel: go nasum̃a ki tea suasua anigo David ega vei tea lawosokiana naraem̃a.

²⁵Nalakena nigo, Sup̃e aginau O, ku po noasai paki tea suasua anigo naga p̃a wo maneana davagi nasum̃a sikai: nalakena tea wanogoe tea suasua anigo e pap̃ai doko nap̃op̃ona naga ega tapasavasa naraem̃a.

²⁶Go Yehovah O, nigo ku pei Sup̃e doko, go ku po sai nawiaana wanogoe paki tea suasua anigo:

²⁷Nalakena tea wanogoe ku midoa ki m̃ata ki nia naga p̃a vasap̃ia ki nasum̃a ki tea suasua anigo, naga ega toko po doko mau doko naraem̃a pa pa po du mau du: nalakena nigo, Yehovah O, ku po pasap̃ia ki nia, go ega wo pei tea vasap̃iakiana pa pa ega tu mau du.