Read Nguna Togoa Etafe North 1 KRONIKEL MAGA 18 Bible Online

1 KRONIKEL MAGA 18 - Nguna Togoa Etafe North bible

1 KRONIKEL MAGA 18

¹Go edaku ki tea wanogoe e pakilina naga David e atugi Filistine maga, po mari matua ki da, go e pualua Cath go natokoana kakana maga m̃elu dua ki nam̃elearu ni Filistine maga.

²Go e atugi Moab; go tea ni Moab maga eu po pei tea suasua maga ki David, po dape nasautoga maga umai.

³Go David e atugi Hadareser nawota ni Sobah pa pa paki Hamath, ragi waina e pano naga ega lawosoki namarakiana aneana nadigi ni noaisara Eufrates.

⁴Go David e pualua kariot manu sikai kiana, go naatam̃oli manu larua waina eu sakesaake horse, go naatam̃oli tivilia dua waina eu surata: go David e daekotovi nawaliu ni nakolovae ni horse maga ni kariot, ma e mauti seara kakada raki kariot p̃onotia sikai.

⁵Go ragi waina tea ni Siria ni Damaseko eu rumai naga euga silae Hadareser nawota ni Sobah, David e atugi tea ni Siria naatam̃oli tivilia dua go manu dua.

⁶Go David e doropusi taua ni tea vavaigoro maga eu doko Siria ni Damaseko doko; go tea ni Siria eu po pei tea suasua maga ki David, po dape nasautoga maga umai. Go Yehovah e dua David namarimatuaana sara tokora waina e paki asa pano.

⁷Go David e dape lua nakokoro maga ni kold waina eu pei tea ki tea suasua maga ki Hadareser, po dape ra paki Yerusalem pano.

⁸Go David e pualua brass e p̃arua liu m̃elu dua ki Tibhath go m̃elu dua ki Kun, natokoana maga ki Hadareser, brass waina Solomon e mari lasa takiana warua sikai ni noai asa, go tip̃a maga, go lasa maga ni brass.

⁹Go ragi waina Tou nawota ni Hamath e dogo naga David e atugi puti taua ni navakalo ki Hadareser nawota ni Sobah,

¹⁰E dip̃aki lua natuna Hadoram pa punusi nawota David, naga ega vasa dodomi a, go naga ega vasa samasamani a, nalakena e marimari dip̃a Hadareser po atugi a; nalakena Hadareser e pea mari navakalo maga dip̃a Tou; go e dape lasa visarasara maga laapa ni kold go ni silver go ni brass eu sikoti a pano.

¹¹Tea maga wanogoe nawota David e moro dapugoro ra paki Yehovah, pilake silver go kold waina e piragi lua pavakoto asa m̃elu dua ki nalauna maga mamau puti; m̃elu dua ki Edom, go m̃elu dua ki Moab, go m̃elu dua ki Ammon natuna maga, go m̃elu dua ki Filistine maga, go m̃elu dua ki Amalek.

¹²Go Abishai natu ni Seruiah e atugi naworawora ni Edom naatam̃oli tivilia sikai go manu latolu Nap̃aloa ni Natasimena.

¹³Go e doropusi taua ni tea vavaigoro maga eu doko Edom doko; go naworawora ni Edom mamau puti eu po pei tea suasua maga ki David. Go Yehovah e dua David namarimatuaana sara tokora waina e paki asa pano.

¹⁴Go David e maramara dap̃au Israel mamau; go e magi narei aneana mamau puti mari navasap̃otaeana go naleanaana.

¹⁵Go Yoab natu ni Seruiah e pei nap̃au ni taua ni naatam̃oli navakalo; go Yehoshafat natu ni Ahilud e pei tea terausi.

¹⁶Go Sadok natu ni Ahitub, go Abimelek natu ni Abiathar ero pei tea viri maga; go Shavsha e pei tea midiri;

¹⁷Go Benaiah natu ni Yehoiada e pei nap̃au ni tea ni Kaftor go Filistine maga; go David natuna maga eu pei nap̃au ni tasiga maga waina eu doko raki nawota.