Read Nguna Togoa Etafe North 1 KRONIKEL MAGA 19 Bible Online

1 KRONIKEL MAGA 19 - Nguna Togoa Etafe North bible

1 KRONIKEL MAGA 19

¹Go e pakilina edaku ki tea wanogoe, naga Nahash nawota ki Ammon natuna maga e mate, go natuna e maramara du oli a.

²Go David e naga, Aga wo mari nadodomiana paki Hanun natu ni Nahash, nalakena tamana e pea mari nadodomiana paki nau. Go David e dip̃aki lua tea tautauana maga pa punusi a naga euga vasa pakavakale a nalo ni tamana. Go tea suasua maga ki David eu rumai paki navanua ki Ammon natuna maga punusi Hanun naga euga vasa pakavakale a.

³Ma tea maraki maga ki Ammon natuna maga eu noa ki Hanun, eu naga, Ku midoa ki nia naga David e do dodomadagani tamam̃a, naga e dip̃aki lua tea vasa pakavakale maga eu rumai punusi ko, kite? Tea suasua aneana maga eu da umai punusi ko naga euga leousiusi, po dap̃olosiwo, po leo pavaraka navanua, kite?

⁴Nalakena tea wanogoe Hanun e puati tea suasua maga ki David, po masi naloluda, po masi kotovi tea suniana adeada maga liliu natap̃oraeda, po dip̃aki lua ra pano.

⁵Go naatam̃oli seara eu pano po noa ki David takana waina e pei tea mariana paki naatam̃oli maga wanogoe. Go e pitip̃aki pano naga euga sua ra; nalakena naatam̃oli maga wanogoe eu pei tea mariana eu maliere p̃arua. Go nawota e naga, Kuga toko Yeriko doko pa pa nalolu ni nasimu euga moro ulua, go ragi wanogoe kuga moro liliu umai.

⁶Go ragi waina Ammon natuna maga eu punusi naga eu dum̃ada mari ra eu pei tea mamaragokiana paki David, Hanun go Ammon natuna maga eu dip̃aki lua talenta ni silver manu sikai naga ega vei navasadapuiana raki kariot maga go naatam̃oli sakesaake horse maga m̃elu Mesopotamia, go m̃elu Aram‐maakah, go m̃elu Sobah.

⁷Go eu pasadapui kariot tivilia dolu go manu dua, go nawota ni Maakah nara ma narei aneana; waina eu rumai po sike tap̃aup̃au adeada maga kivea ki Medeba. Go Ammon natuna maga eu pae natokoana adeada maga umai po dum̃ada saisai ki da, po umai mari navakalo.

⁸Go ragi waina David e dogo e, e dip̃aki lua Yoab go taua ni naatam̃oli marimatua maga eu mamau pano.

⁹Go Ammon natuna maga eu dave umai, po dum̃ada dutua ki da raki navakalo namata‐pua ni natokoana: go nawota maga waina eu rumai sua, eu dum̃ada doko mamau doko nagurua.

¹⁰Go ragi waina Yoab e punusi naga navakalo e pei tea marim̃atakiana dip̃a e kivea go kiedaku, e matadoa naatam̃oli wia maga mamau puti ni Israel, po dutua ki da naga euga marimari dip̃a naatam̃oli maga ni Siria.

¹¹Go tea p̃ota maga mamau puti ni narei waina eu ko doko, e doropusi ra eu doko nam̃elearu ni taina Abishai, go nara eu dum̃ada dutua ki da dip̃a Ammon natuna maga.

¹²Go e naga, Tea ni Siria maga eu pe kasua liu au, p̃a silae au; ma Ammon natuna maga eu pe kasua liu ko, kinau aga wo silae ko.

¹³P̃a viviari p̃ia, go tuga magi narei anigida, go magi natokoana maga ki Sup̃e anigida mari dagaragara: go Yehovah ega mari tea waina e p̃ia namatana.

¹⁴Dapala nogoe Yoab ma narei waina eu mamau doko, eu disu paki m̃aladigi kivea ki naatam̃oli maga ni Siria po mari navakalo; go eu sava pa dua ki naraena pano.

¹⁵Go ragi waina Ammon natuna maga eu punusi naga tea ni Siria maga eu sava pano, nara ma eu sava pa dua ki narae ni taina Abishai pano, po sili paki natokoana. Go Yoab e paki Yerusalem.

¹⁶Go ragi waina tea ni Siria maga eu punusi naga eu pei tea marimatuakiana narae ni Israel, eu dip̃aki lua tea tautauana maga pano po piragi lua tea ni Siria maga waina eu doko taleva kerua ni Noaisara umai, go Shofak tea maraki ni taua navakalo ki Hadareser e pei nap̃auda.

¹⁷Go e pei tea noaana paki David; go e piragi saisai ki Israel mamau, po duagoto Yordan pano, po umai pa parati ki da, po dutua ki taua navakalo dip̃a ra. Go ragi waina David e dutua ki sua taua navakalo dip̃a tea ni Siria maga, nara eu marimari paki nia.

¹⁸Go tea ni Siria maga eu sava pa dua ki narae ni Israel pano; go David e atugi tea ni Siria maga, naatam̃oli maga ni kariot manu larua, go naatam̃oli maga waina eu surata tivilia pati, po mari punue Shofak tea maraki ni taua navakalo.

¹⁹Go ragi waina tea suasua maga ki Hadareser eu punusi naga eu pei tea marimatuakiana narae ni Israel, eu mari natam̃ateana sikoti David, po maneana suasua: go tea ni Siria maga eu da moro masau silae Ammon natuna maga mau.