Read Nguna Togoa Etafe North 1 KRONIKEL MAGA 21 Bible Online

1 KRONIKEL MAGA 21 - Nguna Togoa Etafe North bible

1 KRONIKEL MAGA 21

¹Go Satan e lawodu dip̃a Israel, po maridie David naga ega veve parati ki Israel.

²Go David e noa ki Yoab go ki tea maraki maga ni narei, e naga, Kuga vano, kuga veve parati ki Israel pae Beer‐sheba pano pa pa liliu Dan; po maginau dape navasaana umai naga aga atae totowo ni naveveana kakada.

³Go Yoab e naga, Yehovah ega mari narei aneana euga laapa ega vaka p̃onotia sikai liu tea maga waina eu doko: ma nawota aginau nawota, nara eu da mamau puti pei tea suasua maga ki nawota aginau, kite? Go ekasana nawota aginau e datago naleo wanogoe? Ekasana ega wo pei nalakena sogi ega wo liko Israel?

⁴Ma navasaana ki nawota e marimatua ki tea ki Yoab. Nalakena tea wanogoe Yoab e m̃elu pano, po surata usuraki Israel mamau, po umai paki Yerusalem.

⁵Go Yoab e dua David totowo ni naveveana ni narei. Go tea maga mamau puti ni Israel waina eu puati lova eu pei naatam̃oli tivilia sikai paka tivilia sikai go manu p̃onotia sikai: go naatam̃oli maga ni Yudah waina eu puati lova eu pei manu p̃onotia pati, tivilia takuna larua.

⁶Ma e da peve Levi go Benyamin eu sikoti ra mau: nalakena Yoab e mamarago ki navasaana ki nawota.

⁷Go Sup̃e e maeto nalo kakana; nalakena tea wanogoe e atugi Israel.

⁸Go David e noa ki Sup̃e, e naga, Kinau a po mari naleo sa warua, nalakena a mari tea wanogoe: ma a pavara ni ko, p̃a tape lua namarinaleotageleana ki tea suasua anigo; nalakena kinau a po mari tea ni naveilalaana.

⁹Go Yehovah e noa ki Cad, tea kikita ki David, e naga,

¹⁰P̃a vano po noa ki David, p̃a naga, Yehovah e noa dapala nea, e naga, A sai ki naleo dolu paki‐go; p̃a tum̃am̃a manigo matadoa sikai kakada, naga aga manigo mari a.

¹¹Go Cad e umai punusi David, po noa ki nia, e naga, Yehovah e noa dapala nea, e naga, P̃a matadoa tea waina ku masauna;

¹²Mase e pe vei natau dolu ni navitoloana; kite e pe vei atelagi dolu ni namarisakiana narae ni tea kokona ki‐go maga, lova adeada e pe va parati ki‐go; kite e pe vei naaleatia dolu ni lova ki Yehovah, nasasanaana sa doko navanua, agelo ki Yehovah e pe mari sa sa ki usuraki namarakiana mamau ni Israel. Nalakena tea wanogoe p̃a midoakiusiusi a, po noa kinau seve navasadaraana waina aga wo dape a liliu pa punusi tea waina e dip̃aki lua au umai.

¹³Go David e noa ki Cad, e naga, Kinau a pei tea riesoki‐kasua‐kiana: aga rowo paki nam̃elearu ni Yehovah; nalakena nadodomiana aneana e p̃arua p̃arua liu: go aga ta dowo paki nam̃elearu ni naatam̃oli mau.

¹⁴Nalakena tea wanogoe Yehovah e dip̃aki lua nasasanaana sa sikai paki Israel: go naatam̃oli maga ni Israel tivilia larua eu dowo asa.

¹⁵Go Sup̃e e dip̃aki lua agelo sikai paki Yerusalem naga ega mari sa sa ki nia: go ragi waina e pae asa mari sa sa ki nia, Yehovah e leo punusi a, go e midoaki piri nasaana wanogoe, go e noa ki agelo waina e do mari sa sa ki, e naga, E pei tea lapa; p̃a tum̃am̃a dugoro nam̃elearum̃a. Go agelo ki Yehovah e lawodu pisari nadigi ni malo wokalesue ki Ornan, naworawora ni Yebus sikai kakada.

¹⁶Go David e sike namatana maga, po punusi agelo ki Yehovah e lawodu namawota ni maramana go ni nakoroatelagi, lova sailuaana sikai e doko nam̃elearuna, po pei tea saikiana elagi ki Yerusalem. Go David go tea matua maga ni Israel eu kolo suai natano, eu pei tea sugoroana ki nakulukulu ni sak.

¹⁷Go David e noa ki Sup̃e e naga, E da pei kinau waina a pitip̃aki naga narei euga vei tea veveana, kite? E pei kinau waina a mari naleo sa po mari malauweluki p̃arua; ma shiip maga waia, nara eu mari nasava? A pavara ni ko, Yehovah Sup̃e aginau O, nam̃elearum̃a ega tip̃a au, go ega tip̃a nasum̃a ki tamagu; ma ega ta dip̃a narei anigo mau, naga euga ta pei tea marisakiana mau.

¹⁸Go agelo ki Yehovah e dip̃aki Cad naga ega noa ki David naga David ega sake pano, po magi Yehovah sike lawo ki wede ni naviriana sikai malo wokalesue ki Ornan naatam̃oli ni Yebus.

¹⁹Go David e sake pano nalakena navasaana ki Cad, waina e pasa asa pae nagisa ni Yehovah.

²⁰Go Ornan e leo kitaku, po punusi agelo wanogoe; go natuna pati waina eu mamau doko, eu dum̃ada dasuru ki da doko. Go Ornan e do p̃oka lesue whiit.

²¹Go ragi waina David e umai punusi Ornan, Ornan e leo po punusi David, po dave m̃elu dua ki malo wokalesue, po kolo suai natano paki David.

²²Go David e noa ki Ornan, e naga, P̃a tua au tokora ni wokalesueana waia naga aga magi Yehovah davagi wede ni naviriana sikai ega toko asa: aga wo dua ko naulu waina e pei totowo kakana: naga nasasanaana ega m̃elu dua ki narei.

²³Go Ornan e noa ki David, e naga, P̃a tape a ega vei anigo, go nawota aginau nawota ega mari tea waina e p̃ia namatana maga: p̃a leo, a dua ko oks maga euga vei navituaana tap̃arakiana maga, go nakau wokalesue maga euga vei nakapu kakana, go whiit ega vei navituaana ni flaur; a pitua ki puti a.

²⁴Go nawota David e noa ki Ornan, e naga, Ee; ma aga wo pakotovi a ki totowo mamau waina e patakana: nalakena aga wo da magi Yehovah dape tea waina e pei tea anigo mau, kite pitua ki navituaana tap̃arakiana sikai waina navakotoviana kakana e dika.

²⁵Nalakena tea wanogoe David e dua Ornan shekel ni kold p̃onotia latesa namadagaana kakana raki tokora wanogoe.

²⁶Go tokora wanogoe David e magi Yehovah davagi wede ni naviriana sikai asa, po pitua ki navituaana tap̃arakiana maga go navituaana maga ni natam̃ateana, po pioso paki Yehovah; go e pasadara e pae nakoroatelagi ki nakapu doko wede ni naviriana ni navituaana tap̃arakiana.

²⁷Go Yehovah e dip̃aki agelo wanogoe; go e moro sai ki lova aneana paki nala kakana.

²⁸Ragi wanogoe, ragi waina David e punusi naga Yehovah e pasadara e doko malo wokalesue ki Ornan naatam̃oli ni Yebus, e mari naviriana aneana tokora wanogoe.

²⁹Nalakena tap̃aup̃au ki Yehovah, waina Moses e mari a masop̃alo, go wede ni naviriana ni navituaana tap̃arakiana, e doko tokora vakilagi Cibeon naaleatia maga wanogoe.

³⁰Ma David e da mariatae paki m̃aladigi ki nia naga ega vusuusu ki Yehovah mau: nalakena e matau ki lova ki agelo ki Yehovah.