Read Nguna Togoa Etafe North 1 KRONIKEL MAGA 22 Bible Online

1 KRONIKEL MAGA 22 - Nguna Togoa Etafe North bible

1 KRONIKEL MAGA 22

¹Go David e naga, Tea waia e pei nasum̃a ki Yehovah Sup̃e, go tea waia e pei wede ni naviriana tap̃arakiana ki Israel.

²Go David e pitip̃aki naga euga viragi saisai ki nam̃enaki maga waina eu doko navanua ni Israel; go e lawo ki mataisau maga ni vatu, naga euga tae m̃ata ki vatu maga naga euga tavagi nasum̃a ki Sup̃e.

³Go David e mari m̃ata ki taua warua ni airon naga euga mari tea turituri maga ni namata maga ni namata‐pua maga, go malo tasokatakiana maga asa; go taua warua ni brass waina e mari sap̃o pei tea rowogi‐atae‐ana;

⁴Go nakau sidar maga waina eu mari sa pei tea veveana mau: nalakena tea ni Sidon go tea ni Tair eu dape nakau sidar laapa umai dua David asa.

⁵Go David e naga, Natugu Solomon e ko pei tea vusavusa go e manainai, go nasum̃a waina ega wo magi Yehovah pei tea tavagiana, e one asa one naga ega vei tea midoakim̃ata‐ki‐p̃arua‐kiana, tea rogoana go tea samasamaniana usuraki navanua maga mamau puti: nalakena tea wanogoe kinau aga wo mari m̃ata. Go dapala nogoe David e marisokisoki taua warua ni sara naleo maga ni nawosiana kakana, pea ki namateana aneana.

⁶Go e soso natuna Solomon umai, po pasa parati ki nia naga ega magi Yehovah, Sup̃e ki Israel, davagi nasum̃a sikai.

⁷Go David e noa ki natuna Solomon, e naga, Ma kinau, e doko nap̃op̃ogu naga aga magi nagisa ni Yehovah Sup̃e aginau davagi nasum̃a sikai.

⁸Ma navasaana ki Yehovah e pakilina kinau, e naga, Nigo ku daki p̃arua ki nada, go ku mari navakalo warua maga: p̃a wo da magi nagisagu davagi nasum̃a sikai mau, nalakena ku daki p̃arua ki nada naraegu maramana.

⁹P̃a leo, piakiki naanoai sikai ega wo manigo pakilina, waina ega wo pei naatam̃oli sikai ni natam̃ateana; go aga wo dua e namaromaroana pa dua ki tea kokona ki nia maga mamau puti daliviri: nalakena ega wo pei tea salagisana ki Solomon, go aga wo dua Israel natam̃ateana go natoko‐dam̃ate‐ana naaleatia aneana maga:

¹⁰Nae ega wo magi nagisagu davagi nasum̃a sikai; go nae ega wo pei natugu, go kinau aga wo pei tamana; go aga wo lawosoki malo tasake ni namarakiana aneana dap̃au Israel ega tu po du mau du.

¹¹Go natugu, Yehovah ega sikoti ko; go p̃a risu p̃ia, po davagi nasum̃a ki Yehovah Sup̃e anigo, dapala waina e noa e nalo kakam̃a.

¹²Ma tea sikai maau, Yehovah ega tua ko namidoakip̃otaeana go namidoakiataeana, naga p̃a vavaigoro nawotaeana ki Yehovah Sup̃e anigo ragi waina ega tip̃aki‐go nalo ni Israel.

¹³Go ku pe vavaigoro naga p̃a mari natawonakiana maga go navasap̃otaeana maga waina Yehovah e pasa parati ki Moses asa nalo ni Israel, ku pe wo disu po p̃ia: p̃a kasua, go p̃a viviari p̃ia; p̃a ta mataku mau, go p̃a ta m̃anaunau mau.

¹⁴Go p̃a leo, doko narogokitesaana aginau a po marisokisoki nalo ni nasum̃a ki Yehovah, a mari m̃ata ki talenta ni kold manu p̃onotia sikai, go talenta ni silver tivilia sikai paka tivilia sikai; go brass go airon waina e mari sap̃o pei tea rowogi‐atae‐ana mau, nalakena e pei taua warua liu: go a moro mari m̃ata ki napapa go vatu; go nigo ku mariatae sokari a.

¹⁵Go ku peani naatam̃oli wosiwosi maga eu laapa liu, tea tae vatu maga go tea tata maga, go mataisau maga ni vatu go ni napapa, go naatam̃oli manumatua maga nalo ni nawosiana visarasara maga mamau puti;

¹⁶Kold, go silver, go brass, go airon eu p̃arua, eu da pei tea veve‐atae‐ana mau; p̃a tuleana po p̃osiwosi, go Yehovah ega sikoti ko.

¹⁷Go David e dip̃aki tea maraki maga mamau puti ni Israel naga euga silae natuna Solomon, doko do naga,

¹⁸Yehovah Sup̃e animu e da sikoti mu doko, kite? Go e da dua mu namaromaroana daliviri, kite? Nalakena e pitua ki naatatoko maga ni navanua paki nam̃elearugu; go navanua e doko etano narae ni Yehovah, go narae ni narei aneana.

¹⁹Go kuga lawo ki nap̃op̃omu go ki naatamu naga kuga laaga Yehovah Sup̃e animu; nalakena tea wanogoe kuga tuleana, go kuga tavagi tokora tapu ki Yehovah Sup̃e, naga kuga viragi areka ni navasasokiana ki Yehovah, go lasa tapu maga ki Sup̃e umai paki ekopu ni nasum̃a waina ega wo magi nagisa ni Yehovah pei tea tavagiana.