Read Nguna Togoa Etafe North 1 KRONIKEL MAGA 23 Bible Online

1 KRONIKEL MAGA 23 - Nguna Togoa Etafe North bible

1 KRONIKEL MAGA 23

¹Go David e po pei tea matua, go naaleatia aneana maga eu laapa; go e mari natuna Solomon e pei nawota dap̃au Israel.

²Go e piragi saisai ki tea maraki maga mamau puti ni Israel, nara ma tea viri maga go naworawora ni Levi eu mamau.

³Go naworawora ni Levi waina eu pei tea ni natau rualima dolu go do liu, eu pei tea veveana: go totowo kakada tea mamau puti eu pei naatam̃oli tivilia dolu go manu latolu.

⁴Go seara kakada, naatam̃oli tivilia dua go manu pati, eu pei tea lawokiana naga euga vei tea leo parati ki maga dap̃au nawosiana ni nasum̃a ki Yehovah; go manu latesa eu pei tasiga maga go tea vasap̃otae maga:

⁵Go manu pati eu pei tea vavaigoro maga ni namata‐pua; go manu pati eu samasama ni Yehovah ki nagalo maga waina kinau a mari ra, David e noa e, naga euga samasama asa.

⁶Go David e dap̃otawotae ra pae naworawora maga ni Levi natuna maga; Cershon, Kohath, go Merari.

⁷Tea ni naworawora ni Cershon; Ladan go Shimei.

⁸Ladan natuna maga; Yehiel nap̃auda, go Setham, go Yoel, nara eu dolu.

⁹Shimei natuna maga; Shelomoth, go Hasiel, go Haran, nara eu dolu. Tea maga wanogoe eu pei nap̃au maga ni nasum̃a maga ni tamada maga ki Ladan.

¹⁰Go Shimei natuna maga: Yahath, Sina, go Yeush, go Beriah. Nara pati wanogoe eu pei Shimei natuna maga.

¹¹Go Yahath e pei nap̃auda, go Sisah e pei kerua kakana: ma Yeush go Beriah natuda maga eu da laapa mau; nalakena tea wanogoe eu pei tea veveana eu pei tea ni nasum̃a sikai maau ni tamada maga.

¹²Kohath natuna maga; Amram, Ishar, Hebron, go Ussiel, nara eu pati.

¹³Amram natuna maga; Aaron go Moses: go Aaron e pei tea mari‐masale‐kiana, nara ma natuna maga, naga euga tapugoro naleo tapu liu maga, pa pa ega tu mau du, naga euga to dap̃ara ki tea ni nap̃o wia narae ni Yehovah, po maneana suasua, go naga euga to pasa p̃ia pae nagisana pa pa ega tu mau du.

¹⁴Go nalo ni Moses naatam̃oli ki Sup̃e natuna maga, nagisada maga eu pei tea noaana sikoti naworawora ni Levi.

¹⁵Moses natuna maga; Cershom go Elieser.

¹⁶Cershom natuna maga; Shebuel nap̃auda.

¹⁷Go Elieser natuna maga, Rehabiah nap̃auda. Go Elieser e da moro peani natuna p̃ota sikai mau; ma Rehabiah natuna maga eu laapa liu.

¹⁸Ishar natuna maga; Shelomith nap̃auda.

¹⁹Hebron natuna maga; Yeriah nap̃auda, Amariah kerua kakana, Yahasiel ketolu, go Yekameam kevati.

²⁰Ussiel natuna maga; Maika nap̃auda, go Isshiah kerua kakana.

²¹Merari natuna maga; Mahli go Mushi. Mahli natuna maga; Eleasar go Kish.

²²Go Eleasar e mate, e dika natuna naanoai, ma eu pei nagoroi mau: go goreda maga, Kish natuna naanoai maga, eu dawiri ra.

²³Mushi natuna maga; Mahli, go Eder, go Yeremoth, nara eu dolu.

²⁴Tea maga wanogoe eu pei Levi natuna maga pae nasum̃a ni tamada maga ni tea maga waina eu pei tea veveana pae nagisada maga, waina eu mari nawosiana ni nasuasuaana ni nasum̃a ki Yehovah, waina eu pei tea ni natau rualima dua go do liu.

²⁵Go David e naga, Yehovah, Sup̃e ki Israel, e dua narei aneana namaromaroana; go e doko Yerusalem doko pa pa ega tu du po du mau du:

²⁶Go ega ta moro pei nawosiana ki naworawora ni Levi naga euga tapetape tap̃aup̃au go lasa kakana maga raki nawosiana kakana.

²⁷Nalakena pae navasaana malaapa ki David, Levi natuna maga waina eu pei tea ni natau rualima dua go do liu, eu pei tea veveana.

²⁸Nalakena e pei nawosiana adeada naga euga toko raki Aaron natuna maga naga euga silae ra nawosiana ni nasuasuaana ni nasum̃a ki Yehovah, euga leo parati ki roara maga, go ekopu ni em̃ago maga, go nawosiana ni namari‐dautau‐kiana ki naleo tapu maga, nawosiana ni nasuasuaana ni nasum̃a ki Sup̃e;

²⁹Go bred tokorae, go flaur wia tea ni navituaana ni flaur, e pe vei tea ni keke maga waina leven e dika asa, kite e pe vei tea waina e pei tea veniana pan, kite tea waina e pei tea sarisariana pilake naroro, go sara narowogiana go vatu dotowo visarasara maga;

³⁰Go naga euga lawodu sara malip̃ogi naga euga vasa dodo m̃ata ki po pasa samasama ni Yehovah, po moro mari ega tapala nogoe ragi m̃elu;

³¹Go naga euga vitua ki navituaana tap̃arakiana maga paki Yehovah, doko sabbath maga, atelagi vau maga, go nasaisaiana tatutakiana maga pitip̃atip̃a narae ni Yehovah pataka ni natawonakiana nalo kakada:

³²Go naga euga vavaigoro naleoparatikiana ni tap̃aup̃au ni nasaisaiana, go naleoparatikiana ni tokora tapu, go naleoparatikiana ni taida Aaron natuna maga, nalo ni nasuasuaana ni nasum̃a ki Yehovah.