Read Nguna Togoa Etafe North 1 KRONIKEL MAGA 28 Bible Online

1 KRONIKEL MAGA 28 - Nguna Togoa Etafe North bible

1 KRONIKEL MAGA 28

¹Go David e piragi saisai ki tea maraki maga mamau puti ni Israel, tea maraki maga ni naworawora maga, go tea maraki maga ni taua maga waina eu magi nawota suasua pae natap̃otawotaeana adeada maga, go tea maraki maga ni manu maga, go tea maraki maga ni p̃onotia maga, go tea maraki maga ni naveaniana go ni sara naleo ki nawota go ki natuna maga, nara ma tasiga maga, go m̃aau maga, naatam̃oli kasua maga mamau puti ni namarimatuaana eu rumai paki Yerusalem.

²Go nawota David e duleana, po naga, Kuga rogo au, taigu maga, go narei aginau: kinau, e doko nap̃op̃ogu naga aga tavagi nasum̃a sikai agi areka ni navasasokiana ki Yehovah naga ega maromaro asa, go agi malo vasiana ni nam̃ele ni Sup̃e anigida; go a mari m̃ata nalo ni natavagiana.

³Ma Sup̃e e noa kinau, e naga, P̃a wo da magi nagisagu davagi nasum̃a sikai mau, nalakena nigo ku pei naatam̃oli sikai ni navakalo, go ku daki nada.

⁴Ma Yehovah, Sup̃e ki Israel, e matadoa au m̃elu nasum̃a mamau ki tamagu naga aga vei nawota dap̃au Israel pa pa ega tu mau du: nalakena e matadoa Yudah naga ega vei tea maraki; go doko nasum̃a ni Yudah, nasum̃a ki tamagu; go kinami, tamagu natuna maga, au mamau puti doko go e midoaki m̃ata kinau naga ega mari au aga vei nawota dap̃au Israel mamau:

⁵Go m̃elu natugu maga mamau puti, (nalakena Yehovah e dua au piakiki naanoai eu laapa,) e matadoa natugu Solomon naga ega tasake doko malo tasake ni namarakiana ki Yehovah dap̃au Israel.

⁶Go e noa kinau, e naga, Natum̃a Solomon ega wo davagi nasum̃a aginau go roara kakana aginau maga: nalakena a matadoa e naga ega vei natugu, go kinau aga wo pei tamana.

⁷Go aga wo lawosoki namarakiana aneana ega tu du po du mau du, nae e pe kasua doko naga e pe mari natip̃akiana aginau maga go navasap̃otaeana aginau maga, dapala waina e do pei tea mariana naaleatia waia.

⁸Nalakena tea wanogoe, doko narae ni Israel mamau go ni nasaisaiana ki Yehovah, go doko natakidorogoana ni Sup̃e anigida, kuga vavaigoro po laaga parati ki natip̃akiana maga mamau puti ki Yehovah Sup̃e animu: naga kuga veani pioli ki navanua wia waia, po magi natumu maga waina euga wo edakugoro mu, doropusi a ega vei naveanipiolikiana sikai pa pa ega tu mau du.

⁹Go nigo, natugu Solomon, p̃a atae Sup̃e ki tamam̃a, po maneana suasua ki p̃op̃o wialua sikai go ki namidodoana suasua sikai: nalakena Yehovah e leousiusi nap̃op̃o ni naatam̃oli maga mamau puti, go e midoaki atae sara namidoakiana maga ni namidodoana maga: ku pe laaga asa, e pe wo pei tea vap̃aiana ako; ma ku pe toropusi a, nae ma e pe wo dip̃a doa ko pa pa ega tu mau du.

¹⁰P̃a vavaigoro; nalakena Yehovah e matadoa ko naga p̃a tavagi nasum̃a sikai ega vei tokora tapu: p̃a kasua, po mari a.

¹¹Go David e dua natuna Solomon totowo ni namari‐dawona‐kiana ni natara‐taup̃a ni nasum̃a tapu, go ni nasum̃a kakana maga, go ni em̃ago kakana maga ni natauakiana ni naleo wia maga, go ni em̃ago kakana maga ni tagona ni elagi, go ni em̃ago kakana maga ni m̃aleoputo, go ni tokora ni tea tap̃augoro:

¹²Go namaridawona‐kiana mamau puti waina e peani a doko nap̃op̃ona nalo ni roara maga ni nasum̃a ki Yehovah, go nalo ni em̃ago maga mamau puti daliviri, nalo ni nasum̃a maga ni natauakiana ni naleo wia maga ni nasum̃a ki Sup̃e, go nalo ni nasum̃a maga ni natauakiana ni naleo tapu maga:

¹³Go nalo ni natap̃otawotaeana maga ni tea viri maga, go ni naworawora ni Levi, go nalo ni nawosiana mamau puti ni nasuasuaana ni nasum̃a ki Yehovah, go nalo ni lasa maga mamau puti ni nasuasuaana ni nasum̃a ki Yehovah:

¹⁴Totowo ni kold raki lasa maga ni kold, lasa maga mamau puti ni nawosiana visarasara maga ni nasuasuaana; totowo ni silver raki lasa maga ni silver, lasa maga mamau puti ni nawosiana visarasara maga ni nasuasuaana:

¹⁵Go totowo ni kold raki nakau ni nasulu maga ni kold, go raki nasulu kakana maga ni kold, totowo ni sara nakau ni nasulu maga sikasikai go raki nasulu kakana maga: go raki nakau ni nasulu maga ni silver, totowo ni silver raki sara nakau ni nasulu maga sikasikai go raki nasulu kakana maga, pataka ni nakau ni nasulu maga sikasikai sarasara ra:

¹⁶Go totowo ni kold raki wede maga ni bred tokorae, wede maga sikasikai sarasara ra; go silver raki wede maga ni silver:

¹⁷Go tagau maga ni nap̃okasi, go besin maga, go lasa munu maga, tea ni kold tautau: go totowo ni kold raki boul maga ni kold, boul maga sikasikai sarasara ra; go silver raki boul maga ni silver, boul maga sikasikai sarasara ra:

¹⁸Go totowo ni kold tautau raki wede ni naviriana ni tea ni nap̃o wia: go kold raki namari‐dawonakiana ni kariot, ni kerub maga wanogoe waina ero sai ki nalivaruda maga, po melugoro areka ni navasasokiana ki Yehovah.

¹⁹Tea mamau puti wanogoe, David e noa e, nam̃elearu ni Yehovah e midiri doko au naga aga midoaki atae a, nawosiana maga mamau puti ni namari‐dawona‐kiana wanogoe.

²⁰Go David e noa ki natuna Solomon, e naga, P̃a kasua go p̃a viviari p̃ia, po mari a: p̃a ta mataku mau, go p̃a ta m̃anaunau mau: nalakena Yehovah Sup̃e, Sup̃e aginau, e sikoti ko doko; ega wo da puoli ki‐go mau, kite doropusi ko mau, pa pa nawosiana mamau puti nalo ni nasuasuaana ni nasum̃a ki Yehovah ega wo pei tea mari‐sua‐ana.

²¹Go p̃a leo, natap̃otawotaeana maga ni tea viri maga go ni naworawora ni Levi, nalo ni nasuasuaana ni nasum̃a ki Sup̃e: go sara naatam̃oli waina eu suasua asa, waina eu manumatua sara nawosiana visarasara maga, euga sikoti ko doko nawosiana mamau puti: go tea maraki maga go narei mamau puti euga wo doko raki natip̃akiana anigo.