Read Nguna Togoa Etafe North 2 KRONIKEL MAGA 1 Bible Online

2 KRONIKEL MAGA 1 - Nguna Togoa Etafe North bible

2 KRONIKEL MAGA 1

¹Go Solomon natu ni David e po kasua namarakiana aneana, go Yehovah Sup̃e aneana e sikoti a doko, po mari a e pei tea warua liu.

²Go Solomon e pasa paki Israel mamau, go paki tea maraki maga ni manu maga go ni p̃onotia maga, go paki tea vasap̃otae maga, go paki tea maramara maga ni Israel, nap̃au maga ni nasum̃a maga ni tamada maga.

³Go Solomon, nara ma nasaisaiana mamau, eu paki tokora vakilagi waina e doko Cibeon pano; nalakena tap̃aup̃au ni nasaisaiana ki Sup̃e, waina Moses tea suasua ki Yehovah e mari a masop̃alo, e doko tokora wanogoe.

⁴Ma David e piragi areka ki Sup̃e pae Kiriath‐yearim sake umai paki tokora waina David e po mari m̃ata ki nia naga ega toko asa: nalakena e sike lawo ki tap̃aup̃au sikai Yerusalem, naga ega toropusi a ega toko asa.

⁵Go wede ni naviriana ni brass waina Besalel natu ni Uri, natu ni Hur, e mari a, e doko tokora wanogoe doko kivea ki tap̃aup̃au ki Yehovah: go Solomon go nasaisaiana mamau eu pusuusu ki nia.

⁶Go Solomon e sake paki tokora wanogoe pano, paki wede ni naviriana ni brass narae ni Yehovah, waina e doko tap̃aup̃au ni nasaisaiana, po pitua ki navituaana tap̃arakiana manu sikai asa.

⁷P̃ogi wanogoe Sup̃e e pakilina ki Solomon po noa ki nia, e naga, P̃a tatago tea waina aga tua ko asa.

⁸Go Solomon e noa ki Sup̃e, e naga, Nigo ku mari nadodomiana warua paki tamagu David, go ku mari au a pei nawota du oli a.

⁹Go Yehovah Sup̃e O, a pavara ni ko asa, nasaiana anigo paki tamagu David ega vei tea vakavuroana: nalakena ku mari au a pei nawota dap̃au narei sikai waina e dakiusi nam̃otam̃ota ni navanua nalo ni nalaapaana.

¹⁰P̃a tua au, a pavara ni ko asa, namanumatuaana go naataeana, naga aga tave pano po sili umai narae ni narei waia: nalakena sei e mariatae pasap̃otae narei anigo waia, waina e parua liu?

¹¹Go Sup̃e e noa ki Solomon, e naga, Nalakena naleo wanogoe e doko nap̃op̃om̃a, go ku da datago navei‐sogolapa‐ana, kite naveaniana, kite nadodomadaganiana, kite namauriana ki tea maga waina eu pilosi ko, go ku da dum̃am̃a datago namauriana varau mau; ma ku dum̃am̃a manigo datago namanumatuaana go naataeana, naga p̃a vasap̃otae narei aginau waina a mari ko ku pei nawota dap̃au ra:

¹²Nalakena tea wanogoe namanumatuaana go naataeana ero pei tea vituakiana paki‐go; go aga wo dua ko naveisogolapa‐ana, go naveaniana, go nadodomadaganiana, dapala waina nawota maga waina eu pea ki‐go te sikai kakada e da peani a mau, go te sikai waina ega wo edakugoro ko, ega wo da peani tea takiusi a mau.

¹³Go Solomon e pae nasurataana aneana paki tokora vakilagi waina e doko Cibeon, pae kivea ki tap̃aup̃au ni nasaisaiana, umai paki Yerusalem; go e maramara dap̃au Israel.

¹⁴Go Solomon e piragi saisai ki kariot maga go naatam̃oli maga ni horse: go e peani kariot manu sikai go p̃onotia pati, go naatam̃oli ni horse tivilia sikai go manu dua, waina e lawo ki da eu doko natokoana maga ni kariot, go sikoti nawota doko Yerusalem.

¹⁵Go doko Yerusalem nawota e mari silver go kold eu dapala vatu maga nalo ni nalaapaana, go e mari sidar maga eu dapala naita maga waina eu doko nap̃aloa.

¹⁶Go horse maga ki Solomon eu pei tea viragiana m̃elu dua ki Ityipt umai; naatam̃oli vakokoto maga ki nawota eu pakotovi ra eu pei taua maga go taua maga, taua sikasikai ki naulu kakada.

¹⁷Go eu piragi kariot maga m̃elu dua ki Ityipt umai, ki shekel ni silver p̃onotia latesa sikasikai sarasara ra, go horse maga ki shekel p̃onotia sikai go rualima takuna lima sikasikai sarasara ra: go eu magi nawota maga mamau puti ni Heth, go nawota maga ni Siria mari dapala nogoe.