Read Nguna Togoa Etafe North 2 KRONIKEL MAGA 10 Bible Online

2 KRONIKEL MAGA 10 - Nguna Togoa Etafe North bible

2 KRONIKEL MAGA 10

¹Go Rehoboam e paki Shekem pano: nalakena Israel mamau eu saisai Shekem naga euga mari a ega vei nawota.

²Go e pakilina, ragi waina Yeroboam natu ni Nebat e dogo e, (nalakena nae e doko Ityipt, tokora waina e sava paki asa pano ragi waina e sava m̃elu dua ki narae ni nawota Solomon,) e pakilina naga Yeroboam e liliu m̃elu dua ki Ityipt umai.

³Go eu pitip̃aki pano po soso e umai; go Yeroboam ma Israel mamau eu rumai, go eu pasa paki Rehoboam, eu naga,

⁴Tamam̃a e mari nakau ni nanoa aginami e madaga: nalakena tea wanogoe p̃a mari nawosiana kasua ki tamam̃a, go nakau ni nanoa madaga aneana waina e doroe e doko gami ega masalesale, go auga wo manigo suasua.

⁵Go e noa ki da, e naga, Kuga vano po doko naaleatia ega tolu, go kuga moro umai punusi au. Go narei eu pano.

⁶Go nawota Rehoboam e pusum̃aki paki tea matua maga, waina eu lawodu narae ni tamana Solomon ragi waina nae e ko mauri doko, e naga, Seve navasaana waina nimu kuga tua au asa, naga aga vasadara narei waia asa?

⁷Go eu noa ki nia, eu naga, Ku pe wia paki narei waia, po mari tea waina eu pe midoaki m̃ata ki nia, po pasa navasaana wia maga paki da, nara eu pe wo pei tea suasua anigo maga pa pa ega tu mau du.

⁸Ma e dip̃a doa navasaana maga waina tea matua maga wanogoe eu dua e asa, po pusum̃aki paki natureai maga waina eu pei taaka sikai maau, go waina eu lawodu naraena.

⁹Go e noa ki da, e naga, Seve navasaana waina kuga vitua ki nia naga tuga vasadara narei waia asa, waina eu noa ki nau, eu naga, P̃a mari nakau ni nanoa waina tamam̃a e doroe e doko gami ega masalesale?

¹⁰Go natureai maga wanogoe waina eu pei taaka sikai maau eu noa ki nia, eu naga, P̃a vasa ega tapala nea paki narei waia waina eu noa ki‐go, eu naga, Tamam̃a e mari nakau ni nanoa aginami e madaga, ma nigo p̃a mari a ega masalesale; p̃a vasa ega tapala nea paki da, p̃a naga, Kini riki aginau e matolu do liu namalo ni tamagu.

¹¹Tamagu e doro nakau ni nanoa madaga sikai e doko mu, ma kinau aga wo mari nakau ni nanoa animu ega moro madaga liu: tamagu e parati mu ki natali varati maga, ma kinau aga wo parati mu ki mataloa maga.

¹²Go dapala nogoe Yeroboam go narei mamau eu rumai punusi Rehoboam naaleatia ketolu, dapala waina nawota e pitip̃aki asa, doko do naga, Kuga moro umai punusi au naaleatia ketolu.

¹³Go nawota e pasadara ra ki navasaana kasua maga; go nawota Rehoboam e dip̃a doa navasaana ki tea matua maga waina eu dua e asa,

¹⁴Po pasa paki da dapala navasaana ki natureai maga, e naga, Tamagu e mari nakau ni nanoa animu e madaga, ma kinau aga wo mari a ega moro madaga liu: tamagu e parati mu ki natali varati maga, ma kinau aga wo parati mu ki mataloa maga.

¹⁵Go dapala nogoe nawota e da dogo parati ki narei mau; nalakena e pei tea ki Sup̃e naga Yehovah ega vakavuro nanoaana aneana, waina e pasa asa pae nam̃elearu ni Ahiyah naatam̃oli ni Shiloh paki Yeroboam natu ni Nebat.

¹⁶Go ragi waina Israel mamau eu punusi naga nawota e da daki dorogo paki da mau, narei eu pasadara nawota, eu naga, Seve matele waina au peani a doko David? Go au da peani te naveani‐pioli‐kiana doko Yesse natuna mau: kuga mamau puti paki tap̃aup̃au animu maga pano, Israel O: go nigo p̃a tum̃am̃a leo parati ki nasum̃a anigo, David. Go Israel eu mamau puti paki tap̃aup̃au adeada maga pano.

¹⁷Ma Israel natuna maga waina eu doko natokoana maga ni Yudah doko, Rehoboam e maramara dap̃au ra.

¹⁸Go nawota Rehoboam e dip̃aki lua Hadoram pano, waina e pei tea leo parati ki dap̃au naatam̃oli wosiwosi maga; go Israel natuna maga eu nadi a ki vatu maga, go e mate. Go nawota Rehoboam e mari m̃araverave naga ega sake paki kariot aneana, naga ega sava paki Yerusalem pano.

¹⁹Go Israel eu mari p̃auluulu dip̃a nasum̃a ki David pae ragi wanogoe pa pa paki naaleatia waia.