Read Nguna Togoa Etafe North 2 KRONIKEL MAGA 11 Bible Online

2 KRONIKEL MAGA 11 - Nguna Togoa Etafe North bible

2 KRONIKEL MAGA 11

¹Go ragi waina Rehoboam e umai sua paki Yerusalem, e piragi saisai ki tea ni nasum̃a ni Yudah go ni Benyamin, naatam̃oli matadoaana manu p̃onotia sikai go tivilia latolu, waina eu pei naatam̃oli marimatua maga ni navakalo, naga euga marimari dip̃a Israel, naga euga magi Rehoboam dape liliua ki namarakiana.

²Ma navasaana ki Yehovah e umai paki Shemaiah naatam̃oli ki Sup̃e, e naga,

³P̃a vasa paki Rehoboam natu ni Solomon, nawota ni Yudah, go paki Israel mamau waina eu doko Yudah go Benyamin,

⁴po naga, Yehovah e noa dapala nea, e naga, Kuga ta sake pano mau, kite marimari dip̃a taimu maga mau: kuga liliu sara naatam̃oli sikasikai paki nasum̃a aneana; nalakena naleo waia e pei tea aginau. Go eu dogo parati ki navasaana maga ki Yehovah, po liliu, po da pano naga euga mari dip̃a Yeroboam mau.

⁵Go Rehoboam e doko Yerusalem doko, po davagi natokoana maga ni p̃aaka doko Yudah.

⁶E davagi Bethlehem, go Etam, go Tekoa,

⁷Go Beth‐sur, go Soko, go Adullam,

⁸Go Cath, go Mareshah, go Sif,

⁹Go Adoraim, go Lakish, go Asekah,

¹⁰Go Sorah, go Aiyalon, go Hebron, waina eu doko Yudah go Benyamin, natokoana maga ni p̃aaka.

¹¹Go e p̃aakagoro nasum̃a kasua maga, po lawo ki tea maraki maga doko ara, go taua ni navinaga, go naroro go waine.

¹²Go e doropusi nakokoro maga go naio maga eu doko sara natokoana maga, po mari ra eu kasua liu. Go Yudah ma Benyamin ero pei aneana.

¹³Go tea viri maga go naworawora ni Levi waina eu doko Israel mamau, eu m̃elu dua ki tokora tokoana adeada maga mamau puti po umai puluti a.

¹⁴Nalakena naworawora maga ni Levi eu doropusi napega adeada maga go naveaniana adeada, po umai paki Yudah go Yerusalem: nalakena Yeroboam go natuna maga eu dip̃a doa ra, naga euga ta mari nawosiana ni navei‐tea‐viri‐ana paki Yehovah mau:

¹⁵Go e dum̃ana maneana pasa dawona ki tea viri maga raki tokora vakilagi maga, go raki naninani anoai maga, go raki kau natuna maga waina e dum̃ana mari ra.

¹⁶Go tea maga waina eu lawo ki nap̃op̃oda naga euga laaga Yehovah Sup̃e ki Israel, eu m̃elu naworawora maga mamau puti ni Israel po dausi ra umai paki Yerusalem naga euga mari naviriana paki Yehovah, Sup̃e ki tamada maga.

¹⁷Go dapala nogoe eu mari namarakiana ni Yudah e kasua, po mari Rehoboam natu ni Solomon e doko p̃ia doko natau dolu: nalakena natau dolu eu surata napua ki David go Solomon.

¹⁸Go Rehoboam e dawiri nagoroi sikai, Mahalath natu ni Yerimoth natu ni David go ni Abihail natu ni Eliab natu ni Yesse;

¹⁹Go e maneana dape natuna naanoai maga; Yeush, go Shemariah, go Saham.

²⁰Go edaku ki nia e dawiri Maakah natu ni Absalom; go nae e maneana dape Abiyah, go Attai, go Sisa, go Shelomith.

²¹Go Rehoboam e dodomi Maakah natu ni Absalom p̃arua liu nagoroi aneana maga mamau puti go narup̃a aneana maga: (nalakena e dawiri nagoroi rualima sikai tamate latolu, go e peani narup̃a rualima latesa, go e pesi natuna naanoai rualima dua tamate latolu, go natuna nagoroi rualima latesa.)

²²Go Rehoboam e pasa dawona ki Abiyah natu ni Maakah naga ega vei nap̃au ni tea maraki maga m̃aleoputo ni taina maga: nalakena e midoa ki nia naga ega mari a ega vei nawota.

²³Go e mari manumatua, po daperavera ki natuna maga usuraki navanua maga ni Yudah go ni Benyamin, paki sara natokoana maga ni p̃aaka: go e dua ra taua warua ni tea kaniana maga. Go e madeada laaga nagoroi laapa.