Read Nguna Togoa Etafe North 2 KRONIKEL MAGA 12 Bible Online

2 KRONIKEL MAGA 12 - Nguna Togoa Etafe North bible

2 KRONIKEL MAGA 12

¹Go e pakilina, ragi waina namarakiana ki Rehoboam e po pei tea lawo‐soki‐ana, go nae e po kasua, naga e doropusi nawotaeana ki Yehovah, nara ma Israel eu mamau.

²Go e pakilina natau kelima ki nawota Rehoboam, naga Shishak nawota ni Ityipt e sake umai dip̃a Yerusalem, nalakena nara eu mari natapiriana dip̃a Yehovah,

³E pilake kariot manu sikai go p̃onotia dua, go naatam̃oli sakesaake horse tivilia latesa: go naatam̃oli maga waina eu mamau puti ma nae m̃elu dua ki Ityipt umai, eu mari sap̃o pei tea veveatae‐ana; tea ni Lubim, tea ni Sikkim, go tea ni Ethiopia.

⁴Go e puati lua natokoana maga ni p̃aaka waina eu pei agi Yudah, po umai paki Yerusalem.

⁵Go profeta Shemaiah e umai punusi Rehoboam, go tea maraki maga ni Yudah, waina eu pei tea viragi‐saisai‐kiana Yerusalem nalakena Shishak, go e noa ki da, e naga, Yehovah e noa dapala nea, e naga, Nimu ku doropusi au, nalakena tea wanogoe kinau ma a doropusi mu ku doko nam̃elearu ni Shishak.

⁶Go tea maraki maga ni Israel go nawota eu dum̃ada doro ra pakitano; go eu naga, Yehovah e leana.

⁷Go ragi waina Yehovah e punusi naga eu dum̃ada doro ra pakitano, navasaana ki Yehovah e umai paki Shemaiah, e naga, Eu dum̃ada doro ra pakitano; aga wo da mari puoli ki da mau: ma aga wo dua ra namagovai seara, go namaritausuana aginau ega wo da pei tea takiana paki Yerusalem pae nam̃elearu ni Shishak mau.

⁸Ma euga wo pei tea suasua aneana maga; naga euga atae nasuasuaana aginau, go nasuasuaana ni namarakiana maga ni navanua maga.

⁹Go Shishak nawota ni Ityipt e sake umai dip̃a Yerusalem, po puati lua naleo tauakiana wia maga ni nasum̃a ki Yehovah, go naleo tauakiana wia maga ni nasum̃a ki nawota; e puti lua ra pano: go e moro puati lua kokororum̃a maga ni kold waina Solomon e mari ra.

¹⁰Go nawota Rehoboam e mari kokororum̃a maga ni brass eu doko oli ra, po pitua ki da paki nam̃elearu ni tea maraki maga ni tea vavaigoro, waina eu pavaigoro namata‐pua ni nasum̃a ki nawota.

¹¹Go ragi waina nawota e paki ekopu ni nasum̃a ki Yehovah, tea vavaigoro maga eu rumai po dapetape ra, po moro dapetape ra liliu paki ekopu ni em̃ago ki tea vavaigoro maga.

¹²Go ragi waina e dum̃ana doro e pakitano, namaritausuana ki Yehovah e m̃elu dua ki nia pano, naga ega ta mari puoli ki nia naga ega vuoli mau: go nawiaana e pei tea vap̃aiana doko Yudah.

¹³Go nawota Rehoboam e dum̃ana mari a e kasua doko Yerusalem, po maramara: nalakena Rehoboam e pei tea ni natau rualima pati tamate sikai ragi waina e pae asa maramara, go e maramara Yerusalem natau rualima sikai tamate larua, natokoana waina Yehovah e matadoa e m̃elu naworawora maga mamau puti ni Israel, naga ega mari nagisana ega toko asa: go p̃ilana nagisana Naamah, nagoroi sikai ni Ammon.

¹⁴Go e mari tea waina e sa, nalakena e da lawo ki nap̃op̃ona naga ega laaga Yehovah mau.

¹⁵Go nawosiana maga ki Rehoboam pae tea vea pa pa paki tea edaku, eu da pei tea midiriana tusi ni nawosiana ni naaleatia maga ki profeta Shemaiah, go ki Iddo tea kikita, dapala natomariana ni nanoaana ni navakilinaana maga, kite? Go navakalo maga eu doko namawota ni Rehoboam go ni Yeroboam pitip̃atip̃a.

¹⁶Go Rehoboam e maturu sikoti tamana maga, po pei tea ovakiana natokoana ki David: go natuna Abiyah e maramara du oli a.